Tơlơi Yap 31
31
Tơlơi Rŭ Nua hăng Ană Plei Pla Madian
1Yêhôwa laĭ kơ Môis: 2“Rŭ nua bĕ kơ ƀing Madian yua kơ ană plei pla Israel, giơ̆ng anŭn ih či wơ̆t glaĭ hăng ơi adon ih.” 3Tui anŭn Môis laĭ hăng ană plei pla Israel tui anai: “Prăp pre bĕ ƀing tơhan ƀing gih kiăng kơsung blah ƀing Madian laih anŭn rŭ nua ană plei pla anŭn kơ Yêhôwa. 4Rĭm kơnŭng djuai Israel khŏm ruah sa rơbâo čô tơhan nao pơ tơdrŏn pơblah.”
5Tui anŭn amăng rĭm kơnŭng djuai Israel, arăng ruah sa rơbâo čô tơhan laih anŭn hmâo pluh dua rơbâo čô mơnuih dưi prăp rơmet gơnam pơblah kiăng nao pơ tơdrŏn pơblah. 6Môis pơkiaŏ pluh dua rơbâo čô mơnuih anŭn nao pơ tơdrŏn blah anŭn jing pơkiaŏ rĭm kơnŭng djuai sa rơbâo čô mơnuih, wơ̆t hăng Phinêas ană đah rơkơi khua ngă yang Êlêasar, djă ba khul gơnam pơblah rơgoh laih anŭn tơdiăp pơtrŭt ƀing tơhan. 7Gơñu pơblah hăng ƀing Madian kar hăng Yêhôwa hmâo pơtă laih kơ Môis laih anŭn gơñu pơdjai hĭ abih bang ƀing đah rơkơi. 8Amăng mrô ƀing mơnuih arăng pơdjai hmâo rơma čô pơtao Madian anŭn jing: Êwi, Rêkem, Sur, Hur laih anŭn Rêba. Gơñu ăt yua hăng đao gưm pơdjai Balaam ană đah rơkơi Bêor. 9Ană plei pla Israel mă đah kơmơi laih anŭn čơđai Madian ngă mơnă, laih anŭn mă abih hlô mơnơ̆ng, khul triu hăng gơnam ƀing gơñu. 10Gơñu čuh abih bang plei prŏng amăng ƀing Madian dŏ laih anŭn anih jưh gơñu, 11giơ̆ng anŭn mă abih bang dram gơnam, plah mă mơnơ̆ng mơnuă, wơ̆t mơnuih laih anŭn hlô mơnơ̆ng. 12Gơñu djă ba ƀing mơnă laih anŭn hơdôm dram gơnam gơñu hmâo plah mă ba nao ƀơi anăp Môis, khua ngă yang Êlêasar laih anŭn phung Israel hlăk dŏ ngă anih jưh amăng lŏn daŏ Môap, giăm ia krong Yurdan pơklă anăp hăng Yêrikô.
13Hlăk anŭn Môis, khua ngă yang Êlêasar laih anŭn abih bang ƀing gĭt gai nao gah rơngiao anih jưh kiăng bưp gơñu. 14Môis hil kơ ƀing khua gĭt gai ƀing tơhan phrâo mơ̆ng tơdrŏn pơblah, anŭn jing ƀing khua gĭt gai sa rơbâo čô tơhan laih anŭn khua gĭt gai sa rơtuh čô tơhan. 15Môis laĭ hăng gơñu: “Yua hơgĕt ƀing gih pioh glaĭ ƀing đah kơmơi dŏ hơdip lĕ? 16Ƀing đah kơmơi anai jing tơlơi mơneč kơ Balaam kiăng plư ană plei pla Israel kơkuh pơpŭ yang Pêôr, gih ngă soh prŏng hăng Yêhôwa laih anŭn ngă kơ ană plei pla Yêhôwa khŏm tŭ tơlơi răm ruă.#Yap 25:1-9. 17Ră anai, brơi ƀing gih pơdjai hĭ ƀing čơđai đah rơkơi laih anŭn ƀing đah kơmơi pă hmâo đih hrŏm hăng đah rơkơi, 18samơ̆ pioh glaĭ abih bang ƀing đah kơmơi dra aka đih hrŏm hăng đah rơkơi ôh. 19Bơ gah kơ ƀing gih, dŏ bĕ gah rơngiao kơ anih jưh amăng tơjuh hrơi. Hlơi pơdjai mơnuih ƀôdah tĕk djơ̆ drơi jan djai, pô anŭn khŏm pơrơgoh ñu pô amăng hrơi tal klâo laih anŭn hrơi tal tơjuh. 20Ăt khŏm pơrơgoh abih bang sum ao, hơdôm gơnam hăng klĭ, hơdôm gơnam hăng blâu bơbe laih anŭn gơnam tam hăng kơyâo.”
