Rôm 11

Tơlơi Ơi Adai Pap Kơ Ƀing Israel

1Tui anŭn kâo tơña, Ơi Adai hmâo hrah lui ƀing ană plei Ñu mơ̆? Sĭt ƀu djơ̆ tui anŭn ôh! Kâo pô mơ̆n jing sa čô mơnuih Israel, ană tơčo Abraham, sa čô mơ̆ng djuai Benjamin.#Phi 3:5. 2Ơi Adai ƀu hrah lui hĭ ôh ană plei Ñu jing ƀing Ñu thâo krăn laih mơ̆ng hlâo. Ƀing gih ƀu thâo ôh hă hơgĕt Hră Ơi Adai Pơhiăp hmâo čih laih djơ̆ kơ Êli, hyư̆m ñu phong ană Israel ƀơi anăp Ơi Adai? 3“Ơ Khua Yang, gơñu hmâo pơdjai laih ƀing pô laĭ lui hlâo Ih, gơñu pơglưh hĭ laih abih bang kơƀang ngă yang kơ Ih. Dŏ kơnơ̆ng hơjăn kâo đôč, laih anŭn gơñu ăt hơduah kiăng pơdjai kâo mơ̆n.”#I Pơtao 19:10. 4Samơ̆ hyư̆m Ơi Adai laĭ glaĭ kơ ñu? “Kâo hmâo răk pioh laih kơ Kâo pô tơjuh rơbâo đah rơkơi aka ƀu tŏ tơŭt ƀơi anăp yang Baal ôh.”#I Pơtao 19:18. 5Kar kaĭ mơ̆n amăng rơnŭk anai, hmâo sa črăn dŏ tơsot glaĭ dưi ruah mă laih hăng tơlơi pap. 6Samơ̆ Ñu ruah mă gơñu mơ̆ng tơlơi pap, ƀu djơ̆ mơ̆ng bruă gơñu ngă ôh. Tơdah ƀu djơ̆ tui anŭn, tơlơi pap anŭn ƀu jing tơlơi pap dơ̆ng ôh.

7Hyư̆m tui anŭn? Tơlơi ƀing ană Israel tui hơduah, gơñu ƀu dưi hmâo ôh. Samơ̆ ƀing Ơi Adai ruah hmâo laih tơlơi anŭn, samơ̆ ƀing dŏ glaĭ Ơi Adai pơkhăng hĭ pran jua gơñu, 8Tui hăng hră Ơi Adai pơhiăp hmâo čih:

“Ơi Adai hmâo brơi kơ gơñu bơngăt jua mơmŏt,

Mơta ƀu thâo ƀuh, laih anŭn tơngia tơngil hlŏng truh pơ hrơi anai.”#Mơñă 29:4; Êsai 29:10; 6:9.

9Laih anŭn Đawit laĭ:

“Brơi kơƀang gơñu ƀơ̆ng huă jing hĭ čơđong laih anŭn jal klŭp,

Boh pơtâo pơtơhnač laih anŭn jing tơlơi rŭ nua kơ ƀing gơñu;

10Brơi kơ mơta gơñu jing mơmŏt hĭ, kiăng kơ gơñu ƀu thâo ƀuh,

Laih anŭn brơi rŏng gơñu gô nanao.”#Adoh 69:22,23.

Tơlơi Pơklaih Truh Kơ Ƀing Djuai Tuai

11Tui anŭn kâo tơña, djơ̆ mơ̆ ƀing ană Israel hmâo tơhnač laih tơl rơbuh hăng răm rai hĭ? Ƀu djơ̆ tui anŭn ôh! Samơ̆ yua kơ tơlơi gơñu ngă soh, tơlơi pơklaih truh laih kơ ƀing djuai tuai, kiăng ngă brơi kơ ƀing Israel gar kơtưn. 12Tui anŭn tơdah tơlơi gơñu ngă soh anŭn pơjing pơdrŏng brơi kơ lŏn tơnah, laih anŭn tơdah tơlơi gơñu rơbuh pơjing tơlơi pơdrŏng kơ ƀing djuai tuai, ƀai jai yơh tơlơi pơdrŏng sah hloh dơ̆ng či truh tơdah abih bang ƀing gơñu wơ̆t glaĭ kơ Ơi Adai dơ̆ng!

