Mathiơ 5
5
Tơlơi Pơtô Ƀơi Čư̆
1Tơ Yêsu ƀuh khul mơnuih lu, Ñu đĭ nao pơ čư̆. Laih Ñu dŏ ber, ƀing ding kơna Ñu rai giăm pơ Ñu. 2Yêsu čơdơ̆ng pơhiăp laih anŭn pơtô tui anai:
Tơlơi Mơyun Hiam Sĭt
(Luk 6:20-23)
3“Mơyun hiam yơh kơ ƀing ƀun rin amăng bơngăt jua,
yua kơ dêh čar pơtao plei hiam lơ̆m kơ gơñu!
4Mơyun hiam yơh kơ ƀing čŏk hia,
Yua kơ Ơi Adai či pơalum gơñu!#Êsai 61:2.
5Mơyun hiam yơh kơ ƀing thâo luă gŭ,
Yua kơ gơñu či mă tŭ lŏn tơnah!#Adoh 37:11.
6Mơyun hiam yơh kơ ƀing rơpa laih anŭn mơhao kơ tơlơi tơpă,
Yua kơ Ơi Adai či pơhrăp brơi gơñu!#Êsai 55:1,2.
7Mơyun hiam yơh kơ ƀing thâo pap drap,
Yua kơ Ơi Adai či pap drap kơ gơñu!
8Mơyun hiam yơh kơ ƀing hmâo pran jua rơgoh,
Yua kơ gơñu či ƀuh Ơi Adai!#Adoh 24:3,4.
9Mơyun hiam yơh kơ ƀing thâo pơjing tơlơi rơnŭk rơnua,
Yua kơ Ơi Adai či iâu gơñu jing ƀing ană Ơi Adai!
10Mơyun hiam yơh kơ ƀing tŭ tơlơi arăng ngă sat kơ gơñu yua kơ tơlơi tơpă,
Yua kơ dêh čar pơtao plei hiam lơ̆m kơ gơñu!#I Pê 3:14.
11Mơyun hiam yơh kơ ƀing gih tơdah arăng hơtoh djraĭ, ngă sat laih anŭn pơčeh lu mơta tơlơi sat pơkơdơ̆ng glaĭ ƀing gih yua kơ Kâo.#I Pê 4:14. 12Hơ̆k mơak bĕ, yua kơ pri ƀing gih prŏng biă mă amăng adai, yua kơ arăng hmâo ngă sat laih kơ ƀing pô laĭ lui hlâo, hlâo kơ ƀing gih kar kaĭ mơ̆n.”#II Čih 36:16; Bruă 7:52.
Hra Laih Anŭn Tơlơi Bơngač
(Mar 9:50; Luk 14:34-35)
13“Ƀing gih jing hra kơ lŏn tơnah; samơ̆ tơdah hra rơngiă hĭ mơnâo mơsĭn ñu, hyư̆m dưi ngă brơi ñu mơsĭn glaĭ dơ̆ng lĕ? Hra anŭn ƀu thâo yua dơ̆ng tah, kơnơ̆ng tuh glŏm lui pơ rơngiao laih anŭn arăng juă hĭ gah yŭ tơkai.#Mar 9:50; Luk 14:34,35.
14Ƀing gih jing tơlơi bơngač kơ lŏn tơnah. Sa boh plei prŏng dŏ ƀơi hăng ngŏ čư̆ ƀu dưi hơgơ̆m hĭ ôh.#Yô 8:12; 9:5. 15Ƀu hmâo ôh hlơi čuh apui kơđen laih anŭn gom hĭ ñu hăng kơthŭng, samơ̆ arăng pioh ñu ƀơi gơ̆ng apui kơđen, kiăng kơ ñu pơčrang rơđah abih bang mơnuih amăng sang.#Mar 4:21; Luk 8:16; 11:33. 16Kar hăng anŭn mơ̆n brơi tơlơi bơngač ƀing gih pơčrang ƀơi anăp mơnuih mơnam, kiăng kơ gơñu dưi ƀuh bruă hiam ƀing gih ngă laih anŭn pơpŭ bơni kơ Ama ƀing gih amăng adai.”#I Pê 2:12.
