Tơlơi Yap 15
15
Tơlơi Juăt Kơ Mơnơ̆ng Ngă Yang
1Yêhôwa laĭ kơ Môis: 2“Pơtă bĕ ană plei pla Israel tui anai: ‘Tơ ƀing gih mŭt amăng lŏn čar Kâo ƀuăn brơi kơ ƀing gih, 3laih anŭn tơdang ƀing gih pơyơr rơmo ƀôdah triu kar hăng sa mơnơ̆ng ngă yang pơyơr hăng apui, hmâo mơnâo ƀâu mơngưi bơmơak kơ Yêhôwa, ƀôdah mơnơ̆ng ngă yang čuh, ƀôdah mơnơ̆ng ngă yang pơsĭt tơlơi ƀuăn, ƀôdah mơnơ̆ng ngă yang amăng khul hrơi phĕt, 4tui anŭn, ăt khŏm pơyơr đĭ kơ Yêhôwa sa mơnơ̆ng ngă yang hăng braih pơdai jing dua lit tơpŭng lŭk hăng sa lit ia rơmuă ôliwơ. 5Rĭm drơi triu yua mơnơ̆ng ngă yang čuh ƀôdah ngă yang pơkŏn, ih khŏm pơyơr sa lit tơpai amăng tơlơi ngă yang tuh ia tơpai. 6Tơdah mơnơ̆ng pơyơr jing sa drơi triu tơno tui anŭn brơi ih ăt pơyơr dơ̆ng mơ̆n pă lit tơpŭng ƀlĭ lŭk hăng sa lit ia rơmuă ôliwơ kiăng ngă mơnơ̆ng ngă yang hăng braih pơdai pơyơr hrŏm hơbĭt hăng mơnơ̆ng pơyơr anŭn, 7laih anŭn ăt pơyơr mơ̆n sa lit tơpai kiăng ngă yang tuh ia tơpai, hmâo mơnâo ƀâu mơngưi bơmơak kơ Yêhôwa. 8Tơ pơyơr sa drơi rơmo tơno ngă mơnơ̆ng ngă yang čuh ƀôdah mơnơ̆ng ngă yang pơsĭt tơlơi ƀuăn, ƀôdah mơnơ̆ng ngă yang rơnŭk rơnua kơ Yêhôwa 9tui anŭn, khŏm pơyơr hrŏm hăng rơmo tơno dăm sa mơnơ̆ng ngă yang hăng braih pơdai hăng năm lit tơpŭng ƀlĭ lŭk hăng dua lit ia rơmuă ôliwơ 10laih anŭn pơyơr dua lit tơpai ngă yang tuh ia tơpai. Anŭn jing mơnơ̆ng ngă yang yua hăng apui pơyơr đĭ mơnâo ƀâu mơngưi kơ Yêhôwa. 11Rĭm drơi rơmo tơno ƀôdah rĭm drơi triu tơno, rĭm drơi ană triu ƀôdah rĭm drơi ană bơbe, ƀing gih khŏm pơkra kar hăng tui anŭn mơ̆n. 12Tui hluai hăng mrô hlô mơnơ̆ng ƀing gih či pơyơr, brơi ƀing gih khŏm prăp pre kar hăng anŭn brơi kơ rĭm drơi hlô. 13Abih bang ƀing ană plei pla Israel leng kơ khŏm ngă tui anŭn soh sel tơdang yua hăng apui kiăng pơyơr đĭ sa mơnơ̆ng ngă yang hmâo mơnâo ƀâu mơngưi kơ Yêhôwa.
