Tơlơi Yap 23
23
Tơlơi Balaam Laĭ Lui Hlâo Tal Sa
1Balaam pơhiăp hăng Balak: “Pơdơ̆ng brơi kâo bĕ ƀơi anai tơjuh boh kơƀang ngă yang hăng prăp rơmet brơi kâo tơjuh drơi rơmo tơno laih anŭn tơjuh drơi triu tơno.” 2Balak ngă tui Balaam hmâo laĭ: Balak hăng Balaam pơyơr sa drơi rơmo tơno hăng sa drơi triu tơno rĭm ƀơi kơƀang ngă yang. 3Balaam pơhiăp hăng Balak: “Brơi ih dŏ jĕ mơnơ̆ng ngă yang kơ ih pô, bơ kâo či đuaĭ nao. Năng ai Yêhôwa či pơrơđah rai hăng kâo laih anŭn kâo či ruai glaĭ kơ ih hơgĕt tơlơi Ñu brơi kâo ƀuh.” Giơ̆ng anŭn, ñu đĭ nao sa boh kơdư.
4Ơi Adai pơrơđah kơ Balaam. Balaam laĭ hăng Ñu: “Kâo hmâo pơdơ̆ng laih tơjuh boh kơƀang ngă yang laih anŭn rĭm ƀơi kơƀang ngă yang, kâo hmâo pơyơr sa drơi rơmo tơno laih sa drơi triu tơno.” 5Yêhôwa dưm boh pơhiăp ƀơi amăng bah Balaam hăng laĭ: “Wơ̆t glaĭ pơ Balak bĕ laih anŭn pơhiăp hăng ñu boh hiăp anai.” 6Balaam wơ̆t glaĭ pơ Balak, ƀuh gơ̆ hăng ƀing khua pơtao Môap dŏ dơ̆ng jĕ ƀơi mơnơ̆ng ngă yang čuh kơ pơtao. 7Balaam pơhiăp laĭ lui hlâo tui anai:
“Balak, pơtao Môap ba kâo đuaĭ mơ̆ng čar Aram,
Mơ̆ng kơdư čư̆ gah ngŏ hăng laĭ:
‘Rai bĕ hơtơ̆m pah Yakôp brơi kơ kâo!
Rai bĕ phong kơ ƀing Israel!’
8Hyư̆m kâo dưi hơtơ̆m pah kơ ƀing Ơi Adai ƀu hơtơ̆m pah lĕ?
Hyư̆m kâo dưi phong kơ ƀing Yêhôwa ƀu phong lĕ?
9Yua kơ mơ̆ng akŏ čư̆ kâo ƀuh ƀing Israel,
Mơ̆ng čŏng čư̆ glong, kâo lăng ƀuh gơñu:
Anŭn jing ană plei pla hơdip kah pioh brơi kơ Ơi Adai,
Laih anŭn ƀu pơgop hăng ƀing kơnŭng djuai pơkŏn ôh.
10Hlơi dưi yap asar čuah kơ Yakôp?
Hlơi dưi tĭng kơnơ̆ng sa črăn amăng pă kơ Israel?
Brơi kâo dưi djai kar hăng tơlơi djai ƀing tơpă hơnơ̆ng;
Brơi tơlơi hnal tuč kâo kar hăng tơlơi hnal tuč gơñu!”
11Hlăk anŭn, Balak pơhiăp hăng Balaam: “Ih hmâo ngă hơgĕt kơ kâo tui anŭn? Kâo rơkâo kơ ih hơtơ̆m pah ƀing pơkơdơ̆ng hăng kâo, samơ̆ pŭng ih hơơč mơyun hiam brơi gơñu!” 12Balaam laĭ glaĭ: “Kâo ƀu či răng ôh hă kiăng pơhiăp hơgĕt tơlơi Yêhôwa hmâo dưm laih ƀơi amăng bah kâo?”
Tơlơi Balaam Laĭ Lui Hlâo Tal Dua
13Balak pơhiăp hăng Balaam: “Nao hrŏm hăng kâo bĕ pơ anih pơkŏn, jing anih ih či ƀuh ană plei pla anai. Ih či ƀuh kơnơ̆ng sa mơkrah đôč samơ̆ ƀu ƀuh abih bang ôh. Ƀơi anŭn, brơi ih hơtơ̆m pah gơñu brơi kơ kâo.” 14Tui anŭn ñu ba Balaam truh pơ anih đang hmua Sôphim, ƀơi akŏ čư̆ Pisga, pơ anŭn ñu pơkra tơjuh boh kơƀang ngă yang, ƀơi rĭm kơƀang ngă yang pơyơr sa drơi rơmo tơno laih anŭn sa drơi triu tơno. 15Balaam pơhiăp hăng Balak: “Rơkâo kơ ih dŏ dơ̆ng pơ anai, jĕ mơnơ̆ng ngă yang čuh kơ ih, bơ kâo či nao bưp Yêhôwa pơ anŭn.”
