Tơlơi Yap 33
33
Tơlơi Yak Rơbat Ană Plei Pla Israel Mơ̆ng Êjip Truh Pơ Lŏn Daŏ Môap
1Anai jing tơlơi yak rơbat kơ ană plei pla Israel tơdang gơñu đuaĭ mơ̆ng čar Êjip tui hăng khul gơñu dŏ gah yŭ tơlơi gĭt gai Môis hăng Arôn. 2Môis gưt tui tơlơi Yêhôwa pơtă čih pioh tơlơi yak rơbat ƀing ană plei pla Israel tui hăng rĭm čăl jơlan gơñu. Gah yŭ anai jing hơdôm čăl jơlan ruai tui hăng khul anih yak rơbat:
3Ană plei pla Israel rơbat mơ̆ng Ramse amăng hrơi tal pluh rơma blan sa, sa hrơi tơdơi kơ Phĕt Tơlơi Găn. Gơñu rơbat nao hăng tơlơi khĭn ƀơi anăp abih bang ƀing Êjip dŏ lăng, 4Hlăk anŭn, ƀing Êjip dơr hĭ abih bang ană kơčoa gơñu, jing ƀing mơnuih Yêhôwa hmâo pơrai hĭ laih yua kơ Ñu hmâo phat kơđi laih kơ ƀing yang gơñu.
5Ană plei pla Israel tơbiă đuaĭ mơ̆ng Ramse laih anŭn nao jưh pơ Sukôt, 6giơ̆ng kơ tơbiă đuaĭ mơ̆ng Sukôt gơñu nao jưh pơ Êtham pơ rơnuč tơdrŏn tač. 7Mơ̆ng anŭn, gơñu đuaĭ mơ̆ng Êtham, nao kuang anăp nao gah Pihahirôt pơklă anăp hăng Baal Sêphôn laih anŭn jưh ƀơi anăp Mikdôl. 8Ană plei pla Israel đuaĭ mơ̆ng Pihahirôt, găn ia rơsĭ anăp nao gah tơdrŏn tač laih anŭn rơbat klâo hrơi amăng tơdrŏn tač Êtham giơ̆ng anŭn dŏ jưh pơ Mara. 9Gơñu đuaĭ mơ̆ng Mara nao pơ Êlim. Pơ Êlim hmâo pluh dua hlâo ia laih anŭn tơjuh pluh phŭn gol; laih anŭn gơñu jưh pơ anŭn. 10Đuaĭ mơ̆ng Êlim, gơñu nao jưh giăm Ia Rơsĭ Mriah. 11Gơñu đuaĭ mơ̆ng Ia Rơsĭ Mriah laih anŭn jưh pơ tơdrŏn tač Sin. 12Đuaĭ mơ̆ng tơdrŏn tač Sin, gơñu jưh pơ Dôphka. 13Đuaĭ mơ̆ng Dôphka laih anŭn jưh pơ Alus. 14Đuaĭ mơ̆ng Alus, gơñu jưh pơ Rêphidim jing anih ƀu hmâo ia mơñum kơ ană plei pla ôh. 15Gơñu đuaĭ mơ̆ng Rêphidim laih anŭn jưh pơ tơdrŏn tač Sinai. 16Mơ̆ng anŭn, gơñu đuaĭ mơ̆ng tơdrŏn tač Sinai laih anŭn jưh pơ Kibrôt Hatawa. 17Đuaĭ mơ̆ng Kibrôt Hatawa, gơñu jưh pơ Hasêrôt. 18Gơñu đuaĭ mơ̆ng Hasêrôt laih anŭn jưh pơ Ritma. 19Đuaĭ mơ̆ng Ritma, gơñu jưh pơ Rimôn Pêres. 20Gơñu đuaĭ mơ̆ng Rimôn Pêres laih anŭn jưh pơ Lipna. 21Đuaĭ mơ̆ng Lipna, gơñu jưh pơ Risa. 22Mơ̆ng anŭn, gơñu đuaĭ mơ̆ng Risa laih anŭn jưh pơ Kêlêhata. 23Đuaĭ mơ̆ng Kêlêhata, gơñu jưh pơ čư̆ Sêpher. 24Gơñu đuaĭ mơ̆ng Sêpher laih anŭn jưh pơ Harada. 25Đuaĭ mơ̆ng Harada, gơñu jưh pơ Makhêlôt. 26Gơñu đuaĭ mơ̆ng Makhêlôt laih anŭn jưh pơ Tahat. 27Đuaĭ mơ̆ng Tahat, gơñu jưh pơ Têra. 28Gơñu đuaĭ mơ̆ng Têra laih anŭn jưh pơ Mitka. 29Đuaĭ mơ̆ng Mitka, gơñu jưh pơ Hasmôna. 30Gơñu đuaĭ mơ̆ng Hasmôna laih anŭn jưh pơ Môsêrôt. 31Đuaĭ mơ̆ng Môsêrôt, gơñu jưh pơ Bênêjakan. 32Gơñu đuaĭ mơ̆ng Bênêjakan laih anŭn dŏ jưh hĭ pơ Hôrhagitgat.#33:32 Hmâo đơđa hră pơblang pơanăn jing Hôrgitgat. 33Đuaĭ mơ̆ng Hôrhagitgat, gơñu jưh pơ Jôtbata. 34Gơñu đuaĭ mơ̆ng Jôtbata laih anŭn jưh pơ Abrôna. 35Đuaĭ mơ̆ng Abrôna, gơñu jưh pơ Êsiôn-Gêber. 36Gơñu đuaĭ mơ̆ng Êsiôn-Gêber laih anŭn dŏ jưh hĭ pơ tơdrŏn tač Sin#33:36 Amăng boh hră hơđăp boh hră anai phara hăng boh hră “Sin” amăng jơlan 11 laih anŭn 12. kiăng laĭ jing ƀơi Kadês. 37Mơ̆ng anŭn, gơñu đuaĭ mơ̆ng Kadês laih anŭn jưh ƀơi čư̆ Hor, ƀơi guai čar Êđôm.
