Bruă Mơnuă 17

Pôl Pơ Plei Têsalônik

1Pôl hăng Silas găn nao plei Amphipôlis hăng plei Apôlôni, giơ̆ng anŭn truh pơ plei Têsalônik. Pơ anŭn hmâo sa boh sang bơjơnum ƀing ană Yuđa. 2Tui hăng tơlơi ñu juăt ngă, Pôl mŭt amăng sang bơjơnum, amăng klâo hrơi saƀat ñu pơrơjah pơgăl hăng gơñu, mă mơ̆ng Tơlơi Ơi Adai Pơhiăp, 3Pôl yua hră Ơi Adai pơhiăp pơblang bơrơđah hăng pơsĭt brơi kơ tơlơi Krist khŏm tŭ tơlơi tơnap tap laih anŭn hơdip glaĭ mơ̆ng ƀing djai. Ñu laĭ: “Yêsu pô kâo ngă gơ̆ng jơlan kơ ƀing gih anai, Ñu yơh jing Yang Krist.” 4Hmâo đơđa amăng ƀing gơñu tŭ ư nao hrŏm hăng Pôl laih anŭn Silas. Laih anŭn kar kaĭ mơ̆n hmâo lu ƀing Grek kơkuh pơpŭ kơ Ơi Adai laih, wơ̆t hăng lu ƀing đah kơmơi arăng pơpŭ ăt đaŏ mơ̆n. 5Samơ̆ ƀing Yuđa moañ nač, jak ƀing sat ƀai tă tăn dŏ amăng jơlan glung. Gơñu pơƀŭt pơsur mơnuih lu ngă pơrŭng pơrăng ur amăng plei, laih anŭn blŭng mŭt sang Jason, sem hơduah Pôl hăng Silas, kiăng mă gơñu ba pơ gah rơngiao ƀơi anăp ană plei pla. 6Samơ̆ tơ gơñu sem ƀu ƀuh ƀing anŭn ôh, gơñu mă dui ba Jason hăng đơđa ƀing adơi ayŏng đaŏ nao pơ anăp ƀing khua wai lăng plei prŏng, laih anŭn ur: “Ƀing anai hmâo ngă pơrŭng abih lŏn tơnah, ră anai gơñu truh laih pơ anai, 7laih anŭn Jason hmâo pơdŏp gơñu amăng sang ñu. Abih bang gơñu pơkơdơ̆ng glaĭ hăng tơlơi juăt Sêsar, gơñu laĭ hmâo sa čô pơtao pơkŏn jing Yêsu.” 8Hmư̆ hơdôm tơlơi anŭn, ƀing ană plei pla hăng ƀing khua wai lăng plei prŏng hmâo tơlơi rŭng răng. 9Giơ̆ng ƀing khua prŏng mă Jason hăng ƀing mơnuih pơkŏn kla prăk pơsir tui hăng tơlơi juăt pơkă, gơñu phư hĭ ƀing gơ̆ yơh.

