Bruă Mơnuă 12

Hmâo Tơlơi Arăng Ngă Sat Dơ̆ng

1Hlăk anŭn pơtao Hêrôt#12:1 pơtao Hêrôt: Anai jing Hêrôt Agripa I, pô wai lăng abih čar Palestin. čơdơ̆ng ngă sat kơ đơđa mơnuih amăng Phung Sang Ơi Adai. 2Pơtao yua đao pơdjai hĭ Yakơ ayŏng Yôhan. 3Tơ ñu ƀuh tơlơi anŭn ngă mơak kơ ƀing Yuđa, kar kaĭ mơ̆n ñu brơi arăng mă čaŏ Pêtrôs dơ̆ng. Tơlơi anŭn truh hlăk phĕt Ƀañ Tơpŭng Ƀu Hmâo Tơpơi. 4#Tơb 12:1-27.Tơ mă čaŏ laih Pêtrôs, ñu brơi krư̆ hĭ gơ̆ amăng sang mơnă, jao ñu kơ pă khul tơhan gak wai, rĭm khul hmâo pă čô tơhan. Ñu pơmĭn giơ̆ng kơ hrơi phĕt Tơlơi Găn ñu či ba gơ̆ ƀơi anăp ană plei pla. 5Tui anŭn arăng krư̆ hĭ Pêtrôs amăng sang mơnă, samơ̆ Phung Sang Ơi Adai dŏ iâu laĭ kơ Ơi Adai brơi kơ ñu hăng abih pran jua.

Pêtrôs Klaih Mơ̆ng Sang Mơnă

6Mlam hlâo kơ hrơi pơtao Hêrôt kiăng ba gơ̆ pơ anăp ƀing ană plei pla, Pêtrôs dŏ pĭt ƀơi tơ̆ng krah dua čô tơhan, arăng akă hăng dua ară hrĕ čuăk; laih anŭn hmâo tơhan dŏ gak ƀơi anăp bah amăng sang mơnă. 7Plŭt mơtam, sa čô ling jang Khua Yang rai, laih anŭn hmâo tơlơi bơngač pơčrang amăng sang mơnă. Ling jang taih ƀơi djeo Pêtrôs, râo ñu hăng laĭ: “Tơgŭ tañ bĕ!” Laih anŭn hrĕ čuăk tơgloh mơ̆ng tơngan ñu lĕ trŭn hĭ. 8Ling jang laĭ kơ ñu: “Hrăng hơdrăng kơiăng bĕ hăng čŭt klĭ juă ih bĕ.” Pêtrôs ngă tui anŭn. Ling jang laĭ dơ̆ng: “Buh ao phyung ih bĕ hăng đuaĭ tui kâo.” 9Pêtrôs tơbiă hăng đuaĭ tui ñu. Ñu ƀu thâo ôh tơlơi ling jang ngă anŭn jing sĭt, samơ̆ ñu mĭn dah ñu hmâo tơlơi pơƀuh đôč. 10Tơ gơñu găn laih ƀing tơhan gak wai tal blŭng laih anŭn tal dua, gơñu truh pơ amăng jang pơsơi ƀơi jơlan nao pơ plei prŏng. Amăng jang anŭn pŏk mă ñu pô ƀơi anăp gơñu. Dua gơñu tơbiă nao truh pơ jơlan glung; tañ mơtam ling jang lui hĭ Pêtrôs.

11Amlư̆ Pêtrôs thâo hluh tơlơi truh kơ ñu, hăng laĭ: “Ră anai kâo thâo sĭt Khua Yang pơkiaŏ rai ling jang ñu pơklaih kâo mơ̆ng tơngan pơtao Hêrôt laih anŭn mơ̆ng abih tơlơi ƀing Yuđa dŏ čang rơmang.”