14Tơdah hmâo ƀing tuai hơdip hrŏm tơ̆ng krah ƀing gih ƀôdah ƀing mơnuih pơkŏn dŏ tơ̆ng krah ƀing gih mơ̆ng rơnŭk anai truh pơ rơnŭk pơ kŏn, yua hăng apui pơyơr đĭ sa mơnơ̆ng ngă yang hmâo mơnâo ƀâu hiam brơi kơ Yêhôwa, pô anŭn ăt khŏm ngă kar hăng ƀing gih hmâo ngă laih. 15Amăng ană plei pla, hmâo kơnơ̆ng sa tơlơi juăt đôč brơi kơ ƀing gih laih anŭn brơi kơ abih bang ƀing tuai hơdip tơ̆ng krah ƀing gih. Anŭn jing sa tơlơi pơkă dŏ nanao amăng rĭm rơnŭk. Ƀing gih laih anŭn ƀing tuai leng kar kaĭ đôč ƀơi anăp Yêhôwa. 16Či hmâo sa tơlơi juăt laih anŭn sa tơlơi pơkă kar kaĭ đôč brơi kơ ƀing gih laih anŭn kơ ƀing tuai hơdip tơ̆ng krah ƀing gih.’”#Lêwi 24:22.
17Yêhôwa ăt laĭ kơ Môis: 18“Pơtă bĕ kơ ană plei pla Israel: ‘Tơdang ƀing gih mŭt nao amăng lŏn čar Kâo či ba ƀing gih mŭt 19laih anŭn ƀơ̆ng ƀañ lŏn čar anŭn, tui anŭn ƀing gih khŏm pơyơr đĭ mơnơ̆ng ngă yang kơ Yêhôwa. 20Mơ̆ng tơpŭng lŭk tal blŭng kơ ƀing gih, ƀing gih ngă sa klŏ ƀañ laih anŭn pơyơr đĭ. Ƀing gih pơyơr kar hăng pơyơr sa mơnơ̆ng pơyơr mơ̆ng anih prăh pơdai. 21Mơ̆ng rơnŭk anai truh kơ rơnŭk pơ anăp, ƀing gih khŏm pơyơr tơlơi anai kơ Yêhôwa sa mơnơ̆ng pơyơr ngă hăng tơpŭng tal blŭng ƀing gih.’”
Mơnơ̆ng Ngă Yang kơ Tơlơi Soh Ƀu Prơ̆ng
22“‘Tơdang ƀing gih ƀu prơ̆ng ngă soh, ƀu gưt hơdôm tơlơi juăt Yêhôwa hmâo pơtă kơ Môis, 23anŭn jing hơdôm tơlơi Yêhôwa hmâo yua mă Môis pơtă kơ ƀing gih mơ̆ng hrơi Yêhôwa pha brơi khul tơlơi juăt anai, mơ̆ng anŭn truh kơ rơnŭk pơ anăp mơ̆n, 24tơdah ană plei pla ƀu prơ̆ng ngă soh ôh, arăng ƀu thâo ôh, samơ̆ abih bang ană plei pla ngă tui tơlơi pơkă hơnơ̆ng khŏm mă sa drơi rơmo dăm ngă mơnơ̆ng ngă yang čuh hmâo mơnâo ƀâu mơngưi pơyơr đĭ kơ Yêhôwa, hrŏm hăng mơnơ̆ng pơyơr hăng braih pơdai, mơnơ̆ng pơyơr tuh ia tơpai nao hrŏm hơbĭt, laih anŭn sa drơi bơbe tơno ngă yang song mă tơlơi soh. 25Khua ngă yang či ngă phĕt song mă tơlơi soh kơ abih bang ană plei pla Israel; gơñu či hmâo tơlơi pap brơi yua kơ anŭn jing tơlơi soh ƀu prơ̆ng ngă laih anŭn yua kơ ană plei pla hmâo ba nao laih ƀơi anăp Yêhôwa sa mơnơ̆ng ngă yang, jing sa tơlơi ngă yang yua hăng apui pơyơr đĭ Yêhôwa, hrŏm hăng mơnơ̆ng ngă yang song mă tơlơi soh, kiăng song mă tơlơi soh glaĭ gơñu pô. 26Abih bang ană plei pla Israel hăng ƀing tuai hơdip tơ̆ng krah ƀing gơñu či hmâo tơlơi pap brơi tơlơi soh yua kơ abih bang ană plei pla leng kơ ngă tơlơi soh ƀu prơ̆ng anai.
