Mathiơ 3
3
Tơlơi Yôhan Ƀatem Pơtô
(Mar 1:1-8; Luk 3:1-18; Yô 1:19-28)
1Hlăk anŭn, Yôhan Ƀatem nao pơtô amăng tơdrŏn har čar Yuđa tui anai: 2“Kơhmal bĕ tơlơi soh ƀing gih, yua kơ Dêh Čar Pơtao Plei Hiam giăm truh laih yơh!”#Mat 4:17; Mar 1:15. 3Kơ Yôhan anŭn yơh pô laĭ lui hlâo Êsai hmâo laĭ laih tui anai:
“Hmâo asăp mơnuih pơhiăp kraih amăng tơdrŏn tač:
‘Prăp pre bĕ jơlan brơi kơ Khua Yang.
Ngă tơpă bĕ khul jơlan Ñu.’”#Êsai 40:3.
4Yôhan buh ao blâu aseh samô laih anŭn hruă kơiăng ñu hăng hơdrăng klĭ. Ñu ƀơ̆ng kơtop laih anŭn ia hơni glai.#II Pơtao 1:8. 5Ƀing ană plei pla mơ̆ng plei Yêrusalem, mơ̆ng tar ƀar kwar Yuđa, laih anŭn mơ̆ng abih kwar jĕ giăm ia krong Yurdan leng kơ nao pơ ñu soh sel. 6Gơñu pơhaih tơlơi soh gơñu laih anŭn tŭ Yôhan ngă ƀatem kơ gơñu amăng ia krong Yurdan.
7Samơ̆ tơ ñu ƀuh lu ƀing Pharisi laih anŭn ƀing Sadusi rai tŭ ƀatem, ñu laĭ kơ gơñu: “Ơ ƀing djuai ala tơpơ̆ng, hlơi pơthâo brơi kơ ƀing gih dưi đuaĭ kơdŏp mơ̆ng tơlơi Ơi Adai hil či truh?#Mat 12:34; 23:33. 8Brơi ƀing gih pơrơđah bĕ bruă hiam ƀing gih năng lăp hăng tơlơi ƀing gih kơhmal tơlơi soh, 9laih anŭn anăm pơhiăp pơgao hăng laĭ: ‘Abraham yơh jing ơi adon gơmơi’; yua kơ kâo laĭ brơi kơ ƀing gih thâo, Ơi Adai ăt dưi pơjing rai mơ̆n ană tơčo Abraham mơ̆ng khul boh pơtâo anai.#Yô 8:33. 10Ră anai Ơi Adai ô laih jong ƀơi phŭn kơyâo; abih bang kơyâo ƀu mơboh rai boh hiam ôh, Ñu či drom hĭ laih anŭn glŏm lui amăng apui.#Mat 7:19. 11Kâo ngă ƀatem kơ ƀing gih hăng ia yua kơ tơlơi ƀing gih kơhmal tơlơi soh, samơ̆ Pô rai tơdơi kơ kâo jing mơyang hloh kơ kâo, laih anŭn kâo ƀu năng lăp ôh djă klĭ juă Ñu. Ñu či ngă ƀatem kơ ƀing gih hăng Yang Bơngăt Hiam laih anŭn hăng apui. 12Tơngan Ñu djă čơngua,#3:12 boh pơhiăp tal blŭng: huar. kiăng pơi pơrơgoh anih prăh pơdai Ñu. Ñu či pơƀŭt pơdai Ñu amăng atông, samơ̆ Ñu či čuh hĭ hơkam amăng apui ƀu thâo thăm ôh.”
Yôhan Ngă Ƀatem Kơ Yêsu
(Mar 1:9-11; Luk 3:21-22)
13Hlăk anŭn, Yêsu tơbiă mơ̆ng kwar Galilê nao pơ Yôhan ƀơi ia krong Yurdan, kiăng kơ Yôhan ngă ƀatem kơ Ñu. 14Yôhan khă Ñu laih anŭn laĭ: “Tui hăng tơlơi djơ̆ kâo yơh kiăng kơ Ih ngă ƀatem brơi kơ kâo, samơ̆ hyư̆m Ih rai pơ kâo lĕ?” 15Samơ̆ Yêsu laĭ glaĭ kơ ñu: “Brơi ngă bĕ ră anai, yua kơ ƀing ta khŏm ngă pơgiơ̆ng hĭ abih bruă tơlơi tơpă.” Tui anŭn, Yôhan tŭ ư yơh. 16Giơ̆ng kơ Yêsu tŭ ƀatem, hlăk Ñu tơgŭ đĭ mơ̆ng ia, ƀơi mông anŭn mơtam khul adai pŏk hĭ, Ñu ƀuh Yang Bơngăt Hiam Ơi Adai trŭn rai hrup hăng čĭm bơrơgơ̆m laih anŭn găm ƀơi Ñu. 17Giơ̆ng anŭn hmâo asăp pơhiăp mơ̆ng adai laĭ tui anai: “Anai jing Ană Kâo khăp biă mă; amăng Ñu yơh Kâo hmâo tơlơi mơak biă mă.”#Čơd 22:2; Adoh 2:7; Êsai 42:1; Mat 12:18; 17:5; Mar 1:11; Luk 9:35.
Currently Selected:
Mathiơ 3: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.