21Khua ngă yang Êlêasar laĭ hăng ƀing tơhan nao pơ tơdrŏn blah tui anai: “Anai jing tơlơi pơkă kơ tơlơi juăt Yêhôwa hmâo pơtă kơ Môis: 22Mah, prăk, kong, pơsơi, thao, lêk, 23anŭn jing gơnam dưi tŭ apui, ƀing gih či brơi abih bang gơnam anŭn găn mơ̆ng apui kiăng dưi jing rơgoh. Samơ̆, ăt khŏm yua hăng ia pơrơgoh kiăng kơ pơrơgoh brơi gơnam anŭn dơ̆ng. Bơ kơ gơnam pă ƀu dưi tŭ ôh apui, ƀing gih khŏm brơi gơñu găn mơ̆ng ia pơrơgoh. 24Amăng hrơi tal tơjuh, ƀing gih khŏm boh sum ao ƀing gih pô kơ rơgoh amơĭ kah dưi mŭt amăng anih jưh.”
25Yêhôwa laĭ kơ Môis: 26“Ih hăng khua ngă yang Êlêasar hrŏm hăng ƀing khua akŏ ană plei pla, yap bĕ hơdôm abih bang mơnuih hăng hlô mơnơ̆ng ƀing gih hmâo plah mă, wơ̆t mơnuih hăng hlô mơnơ̆ng, 27laih anŭn pơpha dua črăn gơnam plah mă anŭn brơi kơ ƀing tơhan laih anŭn abih bang ană plei pla. 28Amăng črăn lơ̆m kơ ƀing tơhan hmâo nao tơdrŏn pơblah, ƀôdah mơnuih ƀôdah rơmo ƀôdah aseh kle ƀôdah triu, ih khŏm mă sa črăn amăng rơma rơtuh ba pơyơr kơ Yêhôwa. 29Mă bĕ sa črăn pơyơr anŭn amăng sa mơkrah lơ̆m ƀing tơhan jao kơ khua ngă yang Êlêasar, ngă yang pơyơr đĭ kơ Yêhôwa. 30Bơ kơ sa amăng mơkrah lơ̆m kơ ană plei pla Israel, ih khŏm mă sa črăn amăng rơma pluh mơ̆ng: Mơnuih ƀôdah rơmo ƀôdah aseh kle ƀôdah triu, anŭn jing abih bang hlô mơnơ̆ng, laih anŭn jao brơi kơ ƀing Lêwi, jing mơnuih hmâo bruă jao wai lăng Sang Khăn Yêhôwa.”
31Môis hăng khua ngă yang Êlêasar ngă djơ̆ tui hăng Yêhôwa hmâo pơtă laih kơ Môis.
32Dram gơnam plah mă dŏ glaĭ kơ ƀing tơhan hmâo plah mă jing năm rơtuh tơjuh pluh rơma rơbâo drơi triu; 33tơjuh pluh dua rơbâo drơi rơmo, 34năm pluh sa rơbâo drơi aseh kle tơno, 35laih anŭn klâo pluh dua rơbâo dra hmŭm.