27Samơ̆ tơdah kơnơ̆ng sa čô mơnuih ngă soh ƀu prơ̆ng ôh, mơnuih anŭn khŏm pơyơr sa drơi bơbe ania sa thŭn ngă yang song mă tơlơi soh.#Lêwi 4:27-31. 28Khua ngă yang či ngă phĕt song mă tơlơi soh brơi kơ mơnuih ƀu prơ̆ng ngă soh ƀơi anăp Yêhôwa; tơ ngă phĕt song mă tơlơi soh kơ mơnuih anŭn giơ̆ng laih, mơnuih anŭn či hmâo tơlơi pap brơi. 29Kơnơ̆ng hmâo hrŏm sa tơlơi juăt brơi kơ abih bang mơnuih ngă soh ƀu prơ̆ng ôh, wơ̆t kơ ană plei pla Israel ƀôdah ƀing tuai hơdip tơ̆ng krah gơñu. 30Samơ̆ hlơi prơ̆ng ngă soh, wơ̆t dah mơnuih Israel ƀôdah ƀing tuai hơdip tơ̆ng krah ƀing gơñu, mơnuih anŭn soh hăng Yêhôwa laih anŭn arăng či puh pơđuaĭ ñu mơ̆ng ƀing ană plei Ñu. 31Yua kơ mơnuih anŭn djik djak boh hiăp Yêhôwa, soh hăng tơlơi juăt Ñu hnŭn yơh arăng či puh pơđuaĭ ñu, tơlơi soh ñu či tuh glaĭ ƀơi pô ñu yơh.’”
Tơlơi Juăt kơ Tơlơi Soh Hrơi Saƀat
32Tơdang ƀing Israel hlăk dŏ amăng tơdrŏn har, arăng hmâo mă sa čô mơnuih duñ djuh amăng hrơi Saƀat. 33Ƀing mơnuih hmâo mă mơnuih duñ djuh anai ba gơ̆ nao pơ Môis hăng Arôn laih anŭn pơ abih bang ană plei pla. 34Gơñu mă krư̆ gơ̆ yua kơ aka ƀu thâo klă ôh hyư̆m či ngă kơ gơ̆. 35Yêhôwa laĭ kơ Môis: “Mơnuih anai khŏm djai yơh. Abih bang ană plei pla khŏm glŏm hĭ gơ̆ hăng boh pơtâo pơ gah rơngiao anih jưh.” 36Tui anŭn, abih bang ană plei pla ba gơ̆ pơ rơngiao anih jưh laih anŭn glŏm pơdjai ñu hăng boh pơtâo, tui hăng Yêhôwa hmâo pơtă laih kơ Môis.
Tơlơi Juăt kơ Rơñuai Grua Ao
37Yêhôwa laĭ kơ Môis: 38“Pơhiăp bĕ hăng ană plei pla tui anai: ‘Mơ̆ng rơnŭk anai truh pơ rơnŭk pơkŏn, ƀing gih khŏm pơkra bĕ khul rơñuai grua ƀơi hơdôm akiăng ao gih; hăng sa ară hrĕ#15:38 Hmâo hră pơblang: khôr mơtah.#Mơñă 22:12. 39Abih bang ƀing gih pơkra khul rơñuai grua anai kiăng kơ tơ ƀing gih ƀuh ñu, ƀing gih hơdơr glaĭ abih bang tơlơi Yêhôwa pơtă laih anŭn gưt tui hơdôm tơlơi pơtă anŭn. Tui anŭn ƀing gih ƀu gưt tui khul tơlơi kluh amoaih mơ̆ng pran jua laih anŭn mơ̆ng mơta gih pô ôh, jing tơlơi ngă kơ ƀing gih lĕ amăng tơlơi rih răm. 40Tui anŭn, ƀing gih či hơdơr glaĭ hăng ngă tui hơdôm tơlơi Kâo pơtă, laih anŭn ƀing gih či pơkah pioh jing rơgoh hiam kơ Ơi Adai ƀing gih. 41Kâo jing Yêhôwa Ơi Adai ƀing gih, Pô hmâo ba ƀing gih đuaĭ mơ̆ng čar Êjip kiăng ngă Ơi Adai ƀing gih. Kâo jing Yêhôwa Ơi Adai ƀing gih.’”
Currently Selected:
Tơlơi Yap 15: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