13Ră anai kâo laĭ kơ ƀing gih ơ ƀing djuai tuai, tơdang kâo ăt dŏ jing khua ding kơna kơ ƀing djuai tuai, kâo či pơpŭ kơdrưh kơ bruă kâo, 14kâo kiăng râo mơdưh pran jua gar kơtưn kơ ƀing kơnŭng djuai kâo, kiăng kơ hmâo đơđa mơnuih amăng ƀing gơñu dưi klaih. 15Yua kơ tơdah tơlơi Ơi Adai hrah lui gơñu jing hĭ tơlơi pơgop rơnom kơ abih lŏn tơnah, hơgĕt tơlơi či truh yua mơ̆ng tơlơi jum glaĭ gơñu? Ƀu djơ̆ ôh hă jing kar hăng brơi tơlơi hơdip kơ ƀing djai laih?

16Tơdah boh blŭng hlâo pơyơr jing rơgoh hiam, tui anŭn abih bang jing rơgoh hiam kar kaĭ mơ̆n. Laih anŭn tơdah akha kơyâo pơyơr jing rơgoh hiam, abih bang than jing rơgoh hiam kar kaĭ mơ̆n. 17Samơ̆ tơdah hmâo đơđa than arăng trơĭ hĭ laih, laih anŭn ih jing sa ƀĕ than ôliwơ glai, arăng pơtĕp ƀlir ƀơi anih arăng trơĭ hĭ gơ̆ laih, kiăng kơ ih dưi hmâo kơtăk hơdip mơ̆ng akha boh ôliwơ, 18anăm pơgao hăng than pơkŏn ôh. Tơdah ih ngă pơgao, hơdơr bĕ ƀu djơ̆ ih ôh krơ̆ng akha, samơ̆ akha krơ̆ng ih.

19Ih či laĭ: “Khul than arăng hmâo trơĭ hĭ, kiăng kơ dưi pơtĕp ƀlir kâo ƀơi anih anŭn.” 20Tơlơi anŭn djơ̆ sĭt. Arăng hmâo trơĭ hĭ gơñu yua kơ tơlơi gơñu ƀu đaŏ. Samơ̆ ih kơnơ̆ng dưi dŏ kơjăp yua kơ tơlơi ih đaŏ. Tui anŭn anăm pơgao ôh, samơ̆ brơi hwĭ bĕ. 21Yua kơ tơdah Ơi Adai ƀu hơ-ưi ôh kơ than hơđăp, Ñu ăt ƀu či hơ-ưi kơ ih lơi. 22Brơi ih thâo hluh bĕ tơlơi hiam klă hăng tơlơi khăng khĭp Ơi Adai: khăng khĭp hăng ƀing hmâo rơbuh laih, samơ̆ Ơi Adai ngă hiam klă kơ ih, tŭ kơ ih ăt dŏ nanao amăng tơlơi hiam klă Ñu. Tơdah ih ƀu dŏ amăng tơlơi hiam klă Ñu ôh, Ñu či trơĭ hĭ ih kar kaĭ mơ̆n. 23Wơ̆t kơ ƀing Yuđa kar kaĭ mơ̆n, tơdah gơñu lui hĭ tơlơi ƀu đaŏ, Ơi Adai či pơklep glaĭ gơñu dơ̆ng, yua kơ Ơi Adai hmâo tơlơi dưi pơklep glaĭ gơñu. 24Yua kơ tơdah arăng hmâo trơĭ mă ih mơ̆ng phŭn ôliwơ hơđăp jing phŭn ôliwơ glai, ăt dưi mơ̆n pơklep ih hăng phŭn ôliwơ arăng pla hăng wai rơnăk, phara hăng tơlơi juăt yang đar, ƀai jai yơh amuñ hloh dơ̆ng arăng či pơklep glaĭ than sĭt amăng phŭn ôliwơ hơđăp gơñu pô.