Tơlơi Pơtô Kơ Tơlơi Juăt Môis
17“Anăm pơmĭn ôh Kâo rai kiăng pơrai hĭ tơlơi juăt ƀôdah tơlơi ƀing pô laĭ lui hlâo čih. Kâo rai ƀu djơ̆ kiăng pơrai hĭ ôh, samơ̆ kiăng ngă pơsĭt hĭ. 18Yua kơ sĭt biă mă Kâo laĭ kơ ƀing gih, tơl adai laih anŭn lŏn tơnah rơgao đŭt hĭ, sa boh tŭt ƀôdah sa ară gat amăng tơlơi juăt ƀu či rơgao hĭ ôh, tơl abih bang tơlơi anŭn či krĕp djơ̆#5:18 abih bang tơlơi anŭn či krĕp djơ̆; ƀôdah hnal tuč kơ abih bang tơlơi. soh sel.#Luk 16:17. 19Tui anŭn hlơi pô ngă gao sa tơlơi anĕt hloh amăng khul tơlơi juăt anai, laih anŭn pơtô kơ arăng ngă kar hăng anŭn mơ̆n, ñu či jing pô anĕt hloh amăng dêh čar pơtao plei hiam. Samơ̆ hlơi pô gưt tơlơi juăt laih anŭn pơtô tơlơi anŭn kơ arăng mơ̆n, ñu či jing pô prŏng amăng dêh čar pơtao plei hiam. 20Yua kơ Kâo laĭ kơ ƀing gih, tơdah tơlơi tơpă ƀing gih ƀu rơgao hloh kơ tơlơi tơpă ƀing nai pơtô tơlơi juăt laih anŭn ƀing Pharisi, ƀing gih ƀu či mŭt amăng dêh čar pơtao plei hiam ôh.”
Tơlơi Pơtô Djơ̆ Kơ Tơlơi Hil
21“Ƀing gih hmâo hmư̆ laih tơlơi arăng pơtô kơ ƀing mơnuih rơnŭk đưm: ‘Anăm pơdjai mơnuih ôh; laih anŭn hlơi pô pơdjai mơnuih năng lăp kơ tơlơi phat kơđi.’#Tơb 20:13; Mơñă 5:17. 22Samơ̆ Kâo laĭ kơ ƀing gih, hlơi pô hil#5:22 hlơi pô hil; Đơđa Hră Ơi Adai Pơhiăp so đưm čih hlơi pô hil ƀu hmâo tơhnal. kơ adơi ayŏng ñu ăt năng lăp tŭ tơlơi phat kơđi mơ̆n; hlơi pô laĭ kơ adơi ayŏng ñu ‘Ih mlŭk’ či năng lăp jao kơ tơpul khua phat kơđi; hlơi pô laĭ ‘Ih mlŭk hưt’ či năng lăp dŏ amăng war apui. 23Tui anŭn, tơdang ih pơyơr mơnơ̆ng pơyơr kơ Ơi Adai ƀơi kơƀang ngă yang, hlăk anŭn ih hơdơr kơ adơi ayŏng ih hlăk dŏ hmâo tơlơi hăng ih, 24lui hĭ bĕ mơnơ̆ng ih pơyơr ƀơi anăp kơƀang ngă yang laih anŭn nao pơsir hĭ hăng adơi ayŏng ih hlâo; Giơ̆ng anŭn kah ih dưi rai pơyơr mơnơ̆ng ih kơ Ơi Adai.
25Tañ pơsir bĕ hăng pô hmâo tơlơi hăng ih tơdang ih rơbat hrŏm hơbĭt hăng ñu ƀơi kơtuai jơlan, hwĭ dah ñu pơčŭt ih laih anŭn ba ih pơ khua phat kơđi, laih anŭn khua phat kơđi jao ih kơ khua wai sang mơnă, laih anŭn arăng krư̆ hĭ ih. 26Kâo laĭ sĭt biă mă kơ ih, ih ƀu či dưi tơbiă ôh mơ̆ng sang mơnă tơl ih kla hĭ sar prăk hnal tuč.”
Tơlơi Pơtô Djơ̆ Kơ Tơlơi Pyu Pơde
27“Ƀing gih hmâo hmư̆ laih arăng laĭ đưm: ‘Anăm klĕ pyu ôh’.#Tơb 20:14; Mơñă 5:18. 28Samơ̆ Kâo laĭ kơ ƀing gih, hlơi pô lăng kơ đah kơmơi hăng tơlơi amoaih hưp kiăng ngă soh, ñu klĕ pyu laih hăng đah kơmơi anŭn amăng pran jua ñu. 29Tơdah mơta gah hơnuă ih pơsoh ih, blač hĭ ñu laih anŭn glŏm hĭ pơ ataih; yua kơ hiam hloh kơ ih rơngiă sa črăn amăng drơi jan ih hăng arăng glŏm hĭ abih drơi jan ih dŏ amăng war apui.#Mat 18:9; Mar 9:47. 30Tơdah tơngan hơnuă ih pơsoh ih, čơ̆ng glŏm lui hĭ ñu pơ ataih; hiam hloh kơ ih rơngiă sa ƀĕ tơngan hăng abih drơi jan ih dŏ amăng war apui.”#Mat 18:8; Mar 9:43.
Pơtô Djơ̆ Kơ Tơlơi Pơklaih Lui Rơkơi Bơnai
(Mat 19:9; Mar 10:11-12; Luk 15:18)
31“Ƀing đưm hmâo laĭ mơ̆n: ‘Hlơi pô pơklaih lui bơnai ñu, brơi ñu čih kơ gơ̆ sa pŏk hră pơklaih lui.’#Mơñă 24:1-4; Mat 19:7; Mar 10:4. 32Samơ̆ Kâo laĭ kơ ƀing gih, rĭm čô hlơi pô pơklaih lui bơnai ñu ƀu djơ̆ yua kơ bơnai ñu jing mơnuih rih răm ôh, ñu pơjing gơ̆ jing sa čô đah kơmơi klĕ pyu; laih anŭn hlơi pô dŏ sa čô đah kơmơi arăng pơklaih lui laih jing mơnuih klĕ pyu kar kaĭ mơ̆n.”#Mat 19:9; Mar 10:11,12; Luk 16:18; I Kôr 7:10,11.
