Tơlơi Bơrơđah 1

Pơphŭn Pơhiăp

1Tơlơi Yêsu Krist pơrơđah tui hăng Ơi Adai hmâo pha brơi laih kơ Ñu, kiăng kơ Ñu pơrơđah kơ ƀing ding kơna Ñu khul tơlơi khŏm truh tañ. Ñu pơkiaŏ ling jang Ñu nao pơrơđah tơlơi anai kơ Yôhan, ding kơna Ñu, 2jing pô hmâo ngă gơ̆ng jơlan laih kơ boh pơhiăp Ơi Adai laih anŭn kơ tơlơi Yêsu Krist gơ̆ng jơlan, anŭn jing abih tơlơi Ñu hmâo ƀuh laih. 3Mơyun hiam yơh kơ hlơi pô đŏk laih anŭn kơ hlơi pô hmư̆ boh pơhiăp laĭ lui hlâo anai, laih anŭn gưt tui tơlơi arăng hmâo čih laih ƀơi anai; yua kơ mông jĕ truh laih.

Tơlơi Kơkuh Tơña Bla Tơjuh Phung Sang Ơi Adai

4 # Tơb 3:14; Bơrđ 4:5. Yôhan čih mơit kơ tơjuh Phung Sang Ơi Adai amăng čar Asi:

Hơơč kơ ƀing gih hmâo tơlơi pap laih anŭn tơlơi rơnŭk rơnua mơ̆ng Pô Hlăk Dŏ Hmâo, Pô Hmâo Laih, laih anŭn Pô Či Rai Dơ̆ng, laih anŭn mơ̆ng tơjuh Yang Bơngăt dŏ ƀơi anăp gre pơtao Ñu, 5#Êsai 55:4; Adoh 89:27.laih anŭn mơ̆ng Yêsu Krist, Pô ngă gơ̆ng jơlan hơnơ̆ng ten, Pô Ơi Adai tơkeng blŭng hlâo mơ̆ng ƀing djai, laih anŭn khua kơ ƀing pơtao ƀơi lŏn tơnah.

Kơ Pô khăp kơ ƀing ta laih anŭn hmâo pơrơngai laih ƀing ta mơ̆ng tơlơi soh ƀing ta hăng drah Ñu pô, 6#Tơb 19:6; Bơrđ 5:10.laih anŭn ngă brơi ƀing ta jing hĭ dêh čar pơtao, jing ƀing khua ngă yang kơ Ơi Adai, Ama Ñu, kơ Ñu yơh tơlơi guh kơang laih anŭn tơlơi dưi wai lăng nanao hlŏng lar. Amen.

7 # Đaniel 7:13; Mat 24:30; Mar 13:26; Luk 21:27; I Tês 4:17; Sak 12:10; Yô 19:34,37; Sak 12:10; Mat 24:30. Anai nê, Ñu či rai hăng khul hiăng kơthul, abih bang mơta či ƀuh Ñu, wơ̆t ƀing hmâo klaŏ laih Ñu, laih anŭn abih bang djuai mơnuih ƀơi lŏn tơnah či čŏk hia yua kơ Ñu. Sĭt biă mă. Amen.

8 # Bơrđ 22:13; Tơb 3:14; Êsai 41:4; 44:6. Khua Yang Ơi Adai laĭ, Pô ră anai hlăk hmâo, Pô hmâo laih, laih anŭn Pô či rai dơ̆ng, Pô Hmâo Abih Tơlơi Dưi Mơyang laĭ: “Kâo jing Alpha laih anŭn Ômêga.”#1:8 Alpha laih anŭn Ômêga: jing dua boh hră phŭn blŭng laih anŭn hnal tuč amăng abih boh hră tơlơi Grek.

