Tơlơi Yap 22
22
Rơnŭk Hơdip Amăng Tơdrŏn Har Môap
(22:1 – 36:13)
Pơtao Balak hăng Balaam
1Giơ̆ng anŭn, ƀing Israel nao truh pơ tơdrŏn tač Môap hăng ngă anih jưh pơ anŭn, gah adih ia krong Yurdan, pơklă anăp hăng Yêrikô. 2Balak ană đah rơkơi Sipôr, ñu thâo rơđah hơdôm tơlơi ƀing Israel hmâo ngă laih kơ ƀing Amôrit. 3Ƀing Môap hwĭ bral kơ ƀing Israel yua kơ Israel lu biă mă. 4Tui anŭn ƀing Môap črŏng sai hăng ƀing kŏng tha Madian: “Ƀing mơnuih lu anai hlăk či lun hĭ abih bang ană plei pla jum dar ƀing ta kar hăng rơmo ƀơ̆ng rơ̆k amăng đang hmua.” Hlăk anŭn Balak ană đah rơkơi Sipôr ngă pơtao Môap. 5Pơtao pơkiaŏ ƀing mơnuih nao bưp Balaam ană đah rơkơi Bêor pơ Pêthôr, jĕ ia krong Ơphrat, čar ană tơčo Ammôn,#22:5 Dưi pơblang dơ̆ng mơ̆n: plei pla ñu pô. laih anŭn laĭ: “Anai nê, sa phung ană plei pla hmâo tơbiă laih mơ̆ng čar Êjip, dŏ djŏp djang lŏn laih anŭn hlăk ngă anih jưh pơklă anăp hăng kâo.#Yap 31:8; II Pê 2:15-16. 6Ră anai, ih nao bĕ hơtơ̆m pah ană plei pla anai yua kơ ñu kơtang hloh kơ kâo. Năng ai kâo či hmâo tơlơi dưi kơtang pơblah hĭ ană plei pla anai hăng puh pơđuaĭ ñu mơ̆ng lŏn čar anai yơh. Yua kơ kâo thâo kơ hlơi ih hơơč mơyun pô anŭn hmâo tơlơi mơyun, bơ kơ ƀing hlơi ih hơtơ̆m pah, pô anŭn mă tŭ tơlơi hơtơ̆m pah yơh.”
7Tui anŭn hơdôm ƀing kŏng tha Môap hăng ƀing kŏng tha Madian rơbat nao, djă ba gơnam pơyơr brơi kơ pô pơjâu anŭn. Gơñu bưp Balaam hăng ruai glaĭ kơ hơdôm boh pơhiăp Balak. 8Balaam laĭ glaĭ: “Dŏ glaĭ pơ anai amăng mlam anai bĕ laih anŭn kâo či laĭ glaĭ kơ ih tui hăng boh pơhiăp Yêhôwa či laĭ kơ kâo.” Tui anŭn, hơdôm ƀing khua lŏn čar Môap dŏ glaĭ pơ sang Balaam.
9Ơi Adai pơrơđah rai kơ Balaam hăng laĭ: “Ƀing hlơi hlăk dŏ amăng sang ih?” 10Balaam pơhiăp hăng Ơi Adai tui anai: “Balak ană đah rơkơi Sipôr, pơtao Môap hmâo pơkiaŏ ƀing gơñu rai pơ kâo hăng laĭ: 11‘Anai nê, sa phung ană plei pla hmâo tơbiă laih mơ̆ng čar Êjip laih anŭn dŏ pơ djŏp djang lŏn tơnah. Ră anai nao hơtơ̆m pah bĕ ană plei pla anŭn brơi kâo. Năng ai kâo či hmâo tơlơi kơtang dưi puh pơđuaĭ hĭ ană plei pla anŭn.’” 12Ơi Adai pơhiăp hăng Balaam: “Anăm nao hrŏm hăng gơñu ôh, ăt anăm hơtơ̆m pah ană plei pla anai lơi, yua kơ anŭn jing ană plei pla hmâo tơlơi hơơč mơyun laih.” 13Truh mơguah, Balaam tơgŭ mơ̆ng pĭt laih anŭn pơhiăp hăng abih ƀing khua mơ̆ng Balak: “Ƀing gih wơ̆t glaĭ pơ čar gih pô bĕ, yua kơ Yêhôwa ƀu brơi kâo nao hrŏm hăng ƀing gih ôh.” 14Tui anŭn, ƀing khua Môap wơ̆t glaĭ mơtam pơ Balak hăng laĭ: “Balaam ƀu kiăng nao hrŏm ƀing gơmơi ôh.”