12Giơ̆ng kơ ñu dŏ pơmĭn tơlơi anŭn, ñu nao pơ sang HʼMari amĭ Yôhan pơanăn dơ̆ng Markôs. Pơ anŭn hmâo lu mơnuih dŏ pơtŭm hơbĭt iâu laĭ. 13Pêtrôs khŏk bah amăng jang, sa čô ding kơna đah kơmơi anăn ñu HʼRôda tơbiă nao lăng. 14Gơ̆ thâo krăn asăp Pêtrôs, ñu hơ̆k mơak đơi tơl ñu ƀu pŏk bah amăng ôh, samơ̆ ñu mŭt glaĭ laĭ pơthâo kơ arăng Pêtrôs dŏ dơ̆ng ƀơi bah amăng jang. 15Gơñu laĭ: “Ih hưt hă!” Samơ̆ gơ̆ khŭt khăt anŭn jing sĭt. Gơñu laĭ: “Anŭn năng ai ling jang ñu.” 16Samơ̆ Pêtrôs ăt dŏ khŏk nanao bah amăng. Tơ gơñu pŏk hĭ bah amăng laih, ƀuh Pêtrôs gơñu hwĭ kơtuă hling biă mă. 17Samơ̆ Pêtrôs yơr tơngan ngă gru brơi gơñu dŏ rơiăt, giơ̆ng anŭn Pêtrôs ruai glaĭ kơ gơñu hyư̆m tơlơi Khua Yang hmâo pơklaih ñu mơ̆ng sang mơnă. Laih anŭn ñu laĭ: “Laĭ pơthâo bĕ tơlơi anai kơ Yakơ hăng abih bang ƀing adơi ayŏng.” Giơ̆ng anŭn ñu tơbiă nao pơ anih pơkŏn.

18Tơ truh mơguah, hmâo tơlơi rŭng răng prŏng tơ̆ng krah ƀing tơhan, yua kơ gơñu ƀu thâo ôh hơgĕt tơlơi hmâo truh laih kơ Pêtrôs. 19Pơtao Hêrôt pơtă mơnuih hyu sem, samơ̆ ƀu dưi ƀuh Pêtrôs ôh, ñu tơña kơsem kơ ƀing tơhan gak wai, giơ̆ng anŭn pơtă brơi arăng pơdjai hĭ ƀing gơñu. Laih anŭn pơtao Hêrôt lui tring Yuđa nao pơ plei Sêsarê hăng dŏ hĭ pơ anŭn.

Pơtao Hêrôt Djai

20Pơtao Hêrôt hil kơ djuai mơnuih Tir hăng Sidôn; tui anŭn, gơñu sa pran jua nao bưp pơtao. Giơ̆ng gơñu alum pơđur bơmơak hăng Blastus khua wai lăng sang pơtao Hêrôt, gơñu nao rơkâo ngă rơnŭk rơnua, yua kơ čar gơñu hmâo gơnam ƀơ̆ng huă mơ̆ng čar ơi pơtao anŭn. 21Truh hrơi hmâo pơkơčah laih, pơtao Hêrôt buh sum ao pơtao, dŏ ber ƀơi gre pơtao, laih anŭn hmâo tơlơi pơhiăp pơtă hăng gơñu. 22Ƀing ană plei ur kraih hăng laĭ: “Anai jing asăp yang pơhiăp, ƀu djơ̆ asăp mơnuih ôh!” 23Ƀơi mông anŭn mơtam sa čô ling jang Khua Yang taih pơtao Hêrôt, yua kơ ñu ƀu brơi tơlơi ang yang kơ Ơi Adai ôh, laih anŭn hlăt čeo ƀơ̆ng hĭ ñu tơl djai.

24Hlăk anŭn boh pơhiăp Ơi Adai arăng hmư̆ hyu tar ƀar ƀrư̆ hrơi jai lu biă mă.

25Giơ̆ng kơ Barnabas hăng Sôl ngă laih bruă hmâo jao kơ gơñu, gơñu mơ̆ng#12:25 mơ̆ng; hmâo đơđa Hră Ơi Adai Pơhiăp so đưm čih truh pơ. plei Yêrusalem, wơ̆t glaĭ pơ Antiôs, jak ba Yôhan pô arăng pơanăn Markôs.

Currently Selected:

Bruă Mơnuă 12: JRA2016

Highlight

Copy