Tơlơi Pơƀuh Ƀơi Plao Ia Patmôs

9Kâo jing Yôhan, ayŏng kơ ƀing gih, pô tŭ hrŏm hơbĭt tơlơi tơnap tap, dêh čar pơtao laih anŭn tơlơi gir hrŏm hơbĭt hăng ƀing gih amăng Khua Yang Yêsu Krist, ră anai kâo hlăk dŏ pơ plao ia arăng pơanăn Patmôs, yua kơ boh pơhiăp Ơi Adai laih anŭn tơlơi gơ̆ng jơlan kơ Khua Yang Yêsu. 10Amăng hrơi Khua Yang, Yang Bơngăt Hiam gom kâo, laih anŭn kâo hmư̆ gah klon kâo asăp kraih kar hăng asăp tơki, 11laĭ: “Čih bĕ hơgĕt khul tơlơi ih ƀuh amăng sa sŏp hră, laih anŭn mơit kơ tơjuh Phung Sang Ơi Adai pơ plei: Êphêsô, Smirna, Pergam, Thiatir, Sardis, Philadelphi, laih anŭn Laôdisê.”

12Tui anŭn kâo wir glaĭ lăng kiăng thâo asăp hlơi dŏ pơhiăp hăng kâo. Kâo man wir glaĭ, kâo ƀuh tơjuh ƀĕ gơ̆ng apui kơđen ngă hăng mah, 13#Đaniel 7:13; Đaniel 10:5.laih anŭn ƀơi tơ̆ng krah khul gơ̆ng apui kơđen hmâo sa čô hrup hăng Ană Mơnuih, ƀuh ao phyung glong laih anŭn hrăng bơnal mah jum dar tơda Ñu. 14#Đaniel 7:9.#Đaniel 10:6.Akŏ laih anŭn ƀuk Ñu kŏ kar hăng blâu triu, kŏ kar hăng pler tơpŭng, mơta Ñu kar hăng jơlah apui, 15#Êsê 1:24; 43:2.tơkai Ñu kar hăng kong čêr dơnar arăng pơrơgoh laih amăng tơpur apui, laih anŭn asăp Ñu kar hăng dơnai jrai ia prŏng; 16Tơngan hơnuă Ñu djă tơjuh boh pơtŭ, mơ̆ng amăng bah Ñu tơbiă rai sa ƀĕ đao dua bơnah mơta ƀơ̆ng biă mă, laih anŭn ƀô̆ mơta Ñu kar hăng yang hrơi pơčrang hăng abih tơlơi kơtang ñu.

17 # Êsai 44:6; 48:12; Bơrđ 2:8; 22:13. Tơ kâo ƀuh Ñu, kâo rơbuh ƀơi tơkai Ñu kar hăng djai. Samơ̆ Ñu ah tơngan hơnuă Ñu ƀơi kâo laih anŭn laĭ: “Anăm Hwĭ ôh, Kâo jing Pô Blŭng Hlâo Hloh laih anŭn Pô Hnal tuč, 18laih anŭn Pô Hơdip; Kâo hmâo djai laih, ră anai Kâo hơdip hlŏng lar, Kâo djă kơmla kăl tơlơi djai laih anŭn Plei Ƀing Djai. 19Ră anai čih pioh bĕ hơgĕt khul tơlơi ih hmâo ƀuh laih, khul tơlơi hlăk hmâo ră anai, laih anŭn khul tơlơi či truh tơdơi kơ tơlơi anai. 20Anai tơlơi yom hơgơ̆m kơ tơjuh boh pơtŭ ih hmâo ƀuh laih amăng tơngan gah hơnuă Kâo, laih anŭn tơjuh ƀĕ gơ̆ng apui kơđen ngă hăng mah, tơjuh boh pơtŭ anŭn jing tơjuh čô ling jang kơ tơjuh Phung Sang Ơi Adai, bơ kơ tơjuh ƀĕ gơ̆ng apui kơđen jing tơjuh Phung Sang Ơi Adai.”

Currently Selected:

Tơlơi Bơrơđah 1: JRA2016

Highlight

Copy

Compare