16Yêhôwa pơrơđah rai kơ Balaam laih anŭn dưm tơlơi pơhiăp ƀơi amăng bah ñu hăng laĭ: “Wơ̆t glaĭ bĕ pơ Balak laih anŭn pơhiăp hăng ñu boh hiăp anai.” 17Balaam wơ̆t glaĭ pơ Balak, ƀuh gơ̆ hăng ƀing khua Môap dŏ jĕ ƀơi mơnơ̆ng ngă yang čuh mơ̆ng pơtao. Balak tơña: “Yêhôwa hmâo pơhiăp tơlơi hơgĕt lĕ?” 18Balaam pơhiăp laĭ lui hlâo tui anai:
“Ơ Balak, tơgŭ dơ̆ng hăng hmư̆ bĕ!
Ơ ană đah rơkơi Sipôr, pơđing tơngia bĕ!
19Ơi Adai ƀu djơ̆ jing mơnuih pơhiăp ƀlor ôh,
Ăt kŏn djơ̆ lơi jing djuai mơnuih pơblih tơlơi pơmĭn.
Tơlơi Ñu hmâo pơhiăp, Ñu ƀu dưi ngă ôh hă?
Boh pơhiăp Ñu hmâo ƀuăn laih, Ñu ƀu pơgiơ̆ng ôh hă?
20Anai nê, kâo hmâo mă tŭ tơlơi pơtă hơơč mơyun;
Ñu hmâo tuh mơyun laih, kâo ƀu dưi pơplih ôh.
21Ñu ƀu ƀuh ôh tơlơi gleh amăng ƀing Yakôp
Ăt kŏn ƀuh lơi tơlơi tơnap tap amăng Israel.
Yêhôwa Ơi Adai kơ gơñu dŏ hrŏm hăng gơñu,
Amăng Israel hmâo asăp ur driao hơ̆k mơak kơ pơtao.
22Ơi Adai hmâo ba ană plei pla Israel đuaĭ mơ̆ng čar Êjip;
Gơñu hmâo pran kơtang kar hăng rơmo glai.
23Ƀu hmâo pơjâu pơnăn ƀơi Yakôp ôh,
Ăt kŏn hmâo lơi pơjâu mơdian amăng Israel.
Yua kơ hlăk anai arăng či pơhiăp kơ Yakôp laih anŭn Israel tui anai:
‘Ơi Adai hmâo ngă khul bruă yom pơphan!’
24Lăng adih sa phung ană plei pla tơgŭ đĭ kar hăng rơmông dŭl ania,
Laih anŭn gơñu tơgŭ kar hăng rơmông dŭl tơno;
Ñu ƀu pơdơi ôh tơl ñu hmâo ƀơ̆ng añăm hlô mơnơ̆ng
Laih anŭn mơñum drah khul hlô ñu hmâo mă laih.”
25Hlăk anŭn, Balak pơhiăp hăng Balaam: “Anăm hơtơ̆m pah gơñu ôh, samơ̆ kŏn hơơč mơyun kơ gơñu lơi.” 26Balaam laĭ glaĭ Balak: “Kâo ƀu hmâo laĭ kơ ih ôh hă, kâo khŏm ngă tui tơlơi hơgĕt Yêhôwa pơtă?”
27Balak laĭ glaĭ Balaam: “Rai pơ anai bĕ, kâo či atăt ƀing gih nao truh pơ anih pơkŏn. Năng ai Ơi Adai či mơak kơ ih hơtơ̆m pah ană plei pla pơ anŭn mơ̆n thâo.” 28Balak ba Balaam đĭ nao pơ akŏ čư̆ Pêôr, pơklă anăp hăng tơdrŏn har. 29Balaam pơhiăp hăng Balak: “Pơkra brơi kâo tơjuh boh kơƀang ngă yang pơ anai laih anŭn prăp rơmet tơjuh drơi rơmo tơno laih anŭn tơjuh drơi triu tơno.” 30Tui anŭn, Balak ngă tui boh pơhiăp Balaam hmâo pơhiăp. Gơ̆ pơyơr sa drơi rơmo tơno laih anŭn sa drơi triu tơno ngă mơnơ̆ng ngă yang čuh ƀơi rĭm kơƀang ngă yang.