Pơ Plei Bêrê

10Amăng mlam anŭn mơtam ƀing adơi ayŏng pơkiaŏ Pôl hăng Silas nao pơ plei Bêrê. Tơ gơñu truh laih, gơñu mŭt amăng sang bơjơnum ƀing Yuđa. 11Ƀing ană Yuđa pơ anai jing mơnuih hmâo pran jua hiam hloh kơ ƀing pơ plei Têsalônik, yua kơ ƀing gơñu tŭ mă boh pơhiăp Ơi Adai hăng abih pran jua kiăng biă mă, rĭm hrơi gơñu kơsem lăng hră Ơi Adai Pơhiăp kiăng thâo kơ tơlơi Pôl pơtô anŭn jing djơ̆ mơ̆. 12Yua kơ anŭn hmâo lu mơnuih amăng ƀing gơñu đaŏ kơ Khua Yang, amăng anŭn hmâo ƀing đah kơmơi Grek jing ƀing arăng pơpŭ, laih anŭn wơ̆t ƀing đah rơkơi lu mơ̆n. 13Samơ̆ tơ ƀing Yuđa pơ plei Têsalônik thâo Pôl ăt pơtô boh pơhiăp Ơi Adai pơ plei Bêrê mơ̆n, gơñu nao pơ anŭn mơ̆n kiăng pơsur ƀing ană plei ngă pơrŭng. 14Hlăk anŭn tañ mơtam ƀing adơi ayŏng pơkiaŏ Pôl nao gah ia rơsĭ. Samơ̆ Silas hăng Timôthê ăt dŏ glaĭ pơ plei Bêrê. 15Ƀing mơnuih ba Pôl nao truh pơ plei Athen, laih anŭn gơñu wơ̆t glaĭ pơ plei Bêrê, giơ̆ng Pôl hmâo pơtă kơ gơñu brơi laĭ kơ Silas hăng Timôthê khŏm nao pơ ñu jai tañ jai hiam hloh.

Pơ Plei Athen

16Tơdang Pôl dŏ tơguan Silas hăng Timôthê pơ plei Athen, Pôl bă hăng tơlơi hil, yua kơ ñu ƀuh plei anŭn bă hăng rup trah. 17Tui anŭn, amăng sang bơjơnum Pôl pơrơjah pơgăl hăng ƀing Yuđa wơ̆t hăng ƀing djuai tuai tui tơlơi đaŏ Yuđa, laih anŭn wơ̆t hăng ƀing mơnuih ñu bưp pơ sang sĭ mia rĭm hrơi. 18Kar kaĭ mơ̆n hmâo đơđa ƀing hrăm lu amăng tơpul Êpikur laih anŭn ƀing Stôik bưp ñu. Đơđa gơñu laĭ: “Hơgĕt pô thâo pơkrưh anai kiăng laĭ?”

Ƀing pơkŏn laĭ: “Rŏ dah pô anai pơtô tơlơi ƀing yang čar tuai,” yua kơ Pôl pơtô Tơlơi Phrâo Hiam Yêsu laih anŭn tơlơi hơdip glaĭ.#17:18 Yêsu laih anŭn tơlơi hơdip glaĭ: Amăng tơlơi Grek, boh pơhiăp “Tơlơi hơdip glaĭ” dưi hluh kiăng laĭ nao anăn kơ sa čô yang đah kơmơi. 19Gơñu mă Pôl hăng ba nao pơ anih bơjơnum Arêôpa, hăng laĭ: “Dưi mơ̆ ih brơi gơmơi thâo hơgĕt tơlơi pơtô phrâo ih hmâo anŭn? 20Yua kơ khul tơlơi ih pơtô gơmơi hmư̆ phara đơi; hnŭn yơh gơmơi kiăng thâo hơgĕt khul tơlơi anŭn kiăng laĭ.” 21Yua kơ abih ƀing mơnuih plei Athen hăng abih ƀing djuai tuai dŏ pơ anŭn kơnơ̆ng hơduah kiăng pơhiăp hăng hmư̆ tơlơi phrâo hling đôč.

