Tơlơi Yap 29
29
Phĕt Ayŭp Tơdiăp
1Amăng hrơi tal sa blan tơjuh, ƀing gih či hmâo tơlơi pơƀŭt rơgoh hiam laih anŭn ƀu dưi ngă sa mơta bruă hơgĕt gĕt ôh. Anŭn jing sa hrơi kiăng ƀing gih ayŭp tơdiăp. 2Ƀing gih khŏm pơyơr sa drơi rơmo tơno tơdăm, sa drơi triu tơno laih anŭn tơjuh drơi ană triu tơno sa thŭn ƀu hmâo rơka rơkeñ ôh kiăng ngă yang čuh hmâo mơnâo ƀâu hiam bơmơak kơ Yêhôwa. 3Khŏm pơyơr hrŏm hơbĭt hăng mơnơ̆ng ngă yang hăng braih pơdai anŭn jing tơpŭng ƀlĭ lŭk hăng ia rơmuă ôliwơ: klâo kilôgram brơi kơ rơmo tơno, dua kilôgram brơi kơ triu tơno, 4Sa kilôgram brơi kơ rĭm drơi amăng tơjuh drơi ană triu anŭn; 5laih anŭn khŏm pơyơr sa drơi bơbe tơno ngă yang song mă tơlơi soh kơ ƀing gih. 6Ƀing gih khŏm pơyơr khul mơnơ̆ng ngă yang anai rơngiao kơ mơnơ̆ng ngă yang čuh rĭm akŏ blan nao hrŏm hơbĭt hăng tơlơi ngă yang hăng braih pơdai, tơlơi ngă yang čuh pơyơr nanao nao hrŏm hơbĭt hăng tơlơi ngă yang hăng braih pơdai laih anŭn tơlơi ngă yang tuh ia tơpai tui hăng tơlơi hmâo pơkă. Khul tơlơi ngă yang anai khŏm yua hăng apui kiăng pơyơr đĭ hmâo mơnâo ƀâu hiam bơmơak kơ Yêhôwa.
Hrơi Song Mă Tơlơi Soh
7Amăng hrơi tal pluh blan tơjuh anai, ƀing gih či hmâo tơlơi pơƀŭt rơgoh hiam, ƀing gih khŏm hơngah hĭ gih pô laih anŭn ƀu dưi ngă sa mơta bruă hơgĕt gĕt ôh.#Lêwi 16:29-34. 8Ƀing gih khŏm pơyơr sa drơi rơmo tơno tơdăm, sa drơi triu tơno laih anŭn tơjuh drơi ană triu tơno sa thŭn ƀu hmâo rơka rơkeñ ôh kiăng ngă yang čuh hmâo mơnâo ƀâu hiam bơmơak kơ Yêhôwa. 9Khŏm pơyơr hrŏm hơbĭt hăng mơnơ̆ng ngă yang hăng braih pơdai anŭn jing tơpŭng ƀlĭ lŭk hăng ia rơmuă ôliwơ: klâo kilôgram brơi kơ rơmo tơno, dua kilôgram brơi kơ triu tơno, 10laih anŭn sa kilôgram brơi rĭm drơi amăng tơjuh drơi ană triu anŭn. 11Ƀing gih ăt pơyơr mơ̆n sa drơi bơbe tơno ngă yang song mă tơlơi soh rơngiao kơ tơlơi ngă yang amăng Hrơi Song Mă Tơlơi Soh, tơlơi ngă yang čuh pơyơr nanao, tơlơi ngă yang hăng braih pơdai laih anŭn tơlơi ngă yang tuh ia tơpai.
Phĕt Sang Khăn
12Amăng hrơi tal pluh rơma blan tơjuh, ƀing gih či hmâo tơlơi pơƀŭt rơgoh hiam. Ƀu dưi ngă sa mơta bruă hơgĕt gĕt ôh, samơ̆ ƀing gih khŏm djă pioh sa tơlơi phĕt brơi kơ Yêhôwa amăng tơjuh hrơi.#Lêwi 23:34; Mơñă 16:13-15. 13Ƀing gih khŏm pơyơr pluh klâo drơi rơmo tơno tơdăm, dua drơi triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh kiăng ngă yang čuh, anŭn jing tơlơi ngă yang yua hăng apui pơyơr đĭ hmâo mơnâo ƀâu hiam ngă bơmơak kơ Yêhôwa. 14Khŏm pơyơr hrŏm hơbĭt hăng mơnơ̆ng ngă yang hăng braih pơdai anŭn jing tơpŭng ƀlĭ lŭk hăng ia rơmuă ôliwơ: klâo kilôgram brơi kơ rơmo tơno, dua kilôgram brơi kơ triu tơno 15laih anŭn sa kilôgram brơi kơ rĭm drơi amăng pluh pă drơi ană triu anŭn. 16Ƀing gih ăt khŏm pơyơr sa drơi bơbe tơno ngă yang song mă tơlơi soh rơngiao kơ tơlơi ngă yang čuh pơyơr nanao, tơlơi ngă yang hăng braih pơdai laih anŭn tơlơi ngă yang tuh ia tơpai.
