Rôm 16

Kơkuh Tơña

1Kâo pơthâo kơ ƀing gih HʼPhêbê amai ƀing ta sa čô đah kơmơi tha sang yang Phung Sang Ơi Adai plei Sankrê. 2Brơi ƀing gih jum ñu amăng Khua Yang tui hăng tơlơi năng lăp kơ ƀing rơgoh hiam, laih anŭn brơi ƀing gih djru ñu hơgĕt tơlơi ñu kiăng ƀing gih djru. Yua kơ ñu pô ăt hmâo djru laih lu mơnuih, djru wơ̆t kơ kâo mơ̆n.

3Kâo mơit tơlơi kơkuh kơ HʼPrisil hăng Akilas ƀing gơyut mă bruă hrŏm hơbĭt hăng kâo amăng Krist Yêsu.#Bruă 18:2. 4Gơñu pơsăn drơi jan kiăng pơklaih tơlơi hơdip kâo. Ƀu djơ̆ kơnơ̆ng hơjăn kâo đôč ôh bơni kơ gơñu, samơ̆ wơ̆t abih bang Phung Sang Ơi Adai amăng ƀing djuai tuai bơni hơơč kơ gơñu kar kaĭ mơ̆n. 5Kâo mơit tơlơi kơkuh kơ Phung Sang Ơi Adai bơjơnum amăng sang gơñu kar kaĭ mơ̆n. Kâo mơit kơkuh kơ Êpanêtus pô kâo khăp hơeng, pô đaŏ kơ Krist tal blŭng hlâo amăng čar Asi. 6Kâo mơit tơlơi kơkuh kơ HʼMari pô mă bruă gleh glăn tơ̆ng krah ƀing gih. 7Kâo mơit tơlơi kơkuh kơ Andrônikus hăng Junias,#16:7 Đơđa Hră Ơi Adai Pơhiăp so đưm čih: Junias. jing phung wang kâo, ƀing arăng krư̆ hrŏm hơbĭt hăng kâo. Gơñu hmâo tơlơi hing ang tơ̆ng krah ƀing khua ding kơna, gơñu đaŏ kơ Krist hlâo kơ kâo.

8Kâo mơit tơlơi kơkuh Amplias, pô kâo khăp hơeng amăng Khua Yang. 9Kâo mơit tơlơi kơkuh kơ Urban, gơyut mă bruă hrŏm hơbĭt hăng kâo amăng Krist, hăng Stakis pô kâo khăp. 10Kâo mơit tơlơi kơkuh kơ Apêlê, pô dŏ tŏng ten hăng Krist tơdang hmâo tơlơi lông lăng. Kâo mơit tơlơi kơkuh kơ phung wang Aristôbul. 11Kâo mơit tơlơi kơkuh kơ Hêrôdiôn, phung wang kâo. Kâo kơkuh kơ ƀing mơnuih amăng sang Narsis, jing ƀing dŏ amăng Khua Yang.

12Kâo mơit tơlơi kơkuh kơ HʼTriphen hăng HʼTriphôs, ƀing mă bruă kơ Khua Yang. Kâo kơkuh kơ Pêrsis, gơyut gơyâo kâo khăp hơeng, pô hmâo mă bruă gleh glăn kơ Khua Yang. 13Kâo mơit tơlơi kơkuh kơ Ruphus, pô Khua Yang hmâo ruah mă, laih anŭn kơkuh kơ amĭ ih ăt jing amĭ kâo mơ̆n.#Mar 15:21. 14Kâo mơit tơlơi kơkuh kơ Asinkrit, Phalêgôn, Hêrmê, Patrôbas, Hêrmas, laih anŭn ƀing ayŏng amai adơi dŏ hrŏm hơbĭt hăng gơñu. 15Kâo mơit tơlơi kơkuh kơ Philôlôgô hăng HʼJuli, Nêrê laih anŭn amai ñu, laih anŭn Ôlimpơ, laih anŭn abih bang ƀing rơgoh hiam dŏ hrŏm hơbĭt hăng ƀing gơñu.

