Tơlơi Bơrơđah 11

Dua Čô Pô Gơ̆ng Jơlan

1 # Êsê 40:3; Sak 2:1,2. Hlăk anŭn arăng brơi kơ kâo sa ƀĕ gai pơkă hrup hăng sa ƀĕ gai jra, laih anŭn ñu pơtă kâo: “Tơgŭ bĕ laih anŭn pơkă sang kơkuh pơpŭ kơ Ơi Adai, kơƀang ngă yang, laih anŭn ƀing kơkuh pơpŭ amăng anŭn. 2#Luk 21:24.Samơ̆ anăm pơkă ôh wăl gah rơngiao kơ sang kơkuh pơpŭ; yua kơ arăng hmâo jao laih ñu kơ ƀing djuai tuai, laih anŭn ƀing gơñu či juă hĭ plei rơgoh hiam amăng pă pluh dua blan. 3Kâo či brơi dua čô pô gơ̆ng jơlan kơ Kâo buh ao kơƀao laih anŭn dưi laĭ lui hlâo amăng sa rơbâo dua rơtuh năm pluh hrơi.”

4 # Sak 4:3,11-14. Ƀing anŭn jing dua ƀĕ phŭn kơyâo ôliwơ laih anŭn dua ƀĕ gơ̆ng apui kơđen dŏ dơ̆ng ƀơi anăp Khua Yang kơ lŏn tơnah. 5Tơdah hlơi kiăng ngă sat kơ dua čô anai, apui tơbiă mơ̆ng amăng bah gơñu čuh hĭ ƀing ayăt gơñu; hlơi pô kiăng ngă sat kơ ƀing gơñu, gơñu khŏm či tŭ tơlơi pơdjai kar hăng anŭn yơh. 6#II Pơtao 17:1; Tơb 7:17-19; I Sa 4:8.Gơñu hmâo tơlơi dưi krư̆ hĭ adai, kiăng kơ ƀu hmâo ia hơjan ôh amăng khul hrơi gơñu laĭ lui hlâo; gơñu ăt hmâo tơlơi dưi pơblih ia jing hĭ drah mơ̆n, laih anŭn dưi yua djŏp mơta tơlơi răm ruă ngă sat kơ lŏn tơnah tui hluai hăng gơñu kiăng.

7 # Đaniel 7:7; Bơrđ 13:5-7; 17:8; Đaniel 7:21. Tơ dua gơñu hmâo ngă gơ̆ng jơlan giơ̆ng laih, hlô glai tơbiă đĭ mơ̆ng hlŭng dlam pơblah hăng gơñu, hlô anŭn dưi hĭ hăng gơñu laih anŭn pơdjai hĭ gơñu. 8#Êsai 1:9,10.Drơi jan djai dua gơñu či đih ƀơi jơlan glung kơ plei prŏng, arăng iâu hăng anăn rup pơhmô jing Sôđôm laih anŭn čar Êjip, anih arăng hmâo pơ̆ng pơdjai laih Khua Yang gơñu ƀơi kơyâo bơrơkal. 9Mơnuih mơ̆ng abih khul djuai mơnuih, abih kơnŭng djuai, abih tơlơi pơhiăp, abih lŏn čar či ep lăng kơ drơi jan djai gơñu amăng klâo hrơi mơkrah, laih anŭn ƀu brơi arăng dơr hĭ amăng pơsat ôh. 10Ƀing mơnuih dŏ ƀơi lŏn tơnah či hơ̆k mơak yua kơ gơñu, hơ̆k kơdơ̆k mơit nao rai gơnam brơi tơdruă gơñu, yua kơ dua čô pô laĭ lui hlâo anai hmâo ngă pơtơnap laih kơ ƀing mơnuih dŏ ƀơi lŏn tơnah. 11#Êsê 37:10.Tơdơi kơ klâo hrơi mơkrah, jua hơdip mơ̆ng Ơi Adai mŭt amăng dua gơñu, laih anŭn gơñu tơgŭ dơ̆ng, ngă brơi ƀing ƀuh gơñu hwĭ biă mă. 12#II Pơtao 2:11.Dua gơñu hmư̆ asăp kraih mơ̆ng adai laĭ kơ dua gơñu tui anai: “Đĭ pơ anai bĕ!” Laih anŭn gơñu đĭ pơ adai amăng ƀŭt hiăng ƀơi anăp mơta ƀing ayăt gơñu. 13#Bơrđ 6:12; 16:18.Ƀơi mông anŭn hmâo tơlơi pơpư̆ lŏn tơnah kơtang, sa črăn amăng pluh črăn plei prŏng răm rai. Tơjuh rơbâo čô mơnuih djai amăng tơlơi lŏn tơnah pơpư̆ anŭn, bơ kơ ƀing pơkŏn hwĭ biă mă laih anŭn gơñu pơpŭ bơni kơ Ơi Adai amăng adai.

14Tơlơi tơnap tal dua rơgao hĭ; anai nê tơlơi tơnap tap tal klâo či truh tañ.

Tơdiăp Tal Tơjuh

15 # Tơb 15:18; Đaniel 2:44; 7:14,27. Ling jang tal tơjuh ayŭp tơdiăp, hmâo asăp kraih mơ̆ng adai, laĭ:

“Dêh čar pơtao lŏn tơnah lơ̆m kơ Khua Yang ƀing ta

Laih anŭn lơ̆m kơ Krist Ñu.

Ñu či wai lăng hlŏng lar.”

16Ƀing dua pluh pă čô kŏng tha dŏ ber ƀơi gre pơtao ƀơi anăp Ơi Adai, gơñu bon kŭp ƀô̆ laih anŭn kơkuh pơpŭ kơ Ơi Adai, 17laĭ tui anai:

“Ơ Khua Yang Ơi Adai Dưi Kơtang, Pô Hlăk Hmâo Ră Anai, laih anŭn Pô Hmâo Laih,

Gơmơi bơni hơơč kơ Ih, yua kơ Ih hmâo djă tơlơi dưi prŏng prin,

Laih anŭn wai lăng.

18 # Adoh 2:5; 110:5; Adoh 115:13. Ƀing djuai mơnuih hil kơtang tĭt,

Samơ̆ tơlơi Ih hil hmâo truh laih,

Laih anŭn mông phat kơđi kơ khul djuai mơnuih truh laih,

Pha brơi pri kơ ƀing ding kơna Ih, ƀing pô laĭ lui hlâo, ƀing rơgoh hiam,

Laih anŭn ƀing hwĭ pơpŭ kơ anăn Ih,

ƀing anĕt wơ̆t ƀing prŏng,

Laih anŭn pơrai hĭ ƀing pơrai lŏn tơnah.”

19 # Bơrđ 8:5; 16:18; Bơrđ 16:21. Sang kơkuh pơpŭ kơ Ơi Adai amăng adai pŏk hĭ, amăng lăm arăng ƀuh hmâo Hip Kơnol Pơgop Ñu, laih anŭn hmâo khul kơmlă, asăp pơhiăp, asăp grơ̆m, lŏn tơnah pơpư̆ laih anŭn hơjan pler prŏng.

Currently Selected:

Tơlơi Bơrơđah 11: JRA2016

Highlight

Copy

Compare