17“Amăng hrơi tal dua, ƀing gih khŏm pơyơr pluh dua drơi rơmo tơno tơdăm, dua drơi triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh. 18Khŏm pơyơr mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hơbĭt hăng khul rơmo tơno, triu tơno laih anŭn ană triu tui hăng mrô hmâo pơkă laih. 19Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ tơlơi ngă yang čuh pơyơr nanao laih anŭn tơlơi ngă yang tuh ia tơpai.
20Amăng hrơi tal klâo, ƀing gih khŏm pơyơr pluh sa drơi rơmo tơno, dua drơi ană triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh. 21Khŏm pơyơr bĕ tơlơi ngă yang braih pơdai laih anŭn khul mơnơ̆ng ngă yang tuh ia tơpai hrŏm hơbĭt hăng khul rơmo tơno, triu tơno laih anŭn ană triu tui hăng mrô hmâo pơkă laih. 22Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng yang tuh ia tơpai.
23Amăng hrơi tal pă, ƀing gih khŏm pơyơr pluh drơi rơmo tơno, dua drơi triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh. 24Khŏm pơyơr bĕ mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hăng khul rơmo tơno, triu tơno laih anŭn ană triu tui hăng mrô hmâo pơkă laih. 25Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng ngă yang tuh ia tơpai.
26Amăng hrơi tal rơma, ƀing gih khŏm pơyơr dua rơpăn drơi rơmo tơno, dua drơi triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh. 27Khŏm pơyơr bĕ mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hăng khul rơmo tơno, triu tơno laih anŭn ană triu tui hăng mrô hmâo pơkă laih. 28Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng ngă yang tuh ia tơpai.
29Amăng hrơi tal năm, ƀing gih khŏm pơyơr sapăn drơi rơmo tơno, dua drơi triu tơno laih anŭn pluh pă drơi ană triu tơno truh sa thŭn ƀu hmâo rơka rơkeñ ôh. 30Pơyơr bĕ mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hăng khul rơmo tơno, triu tơno laih anŭn ană triu tui hăng mrô hmâo pơkă laih. 31Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng ngă yang tuh ia tơpai.
32Amăng hrơi tal tơjuh, ƀing gih khŏm pơyơr tơjuh drơi rơmo tơno, dua drơi triu tơno laih anŭn pluh pă drơi ană triu tơno sa thŭn ƀu hmâo rơka rơkeñ ôh. 33Khŏm pơyơr bĕ mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hăng khul rơmo tơno, triu tơno laih anŭn ană triu tui hăng mrô hmâo pơkă laih. 34Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng ngă yang tuh ia tơpai.
35Amăng hrơi tal sapăn, ƀing gih khŏm hmâo tơlơi pơƀŭt glaĭ hăng tơlơi pơpŭ laih anŭn ƀu dưi ngă sa mơta bruă hơgĕt gĕt ôh. 36Ƀing gih khŏm pơyơr bĕ sa drơi rơmo tơno, sa drơi triu tơno laih anŭn tơjuh drơi ană triu tơno sa thŭn ƀu hmâo rơka rơkeñ ngă yang čuh, anŭn jing mơnơ̆ng ngă yang yua hăng apui pơyơr đĭ hmâo mơnâo ƀâu hiam bơmơak kơ Yêhôwa. 37Ăt pơyơr mơ̆n mơnơ̆ng ngă yang hăng braih pơdai laih anŭn khul mơnơ̆ng ngă yang tuh ia tơpai hrŏm hăng khul rơmo tơno, triu tơno laih anŭn ană triu tui hăng mrô hmâo pơkă laih. 38Ƀing gih ăt khŏm pơyơr mơ̆n sa drơi bơbe tơno ngă yang song mă tơlơi soh rơngiao kơ mơnơ̆ng ngă yang čuh pơyơr nanao, mơnơ̆ng ngă yang hăng braih pơdai laih anŭn mơnơ̆ng ngă yang tuh ia tơpai.
39Anŭn jing hơdôm mơnơ̆ng ngă yang ƀing gih khŏm pơyơr kơ Yêhôwa amăng khul hrơi phĕt prŏng kiăng ngă yang čuh, mơnơ̆ng ngă yang hăng braih pơdai, mơnơ̆ng ngă yang tuh ia tơpai laih anŭn mơnơ̆ng ngă yang rơnŭk rơnua, rơngiao kơ khul mơnơ̆ng ngă yang ƀuăn rơ̆ng laih anŭn khul mơnơ̆ng ngă yang čŏng čiăng kơ ƀing gih.”
Currently Selected:
Tơlơi Yap 29: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
