Lêwi 1
1
Mơnơ̆ng Ngă Yang Čuh
1Yêhôwa mơ̆ng lăm Sang Khăn Pơƀŭt iâu Môis, hăng laĭ: 2“Laĭ bĕ kơ ƀing ană plei pla Israel tui anai: ‘Tơdah hmâo sa čô amăng ƀing gih kiăng pơyơr hlô mơnơ̆ng ngă yang kơ Yêhôwa, brơi ƀing gih pơyơr rơmo, triu ƀôdah bơbe mă mơ̆ng khul hlô mơnơ̆ng.
3Tơdah mơnơ̆ng pô anŭn pơyơr jing sa mơnơ̆ng ngă yang pơyơr čuh hăng rơmo, brơi ñu pơyơr rơmo tơno ƀu hmâo rơka rơkeñ ôh. Pô anŭn khŏm pơyơr ñu ƀơi bah amăng Sang Khăn Pơƀŭt, ƀơi anăp Yêhôwa, kiăng kơ Yêhôwa mơak mă tŭ. 4Mơnuih pơyơr anŭn či ah tơngan ñu ƀơi akŏ hlô mơnơ̆ng pơyơr čuh, mơnơ̆ng anŭn či hmâo tơlơi dưi tŭ mă hrup hăng mơnơ̆ng ngă yang song mă tơlơi soh pơala brơi kơ pô anŭn. 5Ñu či pơdjai hĭ rơmo tơno ƀơi anăp Yêhôwa, giơ̆ng anŭn ƀing ană Arôn, jing ƀing khua ngă yang či mă drah gơ̆ pơyơr đĭ laih anŭn tuh hĭ drah anŭn ƀơi jum dar kơƀang ngă yang ƀơi bah amăng Sang Khăn Pơƀŭt. 6Ñu lok hĭ klĭ hlô mơnơ̆ng pơyơr čuh laih anŭn sĭ čraih asar ñu jing hĭ lu čơđeh. 7Ƀing khua ngă yang jing ană tơčo Arôn či tŏ apui ƀơi ngŏ kơƀang ngă yang, laih anŭn dăp djuh ƀơi hăng ngŏ apui. 8Giơ̆ng anŭn ƀing khua ngă yang dăp khul asar añăm anŭn, boh akŏ, laih anŭn rơmuă ƀơi hăng ngŏ djuh hlăk dŏ ƀơ̆ng ƀơi ngŏ kơƀang. 9Pô pơyơr mơnơ̆ng ngă yang khŏm mă ia rao pruăi hlŭng laih anŭn tơkai, giơ̆ng anŭn khua ngă yang ba čuh abih bang ƀơi hăng ngŏ kơƀang ngă yang. Anŭn jing mơnơ̆ng ngă yang čuh, kiăng laĭ sa drơi hlô mơnơ̆ng ngă yang yua hăng apui pơyơr đĭ, hmâo mơnâo ƀâu hiam bơmơak kơ Yêhôwa.
10Tơdah mơnơ̆ng ñu pơyơr jing mơnơ̆ng ngă yang pơyơr čuh hăng hlô mơnơ̆ng anĕt, hăng triu ƀôdah hăng bơbe ñu khŏm pơyơr sa drơi tơno ƀu hmâo rơka rơkeñ ôh. 11Mơnuih pơyơr mơnơ̆ng ngă yang khŏm pơdjai hlô mơnơ̆ng anŭn gah kơdư kơ kơƀang ngă yang, ƀơi anăp Yêhôwa, giơ̆ng anŭn ƀing khua ngă yang jing ƀing ană Arôn či tuh drah jum dar kơƀang ngă yang. 12Ñu či čraih asar añăm rĭm čơđeh, wơ̆t akŏ laih anŭn rơmuă gơ̆. Khua ngă yang dăp đĭ abih bang asar añăm anŭn djơ̆ tal ñu ƀơi hăng ngŏ djuh apui hlăk dŏ ƀơ̆ng ƀơi ngŏ kơƀang ngă yang. 13Kar kaĭ mơ̆n ñu khŏm mă ia rao hĭ pruăi hlŭng hăng tơkai, giơ̆ng anŭn khua ngă yang ba čuh abih bang ƀơi hăng ngŏ kơƀang ngă yang. Anŭn jing tơlơi ngă yang čuh, jing sa drơi hlô mơnơ̆ng ngă yang yua hăng apui pơyơr đĭ, hmâo mơnâo ƀâu hiam bơmơak kơ Yêhôwa.
14Tơdah mơnơ̆ng ñu pơyơr đĭ kơ Yêhôwa jing sa mơnơ̆ng ngă yang čuh hăng čĭm, ñu khŏm yua čĭm bơrơgơ̆m ƀôdah čĭm kơtrâo ană. 15Khua ngă yang či ba čĭm anŭn pơ kơƀang ngă yang, weñ tơĭ hĭ tơkuai gơ̆, laih anŭn čuh hĭ akŏ gơ̆ ƀơi ngŏ kơƀang ngă yang; bơ kơ drah gơ̆, ñu brơi ƀlĕ djoh ƀơi akiăng kơƀang ngă yang. 16Khua ngă yang mă bêm wơ̆t hăng blâu ñu laih anŭn glŏm hĭ ƀơi djeo kơƀang ngă yang ƀơi gah ngŏ, jing anih arăng tuh hơbâo tơpur, 17giơ̆ng anŭn ñu djă dua pŏk čăng, ñu hek hĭ čĭm anŭn, samơ̆ ƀu hek tơĭ hĭ ôh, khua ngă yang čuh hĭ ƀơi gah ngŏ kơƀang ngă yang ƀơi djuh apui dŏ ƀơ̆ng. Anŭn yơh tơlơi ngă yang čuh, jing sa drơi hlô mơnơ̆ng ngă yang yua hăng apui pơyơr đĭ, hmâo mơnâo ƀâu hiam bơmơak kơ Yêhôwa.’”
Currently Selected:
Lêwi 1: JRA2016
Highlight
Copy
Compare
Share
Want to have your highlights saved across all your devices? Sign up or sign in
© 2016 United Bible Societies. All rights reserved.