16Kơkuh bĕ tơdruă ƀing gih hăng tơlơi čŭm rơgoh hiam. Abih bang Phung Sang Ơi Adai Yang Krist kơkuh čuă ngui hăng ƀing gih.

Tơlơi Pơtă Hnal Tuč

17Ơ ƀing adơi ayŏng, kâo kơwưh kơ ƀing gih, răng bĕ kơ ƀing pơkah pơpha phung laih anŭn ngă tơhnač arăng, pơkơdơ̆ng glaĭ hăng tơlơi pơtô ƀing gih hmâo hrăm laih, weh ataih mơ̆ng ƀing gơñu bĕ. 18Yua kơ ƀing mơnuih kar hăng anŭn ƀu mă bruă kơ Krist Khua Yang ƀing ta ôh, samơ̆ mă bruă kơ hlŭng gơñu pô đôč, laih anŭn hăng tơlơi pơhiăp mơmih, hăng tơlơi plư pơhlô̆ gơñu mă pran jua ƀing mơnuih rơgoh hiam. 19Yua kơ abih bang mơnuih leng kơ thâo laih kơ tơlơi ƀing gih thâo gưt hiăp, yua kơ anŭn yơh kâo hmâo tơlơi hơ̆k mơak kơ ƀing gih, kâo kiăng kơ ƀing gih rơgơi kơhnâo amăng tơlơi hiam, laih anŭn jơngeh ƀơhač kơ tơlơi sat ƀai. 20Ơi Adai tơlơi rơnŭk rơnua či tañ juă Satan gah yŭ tơkai ƀing gih. Rơkâo tơlơi pap Khua Yang ƀing ta Yêsu Krist dŏ hrŏm hơbĭt hăng ƀing gih.

21Timôthê, pô mă bruă hrŏm hơbĭt hăng kâo, kơkuh kơ ƀing gih. Lusius, Jason, laih anŭn Sôsipater, ƀing phung wang kâo, kơkuh kơ ƀing gih kar kaĭ mơ̆n.#Bruă 16:1.

22Kâo jing Tertius, pô čih hră anai, kơkuh kơ ƀing gih amăng Khua Yang.

23 # Bruă 19:29; I Kôr 1:14; II Tim 4:20. Gaius, pô tŭ jum kâo laih anŭn pô tŭ jum abih bang Phung Sang Ơi Adai amăng sang ñu, kơkuh kơ ƀing gih. Êrast, khua djă prăk plei prŏng, laih anŭn Kartus, adơi ayŏng ƀing ta, kơkuh kơ ƀing gih. 24Rơkâo tơlơi pap Khua Yang ƀing ta Yêsu Krist dŏ hrŏm hơbĭt hăng abih bang ƀing gih. Amen.

25Pơpŭ bơni kơ Pô dưi pơkơjăp ƀing gih tui hăng Tơlơi Phrâo Hiam kâo laih anŭn tơlơi Yêsu Krist pơtô, tui hăng tơlơi pơrơđah tơlơi yom hơgơ̆m Ơi Adai hmâo pơdŏp laih mơ̆ng đưm adih, 26samơ̆ ră anai hmâo pơrơđah laih mơ̆ng hră ƀing pô laĭ lui hlâo čih brơi laih kơ abih bang djuai mơnuih thâo, tui hăng tơlơi pơđar mơ̆ng Ơi Adai Pô hơdip hlŏng lar, kiăng ba abih bang djuai mơnuih kơ tơlơi đaŏ laih anŭn gưt.

27Kơ Ơi Adai, kơnơ̆ng hơjăn Ñu đôč jing Pô kơhnâo, hmâo tơlơi ư-ang amăng abih bang rơnŭk amăng Yêsu Krist hlŏng lar! Amen.

Currently Selected:

Rôm 16: JRA2016

Highlight

Copy