Mathiơ 8
8
Yêsu Pơhlao Sa Čô Mơnuih Djơ̆ Phŭng
(Mar 1:40-45; Luk 5:12-16)
1Tơ Yêsu trŭn mơ̆ng čư̆, hmâo lu mơnuih tui Ñu. 2Anai nê, hmâo sa čô mơnuih djơ̆ phŭng nao pơ Ñu, bon ƀơi anăp Ñu, laih anŭn laĭ: “Ơ Khua Yang, tơdah Ih kiăng, Ih dưi pơrơgoh kâo yơh.”#8:2 pơrơgoh kâo: Tơlơi ruă anai ngă kơ mơnuih jing hĭ grĭ grañ, ƀu hmâo tơlơi rơgoh tui hăng tơlơi juăt.
3Yêsu yơr tơngan, ruaih ñu, laih anŭn laĭ: “Kâo kiăng yơh, rơgoh bĕ!” Tañ mơtam phŭng ñu rơgoh ƀhiao. 4Laih anŭn Yêsu laĭ kơ ñu: “Răng bĕ, anăm ră ruai tơlơi anai kơ arăng ôh, samơ̆ nao pơdah bĕ ih pô kơ khua ngă yang laih anŭn pơyơr mơnơ̆ng ngă yang tui hăng Môis hmâo pơtă laih, jing sa tơlơi ngă gơ̆ng jơlan kơ abih bang mơnuih.”#Lêwi 14:1-32.
Yêsu Pơsuaih Ding Kơna Khua Tơhan Rôm
(Luk 7:1-10)
5Tơdang Yêsu mŭt pơ plei Kapernum, sa čô khua tơhan wai sa rơtuh čô rai kơwưh rơkâo kơ Ñu 6laih anŭn laĭ: “Ơ Khua, ding kơna kâo dŏ đih amăng sang rơwen ruă kơtang biă mă.”
7Yêsu laĭ kơ gơ̆: “Kâo či nao pơsuaih ñu.”
8Samơ̆ khua tơhan anŭn laĭ glaĭ kơ Yêsu dơ̆ng: “Ơ Khua, kâo ƀu năng lăp ôh jum ih mŭt amăng sang kâo; kơnơ̆ng rơkâo kơ Ih pơhiăp sa boh đôč, laih anŭn ding kơna kâo či suaih yơh. 9Yua kơ kâo pô dŏ gah yŭ tơlơi dưi kơ arăng mơ̆n, laih anŭn kâo ăt hmâo mơ̆n lu ƀing tơhan dŏ gah yŭ kơ tơlơi dưi kâo. Kâo pơtă kơ pô anai: ‘Nao bĕ,’ laih anŭn gơ̆ nao mơtam; laih anŭn kơ pô pơkŏn: ‘Rai bĕ,’ laih anŭn gơ̆ rai; laih anŭn kơ hlŭn kâo: ‘Ngă bruă anai,’ laih anŭn gơ̆ ngă mơtam.”
10Tơ Yêsu hmư̆ khua tơhan anŭn pơhiăp, Ñu hling hlang laih anŭn laĭ kơ ƀing tui ñu: “Sĭt biă mă Kâo laĭ kơ ƀing gih, wơ̆t amăng čar Israel Kâo aka ƀuh djơ̆ ôh mơnuih hmâo tơlơi đaŏ prŏng kar hăng anŭn. 11Kâo laĭ kơ ƀing gih, hmâo lu mơnuih či rai mơ̆ng gah ngŏ, mơ̆ng gah yŭ laih anŭn dŏ ber kơ tơlơi ƀơ̆ng huă mơñum hrŏm hơbĭt hăng Abraham, Isak, laih anŭn Yakôp amăng dêh čar pơtao plei hiam,#Luk 13:29. 12Samơ̆ ƀing ană kơ dêh čar pơtao arăng glŏm hĭ amăng anih kơnăm mơmŏt pơ gah rơngiao; pơ anŭn gơñu či čŏk hia laih anŭn kĕ tơgơi.”#Mat 22:13; 25:30; Luk 13:28. 13Laih anŭn Yêsu laĭ kơ khua tơhan: “Nao bĕ, brơi tơlơi anŭn truh tui hăng tơlơi ih đaŏ.” Ƀơi mông anŭn mơtam ding kơna ñu suaih.
Yêsu Pơsuaih Lu Mơnuih
(Mar 1:29-34; Luk 4:38-41)
14Tơ Yêsu mŭt amăng sang Pêtrôs, Ñu ƀuh tơhmua đah kơmơi Pêtrôs ruă pơgrŭn dŏ đih ƀơi sưng. 15Yêsu ruaih ƀơi tơngan gơ̆, laih anŭn gơ̆ suaih tơlơi ruă pơgrŭn. Gơ̆ tơgŭ laih anŭn buih bruă kơ Ñu.