Currently Selected:
Tơlơi Yap 23: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
Tơlơi Yap 23
23
Tơlơi Balaam Laĭ Lui Hlâo Tal Sa
1Balaam pơhiăp hăng Balak: “Pơdơ̆ng brơi kâo bĕ ƀơi anai tơjuh boh kơƀang ngă yang hăng prăp rơmet brơi kâo tơjuh drơi rơmo tơno laih anŭn tơjuh drơi triu tơno.” 2Balak ngă tui Balaam hmâo laĭ: Balak hăng Balaam pơyơr sa drơi rơmo tơno hăng sa drơi triu tơno rĭm ƀơi kơƀang ngă yang. 3Balaam pơhiăp hăng Balak: “Brơi ih dŏ jĕ mơnơ̆ng ngă yang kơ ih pô, bơ kâo či đuaĭ nao. Năng ai Yêhôwa či pơrơđah rai hăng kâo laih anŭn kâo či ruai glaĭ kơ ih hơgĕt tơlơi Ñu brơi kâo ƀuh.” Giơ̆ng anŭn, ñu đĭ nao sa boh kơdư.
4Ơi Adai pơrơđah kơ Balaam. Balaam laĭ hăng Ñu: “Kâo hmâo pơdơ̆ng laih tơjuh boh kơƀang ngă yang laih anŭn rĭm ƀơi kơƀang ngă yang, kâo hmâo pơyơr sa drơi rơmo tơno laih sa drơi triu tơno.” 5Yêhôwa dưm boh pơhiăp ƀơi amăng bah Balaam hăng laĭ: “Wơ̆t glaĭ pơ Balak bĕ laih anŭn pơhiăp hăng ñu boh hiăp anai.” 6Balaam wơ̆t glaĭ pơ Balak, ƀuh gơ̆ hăng ƀing khua pơtao Môap dŏ dơ̆ng jĕ ƀơi mơnơ̆ng ngă yang čuh kơ pơtao. 7Balaam pơhiăp laĭ lui hlâo tui anai:
“Balak, pơtao Môap ba kâo đuaĭ mơ̆ng čar Aram,
Mơ̆ng kơdư čư̆ gah ngŏ hăng laĭ:
‘Rai bĕ hơtơ̆m pah Yakôp brơi kơ kâo!
Rai bĕ phong kơ ƀing Israel!’
8Hyư̆m kâo dưi hơtơ̆m pah kơ ƀing Ơi Adai ƀu hơtơ̆m pah lĕ?
Hyư̆m kâo dưi phong kơ ƀing Yêhôwa ƀu phong lĕ?
9Yua kơ mơ̆ng akŏ čư̆ kâo ƀuh ƀing Israel,
Mơ̆ng čŏng čư̆ glong, kâo lăng ƀuh gơñu:
Anŭn jing ană plei pla hơdip kah pioh brơi kơ Ơi Adai,
Laih anŭn ƀu pơgop hăng ƀing kơnŭng djuai pơkŏn ôh.
10Hlơi dưi yap asar čuah kơ Yakôp?
Hlơi dưi tĭng kơnơ̆ng sa črăn amăng pă kơ Israel?
Brơi kâo dưi djai kar hăng tơlơi djai ƀing tơpă hơnơ̆ng;
Brơi tơlơi hnal tuč kâo kar hăng tơlơi hnal tuč gơñu!”
11Hlăk anŭn, Balak pơhiăp hăng Balaam: “Ih hmâo ngă hơgĕt kơ kâo tui anŭn? Kâo rơkâo kơ ih hơtơ̆m pah ƀing pơkơdơ̆ng hăng kâo, samơ̆ pŭng ih hơơč mơyun hiam brơi gơñu!” 12Balaam laĭ glaĭ: “Kâo ƀu či răng ôh hă kiăng pơhiăp hơgĕt tơlơi Yêhôwa hmâo dưm laih ƀơi amăng bah kâo?”
Tơlơi Balaam Laĭ Lui Hlâo Tal Dua
13Balak pơhiăp hăng Balaam: “Nao hrŏm hăng kâo bĕ pơ anih pơkŏn, jing anih ih či ƀuh ană plei pla anai. Ih či ƀuh kơnơ̆ng sa mơkrah đôč samơ̆ ƀu ƀuh abih bang ôh. Ƀơi anŭn, brơi ih hơtơ̆m pah gơñu brơi kơ kâo.” 14Tui anŭn ñu ba Balaam truh pơ anih đang hmua Sôphim, ƀơi akŏ čư̆ Pisga, pơ anŭn ñu pơkra tơjuh boh kơƀang ngă yang, ƀơi rĭm kơƀang ngă yang pơyơr sa drơi rơmo tơno laih anŭn sa drơi triu tơno. 15Balaam pơhiăp hăng Balak: “Rơkâo kơ ih dŏ dơ̆ng pơ anai, jĕ mơnơ̆ng ngă yang čuh kơ ih, bơ kâo či nao bưp Yêhôwa pơ anŭn.”