22Tui anŭn Pôl dŏ dơ̆ng tơ̆ng krah ƀơi anih arăng pia Arêôpa hăng laĭ: “Ơ ƀing mơnuih plei Athen, kâo ƀuh ƀing gih hur har biă mă amăng tơlơi kơkuh pơpŭ kơ yang. 23Yua kơ tơdang kâo nao djŏp amăng plei ƀing gih laih anŭn kâo lăng khul anih ƀing gih kơkuh pơpŭ, kâo ăt ƀuh mơ̆n ƀơi kơƀang ngă yang ƀing gih hmâo čih boh hră: ‘Kơkuh Yang Ƀu Thâo Krăn.’ Tui anŭn yang ƀing gih kơkuh pơpŭ samơ̆ ƀu thâo krăn ôh, kơ Pô anŭn yơh kâo pơhaih kơ ƀing gih. 24#I Pơtao 8:27; Êsai 42:5; Bruă 7:48.Ơi Adai, Pô hrih lŏn tơnah laih anŭn abih bang mơnơ̆ng amăng anŭn, jing Khua Yang kơ adai hăng lŏn tơnah, ƀu dŏ ôh amăng sang kơkuh pơpŭ tơngan ană mơnuih ngă. 25Ñu ăt kŏn kiăng tơngan ană mơnuih mă bruă brơi kơ Ñu lơi, hrup hăng Ñu kơƀah mơnơ̆ng, yua kơ mơ̆ng Ñu yơh pô brơi tơlơi hơdip, tơlơi suă jua, hăng djŏp mơta mơnơ̆ng pơkŏn kơ ană mơnuih. 26Mơ̆ng sa čô mơnuih, Ñu hmâo pơjing rai abih djuai mơnuih hăng ngă brơi gơñu dŏ tar ƀar lŏn tơnah. Ñu hmâo pơkă brơi rơnŭk ƀing gơñu hơdip hăng guai lŏn anih gơñu dŏ, 27Ñu ngă tui anŭn kiăng kơ gơñu ruaih sư̆, sem hơduah Ơi Adai hăng tơlơi čang rơmang dưi bưp Ñu. Wơ̆t dah Ñu ƀu dŏ ataih hăng rĭm čô amăng ƀing ta ôh. 28Yua kơ,

‘Amăng Ñu ƀing ta dưi hmâo rai, hmâo tơlơi hơdip, tơlơi pơpư̆ hyu.’

Kar hăng đơđa ƀing thâo pơrơtưh ƀing gih hmâo laĭ,

Ƀing ta ăt jing ană tơčo Ñu mơ̆n.

29Tui anŭn, yua kơ ƀing ta jing ƀing ană Ơi Adai, anăm ƀing ta pơmĭn ôh kơ Ơi Adai jing kar hăng hơbŏ rup trah ngă hăng mah, prăk, ƀôdah boh pơtâo mơ̆ng bruă tơngan hăng tơlơi rơgơi ană mơnuih ngă. 30Ơi Adai ƀu tuĕn pioh ôh tơlơi soh rơnŭk mơnuih mlŭk mơgu đưm, samơ̆ ră anai Ñu pơđar kơ abih bang mơnuih dŏ tar ƀar khŏm kơhmal tơlơi soh. 31Yua kơ Ơi Adai hmâo pơkă laih sa hrơi Ñu či brơi sa čô pô Ñu hmâo ruah laih phat kơđi lŏn tơnah hăng tơlơi tơpă. Ñu hmâo ngă gơ̆ng jơlan pơklă laih tơlơi anŭn kơ abih bang mơnuih hăng tơlơi Ñu hmâo pơhơdip glaĭ laih Yêsu mơ̆ng ƀing djai.”

32Tơ gơñu hmư̆ Pôl pơhiăp djơ̆ kơ tơlơi hơdip glaĭ mơ̆ng ƀing djai, đơđa mơnuih djik mưč; samơ̆ ƀing pơkŏn laĭ: “Ƀing gơmơi kiăng hmư̆ ih pơhiăp kơ tơlơi anai sa wơ̆t dơ̆ng.” 33Tui anŭn, Pôl tơbiă hĭ mơ̆ng gơñu. 34Hmâo đơđa đuaĭ tui hăng ñu laih anŭn đaŏ, amăng ƀing anŭn hmâo Denis jing sa čô amăng tơpul ƀing khua phat kơđi Arêôpa, hăng sa čô đah kơmơi anăn gơ̆ jing HʼDamaris, laih anŭn wơ̆t hăng ƀing mơnuih pơkŏn dơ̆ng.

Currently Selected:

Bruă Mơnuă 17: JRA2016

Highlight

Copy