16Klam anŭn, arăng ba nao pơ Yêsu lu čô mơnuih yang sat ngă. Ñu puh pơđuaĭ hĭ ƀing yang sat anŭn hăng sa boh pơhiăp, laih anŭn pơsuaih abih bang ƀing duăm ruă. 17Tơlơi anai kiăng pơsĭt tơlơi pô laĭ lui hlâo Êsai hmâo laĭ laih,
“Ñu pô yơh mă ba abih tơlơi tơdu ƀing ta,
Laih anŭn glăm ba abih tơlơi duăm ruă ƀing ta.”#Êsai 53:4.
Tơlơi Khŏm Hmâo Kơ Pô Đuaĭ Tui Yêsu
(Luk 9:57-62)
18Tơ Yêsu ƀuh ƀing lu jum dar Ñu, Ñu pơđar brơi găn nao pơ hang gah dih ia dơnao. 19Hmâo sa čô nai pơtô tơlơi juăt rai laih anŭn laĭ hăng Ñu: “Ơ Nai, pơpă Ih nao kâo či tui Ih pơ anŭn yơh.”
20Yêsu laĭ kơ ñu: “Khul pơja hmâo amăng, khul čĭm brĭm amăng adai hmâo hruh, samơ̆ Ană Mơnuih ƀu hmâo ôh anih đăl akŏ.”
21Hmâo sa čô ding kơna pơkŏn dơ̆ng laĭ hăng Ñu: “Ơ Khua, brơi kâo dơr hĭ ama kâo hlâo amơĭ.”
22Samơ̆ Yêsu laĭ kơ ñu: “Đuaĭ tui Kâo bĕ, laih anŭn lui ƀing djai dơr mă mơnuih djai gơñu pô.”
Yêsu Khă Rơbŭ Kơthel
(Mar 4:35-41; Luk 8:22-25)
23Tơ Yêsu đĭ amăng sŏng laih, ƀing ding kơna Ñu tui Ñu. 24Anai nê, hmâo rơbŭ kơthel ƀơi ia rơsĭ tơl ia poh yă gom sŏng giăm pơtrăm hĭ; samơ̆ Yêsu dŏ pĭt. 25Ƀing ding kơna nao râo Ñu, laĭ: “Ơ Khua, pơklaih gơmơi bĕ; ƀing ta djai yơh!”
26Yêsu laĭ kơ gơñu: “Ơ ƀing mơnuih tơlơi đaŏ anĕt, yua hơgĕt ƀing gih hwĭ?” Ñu tơgŭ mơtam, khă rơbŭ hăng ia rơsĭ, laih anŭn dŏ rơiăt lơleh mơtam.
27Ƀing anŭn hling hlang biă mă, laĭ: “Hlơi mơnuih anai jing tơl angĭn hăng ia rơsĭ ăt gưt kơ Ñu mơ̆n?”
Yêsu Pơsuaih Dua Čô Đah Rơkơi Yang Sat Ngă
(Mar 5:1-20; Luk 8:26-39)
28Tơ Yêsu truh laih pơ hang gah adih amăng čar ƀing Gadara, dua čô mơnuih yang sat ngă rai mơ̆ng pơsat bưp Ñu. Gơñu hơtai sat biă mă tơl ƀu hmâo ôh mơnuih khĭn găn ƀơi jơlan anŭn. 29Gơñu ur kraih: “Hơgĕt tơlơi Ih hmâo hăng gơmơi, Ơ Ană Ơi Adai? Djơ̆ mơ̆ Ih rai pơ anai kiăng pơtơnap ƀing gơmơi hlâo kơ hrơi hmâo pơkă laih?”
30Ataih ƀiă mơ̆ng anŭn hmâo lu bơbui hlăk hyu ƀơ̆ng. 31Ƀing yang sat kơwưh rơkâo kơ Yêsu: “Tơdah Ih puh pơđuaĭ gơmơi, rơkâo Ih brơi gơmơi mŭt amăng phung bơbui adih.”
32Laih anŭn Ñu laĭ kơ ƀing gơñu: “Nao bĕ!” Tui anŭn ƀing yang sat tơbiă laih anŭn mŭt amăng phung bơbui. Anai nê, abih bang bơbui anŭn trŭn mơ̆ng hơ̆ng čư̆, kơdâo amăng ia rơsĭ, laih anŭn djai trăm abih.
33Ƀing wai bơbui mŭt amăng plei laih anŭn ră ruai abih tơlơi hmâo truh laih kơ dua čô mơnuih yang sat ngă anŭn. 34Tui anŭn, abih bang ană plei pla tơbiă nao bưp Yêsu. Tơ gơñu ƀuh Ñu laih, gơñu kơwưh rơkâo Yêsu đuaĭ hĭ mơ̆ng tring gơñu.
© 2016 United Bible Societies. All rights reserved.