16Yêhôwa pơrơđah rai kơ Balaam laih anŭn dưm tơlơi pơhiăp ƀơi amăng bah ñu hăng laĭ: “Wơ̆t glaĭ bĕ pơ Balak laih anŭn pơhiăp hăng ñu boh hiăp anai.” 17Balaam wơ̆t glaĭ pơ Balak, ƀuh gơ̆ hăng ƀing khua Môap dŏ jĕ ƀơi mơnơ̆ng ngă yang čuh mơ̆ng pơtao. Balak tơña: “Yêhôwa hmâo pơhiăp tơlơi hơgĕt lĕ?” 18Balaam pơhiăp laĭ lui hlâo tui anai:
“Ơ Balak, tơgŭ dơ̆ng hăng hmư̆ bĕ!
Ơ ană đah rơkơi Sipôr, pơđing tơngia bĕ!
19Ơi Adai ƀu djơ̆ jing mơnuih pơhiăp ƀlor ôh,
Ăt kŏn djơ̆ lơi jing djuai mơnuih pơblih tơlơi pơmĭn.
Tơlơi Ñu hmâo pơhiăp, Ñu ƀu dưi ngă ôh hă?
Boh pơhiăp Ñu hmâo ƀuăn laih, Ñu ƀu pơgiơ̆ng ôh hă?
20Anai nê, kâo hmâo mă tŭ tơlơi pơtă hơơč mơyun;
Ñu hmâo tuh mơyun laih, kâo ƀu dưi pơplih ôh.
21Ñu ƀu ƀuh ôh tơlơi gleh amăng ƀing Yakôp
Ăt kŏn ƀuh lơi tơlơi tơnap tap amăng Israel.
Yêhôwa Ơi Adai kơ gơñu dŏ hrŏm hăng gơñu,
Amăng Israel hmâo asăp ur driao hơ̆k mơak kơ pơtao.
22Ơi Adai hmâo ba ană plei pla Israel đuaĭ mơ̆ng čar Êjip;
Gơñu hmâo pran kơtang kar hăng rơmo glai.
23Ƀu hmâo pơjâu pơnăn ƀơi Yakôp ôh,
Ăt kŏn hmâo lơi pơjâu mơdian amăng Israel.
Yua kơ hlăk anai arăng či pơhiăp kơ Yakôp laih anŭn Israel tui anai:
‘Ơi Adai hmâo ngă khul bruă yom pơphan!’
24Lăng adih sa phung ană plei pla tơgŭ đĭ kar hăng rơmông dŭl ania,
Laih anŭn gơñu tơgŭ kar hăng rơmông dŭl tơno;
Ñu ƀu pơdơi ôh tơl ñu hmâo ƀơ̆ng añăm hlô mơnơ̆ng
Laih anŭn mơñum drah khul hlô ñu hmâo mă laih.”
25Hlăk anŭn, Balak pơhiăp hăng Balaam: “Anăm hơtơ̆m pah gơñu ôh, samơ̆ kŏn hơơč mơyun kơ gơñu lơi.” 26Balaam laĭ glaĭ Balak: “Kâo ƀu hmâo laĭ kơ ih ôh hă, kâo khŏm ngă tui tơlơi hơgĕt Yêhôwa pơtă?”
27Balak laĭ glaĭ Balaam: “Rai pơ anai bĕ, kâo či atăt ƀing gih nao truh pơ anih pơkŏn. Năng ai Ơi Adai či mơak kơ ih hơtơ̆m pah ană plei pla pơ anŭn mơ̆n thâo.” 28Balak ba Balaam đĭ nao pơ akŏ čư̆ Pêôr, pơklă anăp hăng tơdrŏn har. 29Balaam pơhiăp hăng Balak: “Pơkra brơi kâo tơjuh boh kơƀang ngă yang pơ anai laih anŭn prăp rơmet tơjuh drơi rơmo tơno laih anŭn tơjuh drơi triu tơno.” 30Tui anŭn, Balak ngă tui boh pơhiăp Balaam hmâo pơhiăp. Gơ̆ pơyơr sa drơi rơmo tơno laih anŭn sa drơi triu tơno ngă mơnơ̆ng ngă yang čuh ƀơi rĭm kơƀang ngă yang.
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.