36Amăng sa mơkrah lơ̆m kơ ƀing mơnuih nao pơ tơdrŏn pơblah jing klâo rơtuh klâo pluh tơjuh rơbâo rơma rơtuh drơi triu, 37pơyơr kơ Yêhôwa mơ̆ng mơnơ̆ng anai jing năm rơtuh tơjuh pluh rơma drơi; 38klâo pluh năm rơbâo drơi rơmo, pơyơr kơ Yêhôwa jing tơjuh pluh dua rơbâo drơi; 39klâo pluh rơbâo rơma rơtuh aseh kle tơno, pơyơr kơ Yêhôwa jing năm pluh sa drơi; 40pluh năm rơbâo čô mơnuih, pơyơr kơ Yêhôwa jing klâo pluh dua čô mơnuih. 41Môis jao brơi khua ngă yang Êlêasar jing črăn pơyơr ngă yang pơyơr kơ Yêhôwa djơ̆ tui hăng Ñu hmâo pơtă kơ Môis.
42Sa mơkrah anŭn lơ̆m kơ ană plei pla Israel, anŭn jing sa mơkrah Môis hmâo pơpha hăng ƀing mơnuih nao pơ tơdrŏn blah. 43Sa mơkrah anai lơ̆m kơ ană plei pla, hmâo: klâo rơtuh klâo pluh tơjuh rơbâo rơma rơtuh drơi triu, 44klâo pluh năm rơbâo drơi rơmo, 45klâo pluh rơbâo rơma rơtuh drơi aseh kle, 46laih anŭn pluh năm rơbâo čô mơnuih. 47Amăng sa mơkrah anai lơ̆m kơ ană plei pla Israel, Môis mă sa črăn amăng rơma pluh mơ̆ng mơnuih ƀôdah hlô mơnơ̆ng laih anŭn jao brơi kơ ƀing Lêwi, jing ƀing mơnuih hmâo jao bruă wai lăng Sang Khăn kơ Yêhôwa tui hăng Yêhôwa hmâo pơtă laih kơ ñu.
48Hơdôm ƀing gĭt gai anŭn jing khua gĭt gai kơ sa rơbâo tơhan laih anŭn khua gĭt gai kơ sa rơtuh tơhan nao giăm Môis, 49laih anŭn laĭ: “Ƀing ding kơna ih hmâo yap laih ƀing tơhan jing ƀing mơnuih dŏ gah yŭ kơ tơlơi dưi ƀing gơmơi laih anŭn ƀu hmâo rơngiă sa čô hlơi hlơi ôh. 50Rĭm čô amăng ƀing gơmơi hmâo ba mơnơ̆ng ngă yang hăng mah hmâo plah mă laih kar hăng añŭ tơkuai, kong tơngan, rơbưn, buai tơngia laih anŭn kong hơpăl, pơyơr đĭ kơ Yêhôwa kiăng song mă tơlơi soh ƀing gơmơi ƀơi anăp Ñu.” 51Môis laih anŭn khua ngă yang Êlêasar mă tŭ mơ̆ng ƀing gơñu, anŭn jing abih bang hơdôm gơnam pơhrôp hăng mah. 52Abih bang mah mơ̆ng ƀing khua gĭt gai kơ sa rơbâo tơhan laih anŭn khua gĭt gai kơ sa rơtuh tơhan pơyơr đĭ kơ Yêhôwa, yap abih bang kơtraŏ sa rơtuh dua rơpăn pluh kilôgram. 53Rĭm čô tơhan nao pơ tơdrŏn pơblah leng kơ mă tŭ gơnam plah mă kơ gơñu pô. 54Tui anŭn Môis hăng khua ngă yang Êlêasar mă tŭ mah kơ ƀing khua gĭt gai sa rơbâo tơhan laih anŭn khua gĭt gai sa rơtuh tơhan, giơ̆ng anŭn ba mŭt amăng Sang Khăn Pơƀŭt ngă tơlơi pơhơdơr kơ ană plei pla Israel ƀơi anăp Yêhôwa.
Currently Selected:
Tơlơi Yap 31: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