Ơi Adai Pơdơ̆ng Glaĭ Phung Israel

25Ơ adơi ayŏng, kâo kiăng kơ ƀing gih thâo hluh tơlơi yom hơgơ̆m anai, hwĭ kơ ƀing gih pơgao pơmĭn dah ƀing gih jing ƀing mơnuih kơhnâo, anŭn jing: sa črăn amăng ƀing Israel ăt dŏ khăng pran jua, tơl mrô ƀing djuai tuai mŭt tum laih tui hăng Ơi Adai hmâo pơkơčah. 26Giơ̆ng kơ anŭn kah abih bang ƀing ană Israel či klaih; tui hăng Hră Ơi Adai Pơhiăp hmâo čih:

“Pô Pơrơngai či rai mơ̆ng Siôn,

Ñu či mă pơđuaĭ hĭ tơlơi ƀu đaŏ mơ̆ng phung Yakôp.

27Laih anŭn anai jing kơnol pơgop Kâo hmâo pơdơ̆ng laih hăng gơñu,

Tơ Kâo sut lui hĭ tơlơi soh gơñu.”#Êsai 59:20; 27:9; Adoh 14:7; Yêr 31:16.

28Tui hăng Tơlơi Phrâo Hiam, gơñu jing ayăt hăng Ơi Adai,#11:28 Amăng hră tơlơi Grek ƀu hmâo ôh boh hră Ơi Adai. tơlơi anŭn jing tơlơi tŭ yua brơi kơ ƀing gih jing ƀing djuai tuai; samơ̆ tui hăng tơlơi Ơi Adai ruah, gơñu jing phung Ơi Adai hmâo khăp laih yua kơ ƀing ơi adon gơñu. 29Yua kơ khul tơlơi Ơi Adai pha brơi laih anŭn tơlơi Ñu ruah iâu ƀu thâo plih ôh. 30Kar hăng hlâo adih ƀing gih ƀu tui gưt kơ Ơi Adai ôh, samơ̆ ră anai ƀing gih hmâo laih tơlơi pap drap yua kơ tơlơi gơñu ƀu tui gưt, 31kar kaĭ mơ̆n ră anai gơñu ƀu tui gưt ôh kiăng kơ mơ̆ng tơlơi pap drap hmâo pơrơđah laih kơ ƀing gih, gơñu ăt dưi hmâo tơlơi pap drap mơ̆n. 32Yua kơ Ơi Adai hmâo krư̆ laih abih bang mơnuih amăng tơlơi ƀu tui gưt, kiăng kơ Ñu dưi pap drap brơi kơ abih bang.

33Aƀơih dlam đơi! Tơlơi pơdrŏng Ơi Adai, wơ̆t tơlơi kơhnâo laih anŭn tơlơi rơgơi Ñu! Hyư̆m dưi pơblang tơlơi Ñu phat kơđi laih anŭn hyư̆m dưi thâo hluh kơ khul jơlan Ñu!#Êsai 55:8.

34“Yua kơ hlơi dưi thâo tơlơi pơmĭn Khua Yang,

Hlơi jing pô kơčĕ brơi kơ Ñu?”#Êsai 40:13; Yêr 23:18.

35Ƀôdah “hlơi hmâo brơi laih sa mơta mơnơ̆ng kơ Ñu hlâo,

Kiăng kơ Ñu kla glaĭ?”#Jôp 41:2.

36Yua kơ abih mơnơ̆ng leng kơ tơbiă rai mơ̆ng Ñu, yua mơ̆ng Ñu, laih anŭn anăp nao pơ Ñu. Tơlơi ư-ang, tơlơi ang yang lơ̆m kơ Ơi Adai hlŏng lar, Amen!#I Kôr 8:6.

Currently Selected:

Rôm 11: JRA2016

Highlight

Copy