15Balak pơkiaŏ sa tơpul khua lu hloh dơ̆ng laih anŭn pơpŭ pơyom hloh kơ ƀing hlâo dơ̆ng, 16nao bưp Balaam hăng laĭ: “Balak ană đah rơkơi Sipôr hmâo laĭ tui anai ‘Anăm brơi ôh tơlơi hơgĕt čơgăn hĭ ih rai pơ kâo, 17yua kơ kâo či apah bơni kơ ih laih anŭn ngă brơi ih hơgĕt tơlơi ih kiăng. Ih nao hơtơ̆m pah bĕ ană plei pla anai brơi kơ kâo.’” 18Balaam laĭ glaĭ kơ ƀing gơñu tui anai: “Wơ̆t dah pơtao Balak brơi kơ kâo sang pơtao ñu bă hăng prăk mah, kâo ăt ƀu dưi ngă hơgĕt gĕt ôh bruă anĕt ƀôdah bruă prŏng gao hĭ tơlơi pơtă pơtăn mơ̆ng Yêhôwa Ơi Adai kâo. 19Samơ̆ kâo rơkâo ƀing gih dŏ glaĭ bĕ amăng mlam anai kiăng kơ kâo thâo Yêhôwa či pơhiăp hăng kâo tơlơi hơgĕt dơ̆ng.” 20Amăng mlam, Ơi Adai pơrơđah rai kơ Balaam hăng laĭ tui anai: “Yua kơ ƀing anŭn rai jak iâu ih, hnŭn yơh ih khŏm nao hrŏm hăng gơñu, samơ̆ ih kơnơ̆ng ngă tui hơgĕt Kâo pơtă kơ ih.” 21Balaam tơgŭ mơguah, prăp pre aseh kle ania ñu hăng nao hrŏm hăng ƀing khua lŏn čar Môap.
22Samơ̆ Ơi Adai hil biă mă yua kơ ñu tơbiă nao, laih anŭn ling jang Yêhôwa dŏ dơ̆ng ƀơi jơlan khă găn ñu.#22:22 Boh hră phŭn: kar hăng pô pơkơdơ̆ng glaĭ hăng ñu. Hlăk anŭn, ñu hlăk đĭ aseh kle ania ñu pô laih anŭn hmâo dua čô ding kơna đuaĭ tui ñu. 23Tơdang aseh kle ania ƀuh ling jang Yêhôwa dŏ ƀơi jơlan djă sa ƀĕ đao ƀơi tơngan, aseh kle ania anŭn weh nao gah akiăng jơlan laih anŭn đuaĭ nao pơ hmua. Balaam taih ñu, kiăng ñu rơbat ƀơi jơlan. 24Giơ̆ng anŭn, ling jang Yêhôwa dŏ dơ̆ng ƀơi jơlan anĕt tơ̆ng krah đang boh kơƀâu, jing ƀơi jơlan hmâo pơnăng dua bơnah jơlan. 25Tơdang aseh kle ania ƀuh ling jang Yêhôwa, ñu čer nao ƀơi pơnăng laih anŭn kơtit tơkai Balaam, hnŭn yơh Balaam taih ñu dơ̆ng. 26Ling jing Yêhôwa nao ataih hloh hăng dŏ dơ̆ng ƀơi sa anih gơniă biă mă, ƀu thâo weh gah hơnuă ƀôdah gah iao ôh. 27Tơdang aseh kle ania ƀuh ling jang Yêhôwa ñu čon tơŭt mơtam; Balaam hil hăng mă gai taih aseh kle ania ñu. 28Hlăk anŭn, Yêhôwa pŏk amăng bah aseh kle ania laih anŭn ñu pơhiăp Balaam: “Kâo ƀu hmâo hơgĕt gĕt ôh, yua hơgĕt ih taih kâo klâo wơ̆t?” 29Balaam pơhiăp hăng aseh kle ania: “Yua kơ ŏng mưč mač kâo. Tơdah hmâo đao ƀơi tơngan kâo ră anai, kâo či pơdjai ŏng yơh!” 30Aseh kle ania pơhiăp hăng Balaam: “Ƀu djơ̆ ôh hă kâo jing aseh kle ania ih hmâo đĭ mơ̆ng hlâo truh pơ ră anai? Kâo hmâo juăt ngă kơ ih tui anai laih aka?” Balaam laĭ glaĭ: “Aka hmâo ôh.”