Pơtô Djơ̆ Kơ Tơlơi Ƀuăn Rơ̆ng
33“Ƀing gih hmâo hmư̆ laih tơlơi arăng pơtô kơ ƀing mơnuih rơnŭk đưm: ‘Anăm ih ƀuăn rơ̆ng hăng tơlơi ƀlor ôh, samơ̆ brơi ih pơsĭt ƀơi anăp Khua Yang tơlơi ih hmâo ƀuăn rơ̆ng laih.’#Lêwi 19:12; Yap 30:2; Mơñă 23:21. 34Samơ̆ Kâo laĭ kơ ƀing gih, anăm ƀuăn rơ̆ng hơgĕt ôh, thâo dah hăng adai, yua kơ adai jing gre pơtao kơ Ơi Adai,#Yak 5:12; Êsai 66:1; Mat 23:22. 35thâo dah hăng lŏn, yua kơ lŏn jing hnăl tơkai Ơi Adai juă, thâo dah hăng plei Yêrusalem, yua kơ plei anŭn jing plei kơ Pơtao prŏng.#Êsai 66:1; Adoh 48:2. 36Laih anŭn anăm ƀuăn rơ̆ng hăng boh akŏ ih pô ôh, yua kơ ih ƀu dưi pơjing ôh sa ară ƀuk ih jing hĭ kŏ ƀôdah jŭ. 37Brơi tơlơi ih pơhiăp ‘Ơ’ jing Ơ, ƀôdah ‘Ơ ơh’ jing Ơ ơh. Hơgĕt tơlơi thim dơ̆ng kơ tơlơi anŭn tơbiă rai mơ̆ng yang sat yơh.”
Pơtô Djơ̆ Kơ Tơlơi Rŭ Nua
(Luk 6:29-30)
38“Ƀing gih hmâo hmư̆ laih tơlơi arăng laĭ: ‘Mơta kla glaĭ kơ mơta, laih anŭn tơgơi kla glaĭ kơ tơgơi.’#Tơb 21:24; Lêwi 24:20; Mơñă 19:21. 39Samơ̆ Kâo laĭ kơ ƀing gih: Anăm pơkơdơ̆ng glaĭ hăng mơnuih sat ƀai ôh. Samơ̆ tơdah arăng pah meng gah hơnuă ih, brơi ñu pah wơ̆t meng gah iao ih kar kaĭ mơ̆n. 40Tơdah arăng phong kiăng mă ao amăng lăm ih, brơi ñu mă wơ̆t ao phyung gah rơngiao kar kaĭ mơ̆n. 41Laih anŭn tơdah arăng pơgŏ ih rơbat sa wang, brơi ih rơbat hrŏm hơbĭt hăng ñu dua wang. 42Pha brơi bĕ kơ hlơi pô rơkâo mơ̆ng ih, laih anŭn anăm hơngah ôh kơ hlơi rơkâo čan mơ̆ng ih.”
Khăp Kơ Ƀing Ayăt
(Luk 6:27-28,32-36)
43 #
Lêwi 19:18. “Ƀing gih hmư̆ arăng laĭ: ‘Khăp bĕ kơ pô jum dar ih laih anŭn bơrơmŭt kơ ayăt ih.’ 44Samơ̆ Kâo laĭ kơ ƀing gih, khăp bĕ kơ ayăt ƀing gih, laih anŭn iâu laĭ brơi kơ ƀing ngă sat kơ ƀing gih, 45kiăng kơ ƀing gih dưi jing ană Ama ƀing gih amăng adai; yua kơ Ñu brơi yang hrơi pơčrang kơ ƀing sat wơ̆t kơ ƀing hiam, laih anŭn Ñu brơi ia hơjan kơ ƀing tơpă wơ̆t kơ ƀing wĕ wŏ mơ̆n. 46Yua kơ tơdah ƀing gih kơnơ̆ng khăp kơ ƀing khăp kơ ƀing gih đôč, hơgĕt tơlơi bơni ƀing gih či hmâo lĕ? Ƀu djơ̆ ôh hă ƀing ring jia ăt ngă tui anŭn? 47Laih anŭn tơdah ƀing gih kơnơ̆ng kơkuh tơña adơi ayŏng ƀing gih đôč, hơgĕt tơlơi ƀing gih ngă hloh kơ pô pơkŏn? Ƀu djơ̆ ôh hă ƀing djuai tuai ăt ngă tui anŭn? 48Tui anŭn, brơi kơ ƀing gih jing klă tum kar hăng Ama ƀing gih amăng adai jing klă tum.”#Lêwi 19:2; Mơñă 18:13.
© 2016 United Bible Societies. All rights reserved.