38Khua ngă yang Arôn đĭ nao pơ čư̆ Hor tui hăng tơlơi Yêhôwa pơtă laih anŭn tơĭ pran ƀơi anŭn amăng hrơi tal sa blan rơma, thŭn pă pluh tơdơi kơ ană plei pla Israel tơbiă đuaĭ mơ̆ng čar Êjip.#Yap 20:22-28; Mơñă 10:6; 32:50. 39Arôn tơĭ pran ƀơi čư̆ Hor, Arôn hơdip hmâo sa rơtuh dua pluh klâo thŭn.
40Hlăk anŭn, pơtao Arat jing mơnuih Kanaan hơdip pơ Nêgep lŏn čar Kanaan, hmư̆ tơlơi ană plei pla Israel hmâo rai laih.#Yap 21:1.
41Ană plei pla Israel đuaĭ mơ̆ng čư̆ Hor laih anŭn jưh pơ Salmôna. 42Đuaĭ mơ̆ng Salmôna, gơñu jưh pơ Punon. 43Gơñu đuaĭ mơ̆ng Punon laih anŭn jưh pơ Ôbôt. 44Mơ̆ng anŭn, gơñu đuaĭ mơ̆ng Ôbôt laih anŭn jưh pơ Iyê Abarim, guai čar Môap. 45Đuaĭ mơ̆ng Iyê Abarim, gơñu jưh pơ Dibôn Gat. 46Gơñu đuaĭ mơ̆ng Dibôn Gat laih anŭn jưh pơ Almôn Diblatam. 47Mơ̆ng anŭn, gơñu đuaĭ mơ̆ng Almôn Diblatam laih anŭn jưh pơ čư̆ Abarim ƀơi anăp Nêbô. 48Đuaĭ mơ̆ng Abarim, gơñu jưh pơ tơdrŏn daŏ Môap, giăm ia krong Yurdan pơklă anăp hăng Yêrikô. 49Gơñu jưh giăm ia krong Yurdan, dơ̆ng mơ̆ng Bet Jêsamôt truh pơ Abel Sitim amăng tơdrŏn daŏ Môap.
50Yêhôwa laĭ hăng Môis amăng tơdrŏn daŏ Môap, giăm ia krong Yurdan pơklă anăp hăng Yêrikô, tui anai: 51“Pơtă bĕ ană plei pla Israel: ‘Tơdang ƀing gih găn hĭ ia krong Yurdan kiăng mŭt amăng lŏn čar Kanaan 52samơ̆ khŏm puh pơđuaĭ ană plei pla dŏ amăng anih anŭn mơ̆ng ƀing gih, pơrai hĭ abih rup trah laih anŭn rup man laih anŭn pơglưh abih bang anih glong ƀing gơñu. 53Ƀing gih či mă tŭ lŏn čar anŭn ngă kong ngăn laih anŭn hơdip amăng anih anŭn, yua kơ Kâo hmâo pha brơi kơ ƀing gih lŏn čar anŭn ngă kong ngăn. 54Mă črăm bĕ kiăng pơpha lŏn tui hăng kơnŭng djuai ƀing gih. Kơnŭng djuai pă lu mơnuih, pha brơi gơñu kong ngăn lu mơ̆n; bơ kơ kơnŭng djuai pă ƀiă mơnuih, pha brơi kong ngăn ƀơƀiă mơ̆n. Rĭm čô mơnuih mă tŭ črăn ñu pô tui hăng tơlơi mă črăm. Ƀing gih pơpha lŏn tui hluai hăng kơnŭng djuai ơi adon ƀing gih.#Yap 26:54-56. 55Samơ̆ tơdah ƀing gih ƀu puh pơđuaĭ abih ană plei dŏ amăng lŏn čar anŭn, jing ƀing ană plei pla ƀing gih pioh glaĭ, gơñu či jing kar hăng ƀruih amăng mơta laih anŭn kar hăng drơi ƀơi djeo ƀing gih. Ƀing gơñu či pơrŭng ƀing gih amăng lŏn ƀing gih dŏ. 56Tui anŭn, Kâo či ngă ƀing gih kar hăng Kâo pơmĭn kiăng ngă kơ ƀing gơñu mơ̆n.’”
Currently Selected:
Tơlơi Yap 33: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