31Hlăk anŭn, Yêhôwa pŏk mơta Balaam laih anŭn ƀuh ling jang Yêhôwa dŏ tơ̆ng krah jơlan, tơngan djă đao. Tui anŭn, Balaam bon hăng kŭp ƀơi lŏn. 32Ling jang Yêhôwa tơña: “Yua hơgĕt ih taih aseh kle ania ih klâo wơ̆t? Anai nê, kâo nao kiăng čơgăn ih, yua kơ kâo ƀuh ih đuaĭ tui jơlan răm rai. 33Aseh kle ania ih hmâo ƀuh kâo hăng weh đuaĭ gah akiăng jơlan truh pơ klâo wơ̆t. Tơdah ñu ƀu weh đuaĭ mơ̆ng kâo, sĭt kâo hmâo pơdjai ih laih hăng brơi ñu hơdip.” 34Balaam pơhiăp hăng ling jang Yêhôwa tui anai: “Kâo hmâo ngă soh yua kơ kâo ƀu thâo ôh Ih dŏ dơ̆ng ƀơi jơlan čơgăn kâo. Ră anai, tơdah Ih ƀu brơi kâo nao, kâo či wơ̆t glaĭ yơh.” 35Ling jang Yêhôwa pơhiăp hăng Balaam: “Nao hrŏm hăng ƀing anŭn bĕ, samơ̆ kơnơ̆ng pơhiăp tơlơi hơgĕt Kâo či pơtă kơ ih.” Tui anŭn Balaam nao hrŏm hăng ƀing khua pơtao Balak.
36Tơdang Balak hmâo hmư̆ Balaam hlăk rai, ñu tơbiă nao bưp gơ̆ pơ plei Ar Môap jĕ hơnoh ia Arnôn, jing guai čar Môap. 37Balak pơhiăp hăng Balaam: “Kâo ƀu jak iâu ih rai sa tơlơi jač ôh hă? Yua hơgĕt ih ƀu rai tañ pơ kâo lĕ? Kâo ƀu dưi brơi tơlơi apah bơni năng lăp kơ ih ôh hă?” 38Balaam laĭ glaĭ kơ Balak: “Ră anai, kâo nao pơ ih, kâo hmâo tơlơi dưi pơhiăp tui hluai tơlơi hơgĕt gĕt mơ̆? Samơ̆ kâo kơnơ̆ng pơhiăp hơgĕt tơlơi Ơi Adai dưm ƀơi bah jơlah kâo đôč.” 39Balaam nao hrŏm hăng Balak truh pơ plei Kiriat Husôt. 40Balak ngă yang hăng rơmo laih anŭn triu, laih anŭn pơkiaŏ mơnuih mơit mơnơ̆ng anŭn kơ Balaam hăng ƀing khua pơtao Môap hlăk dŏ hrŏm hăng ñu.
41Tơ mơguah, Balak ba Balaam đĭ nao pơ Bamôt Baal jing anih ñu dưi ƀuh anih jưh ƀing Israel.
Currently Selected:
Tơlơi Yap 22: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
