Bruă Mơnuă 20

Pôl Pơ Čar Masêđôn Hăng Čar Grek

1Tơ tơlơi rŭng răng anŭn abih laih, Pôl pơkiaŏ nao arăng iâu pơƀŭt ƀing ding kơna. Giơ̆ng kơ pơtrŭt pơđĭ pran jua ƀing gơ̆, ñu lui ƀing gơ̆ hăng nao pơ čar Masêđôn. 2Ñu găn djŏp tring anŭn, ñu yua lu boh pơhiăp pơtrŭt pơđĭ pran jua ƀing đaŏ, giơ̆ng anŭn ñu truh pơ čar Grek. 3Ñu dŏ pơ anŭn klâo blan. Tơdang ñu čơdơ̆ng đĭ kompăn nao pơ čar Siri, ñu thâo ƀing Yuđa dưm tơlơi mơneč ngă sat ñu. Tui anŭn ñu khư̆p ư wơ̆t glaĭ găn čar Masêđôn. 4Sôpatê ană đah rơkơi Pirus plei Bêrê nao hrŏm hơbĭt hăng ñu. Mơ̆ng ƀing Têsalônik hmâo Aristark hăng Sêkundu; Gaius plei Derbơ laih anŭn Timôthê; čar Asi hmâo Tisik hăng Trôphim. 5Ƀing anai nao hlâo hăng dŏ tơguan ƀing gơmơi pơ plei Trôas. 6Giơ̆ng hrơi phĕt Ƀañ Tơpŭng Ƀu Hmâo Tơpơi, gơmơi đĭ kompăn mơ̆ng plei Philip, laih anŭn rơgao rơma hrơi gơmơi bưp ƀing gơñu pơ plei Trôas. Pơ anŭn gơmơi dŏ tơjuh hrơi.

Pôl Pơ Plei Trôas

7Hrơi tal sa amăng hrơi kơ̆m, tơdang ƀing gơmơi bơjơnum glaĭ kiăng wơ̆k ƀañ tơpŭng. Pôl pơtô kơ ƀing ding kơna, yua kơ hrơi pơgi gơmơi khŏm nao, hnŭn yơh Pôl pơtô tơl truh krah mlam. 8Amăng adŭ tal glong anih gơmơi bơjơnum hmâo lu apui kơđen. 9Hmâo sa čô tơdăm anăn ñu Ơtik dŏ ber ƀơi bah amăng phă. Ñu pĭt gui tơdang Pôl dŏ pơtô glong biă mă. Laih anŭn ñu pĭt wơr, mơ̆ng adŭ tal klâo ñu lĕ trŭn pơ lŏn, tơ arăng rŭ đĭ ñu ƀuh ñu djai laih. 10Samơ̆ Pôl trŭn, ñu tơkui krôp mă ñu hăng laĭ: “Anăm rŭng răng ôh, ñu ăt dŏ hơdip đôč!” 11Giơ̆ng anŭn Pôl đĭ glaĭ pơ adŭ tal glong dơ̆ng, ñu wơ̆k ƀañ tơpŭng hăng ƀơ̆ng. Ñu pơhiăp ră ruai hăng gơñu dơ̆ng sui tơl truh mơguah, laih anŭn ñu nao yơh. 12Arăng ba pô tơdăm anŭn glaĭ pơ sang ñu ăt dŏ hơdip, hnŭn yơh ƀing gơñu hmâo tơlơi pơalum lu biă mă.

Mơ̆ng Plei Trôas Truh Pơ Plei Milê

13Gơmơi đĭ kompăn nao hlâo pơ plei Asôs. Pơ anŭn gơmơi či bưp Pôl; yua kơ Pôl kiăng nao jơlan lŏn, hnŭn yơh ñu hmâo pơkra laih tui anŭn. 14Tơ ñu bưp laih ƀing gơmơi ƀơi plei Asôs, gơmơi čơkă ñu đĭ kompăn nao pơ plei Mitilen. 15Mơ̆ng anŭn gơmơi đĭ kompăn laih anŭn hrơi pơgi gơmơi truh pơ gah anăp plao ia Čiôs. Hrơi tơdơi gơmơi weh nao pơ plei Samôs, laih anŭn hrơi tơdơi tŏ tui anŭn gơmơi truh pơ plei Milê. 16Yua kơ Pôl khư̆p ư kơnơ̆ng găn lui plei Êphêsô, ƀu jưh pơ anŭn ôh hwĭ kơ rơngiă hĭ hrơi mông amăng kwar Asi. Yua kơ ñu hăt kiăng nao, tơdah dưi ñu kiăng truh pơ plei Yêrusalem amăng hrơi phĕt Pantơkôt.

Pôl Pơhiăp Hăng Ƀing Kŏng Tha Plei Êphêsô

17Mơ̆ng plei Milê Pôl pơkiaŏ nao mơnuih pơ plei Êphêsô iâu ƀing kŏng tha amăng Phung Sang Ơi Adai nao pơ ñu. 18Tơ gơñu truh laih, ñu pơhiăp hăng ƀing gơ̆: “Ƀing gih pô leng kơ thâo laih, hyư̆m kâo hmâo dŏ dơ̆ng ƀơ̆ng huă hrŏm hăng ƀing gih nanao rĭm hrơi čơdơ̆ng mơ̆ng hrơi kâo truh pơ kwar Asi. 19Kâo mă bruă Khua Yang hăng abih pran jua luă gŭ, hăng lu ia mơta, hăng tŭ lu tơlơi lông lăng truh kơ kâo yua mơ̆ng ƀing Yuđa dưm tơlơi mơneč ngă pơrăm kâo. 20Ƀing gih thâo laih kâo ƀu hmâo pơdŏp ôh tơlơi tŭ yua kơ ƀing gih, ră ruai hăng pơtô kơ ƀing gih ƀơi anăp lu mơnuih ƀôdah amăng rĭm boh sang. 21Kâo hmâo pơtô laĭ kơ ƀing Yuđa wơ̆t ƀing Grek kơ tơlơi kơhmal tơlơi soh hăng Ơi Adai, laih anŭn tơlơi đaŏ ƀơi Yêsu Krist Khua Yang ƀing ta. 22Lăng bĕ, ră anai Yang Bơngăt Hiam hmâo pơtrŭt kâo nao pơ plei Yêrusalem, ƀu thâo ôh hơgĕt tơlơi či truh kơ kâo pơ anŭn; 23kơnơ̆ng kâo thâo Yang Bơngăt Hiam hmâo pơthâo hlâo brơi kâo amăng rĭm boh plei, hrĕ čuăk hăng tơlơi tơnap tap dŏ tơguan kâo. 24#II Tim 4:7.Samơ̆ kâo ƀu yap tơlơi hơdip kâo jing yom kơ kâo pô ôh, tŭ kơ ngă pơgiơ̆ng hĭ abih bruă kâo hmâo mă tŭ laih mơ̆ng Khua Yang Yêsu, kiăng kâo pơhaih Tơlơi Phrâo Hiam kơ tơlơi pap Ơi Adai.

25Ră anai kâo thâo abih bang amăng ƀing gih, jing ƀing kâo hmâo pơtô laih kơ dêh čar pơtao Ơi Adai, ƀu hmâo sa čô hlơi či ƀuh ƀô̆ mơta kâo dơ̆ng ôh. 26Yua kơ anŭn yơh, hrơi anai kâo pơthâo pơklă ƀơi anăp ƀing gih, kâo ƀu soh hăng drah kơ abih bang ƀing gih ôh. 27Yua kơ kâo ƀu hơngah ôh pơhaih kơ ƀing gih abih bang tơlơi Ơi Adai kơñăm. 28Tui anŭn răng bĕ kơ ƀing gih pô laih anŭn kơ abih bang khul triu Yang Bơngăt Hiam hmâo pioh ƀing gih jing ƀing kiaŏ wai, kiăng čem rong Phung Sang Ơi Adai lơ̆m kơ Ơi Adai,#20:28 Ơi Adai: Đơđa Hră Ơi Adai Pơhiăp so đưm čih: Khua Yang. ƀing Ñu song mă laih hăng drah Ană Ñu pô#20:28 ƀing Ñu song mă laih hăng drah Ană Ñu pô, ƀôdah hăng tơlơi Ană Ñu djai pơsăn drơi jan. 29Kâo thâo tơdơi kơ kâo đuaĭ, či hmâo lu asâo tan hơtai či mŭt amăng ƀing gih, gơñu ƀu hơ-ưi khul triu ôh. 30Mơ̆ng tơ̆ng krah ƀing gih pô či hmâo mơnuih tơgŭ đĭ pơtô khul tơlơi ƀlor, kiăng dui ba ƀing ding kơna đuaĭ tui gơñu. 31Tui anŭn, dŏ răng bĕ, hơdơr glaĭ bĕ amăng klâo thŭn kâo ƀu pơdơi ôh luh lu ia mơta, hrơi hăng mlam kâo pơtô kơ rĭm čô ƀing gih.

32Ră anai kâo jao ƀing gih kơ Ơi Adai laih anŭn kơ boh pơhiăp tơlơi pap Ñu, jing boh pơhiăp dưi pơdơ̆ng hăng pha brơi kong ngăn kơ ƀing gih hrŏm hơbĭt hăng abih bang ƀing mơnuih rơgoh hiam. 33Kâo ƀu hưp kơ prăk, mah, ƀôdah sum ao arăng ôh. 34Ƀing gih pô thâo laih hăng dua ƀĕ tơngan anai yơh mă bruă hmâo mơnơ̆ng yua kơ kâo pô, laih anŭn kơ ƀing hrŏm hơbĭt hăng kâo. 35Kâo hmâo pơtô kơčrâo brơi laih kơ ƀing gih amăng abih bang bruă, ƀing ta khŏm triăng mă bruă tui anŭn kiăng kơ gŭm djru ƀing ƀu anăm mă bruă, hăng hơdơr glaĭ boh pơhiăp Khua Yang Yêsu pô hmâo pơhiăp: ‘Pha brơi jing hmâo tơlơi mơyun hloh kơ mă tŭ.’”

36Giơ̆ng Pôl pơhiăp khul tơlơi anŭn, ñu tŏ tơŭt iâu laĭ hrŏm hơbĭt hăng abih bang ƀing gơ̆. 37Abih bang gơñu leng kơ hia soh sel, hăng kuar mă tơkuai Pôl laih anŭn čŭm. 38Gơñu ruă rơngot hloh dơ̆ng, yua kơ tơlơi Pôl laĭ ƀing gơñu ƀu či ƀuh ƀô̆ mơta ñu dơ̆ng ôh. Giơ̆ng anŭn gơñu drông ba Pôl truh pơ kompăn.

Currently Selected:

Bruă Mơnuă 20: JRA2016

Highlight

Copy