Luka 6:27-49

“Kweni imwe mukundipulika nkhumuphalirani kuti, temwani ŵarwani ŵinu, muŵachitire uweme awo ŵakumutinkhani. Tumbikani awo ŵakumutembani, romberani awo ŵakumuyuzgani. Uyo wakupamantha ku thama la lwande lumoza, umuzgorere linyakhe. Ndipo uyo wakupoka bachi lako, umupeso na laya wuwo. Yose uyo wakukuromba kanthu, umupe. Ndipo para munthu watora vinthu vyako, ureke kufumba kuti wakuwezgere. Nga ndi umo mukukhumbira kuti ŵanthu ŵamuchitiraninge, ndimo namwe muŵachitirenge.” “Usange mukutemwa awo ŵakumutemwani pera, kasi mukugomezga kuti mupokenge chandulo uli? Pakuti ŵakwananga nawo ŵakutemwa awo ŵakuŵatemwa. Usange mukuŵachitira uweme awo ŵakumuchitirani uweme pera, kasi mukugomezga kuti mupokenge chandulo uli? Pakuti ŵakwananga nawo ndimo ŵakuchitira. Usange mukubwerekeska awo mukuŵagomezga kuti ŵangawezgerapo, kasi pali chandulo uli? Chifukwa ŵakwananga nawo ŵakukongoreska ŵakwananga ŵanyawo mwakuti ŵapokeso umo zikaŵira. Kweni temwani ŵarwani ŵinu, ŵachitirani uweme, ndipo ŵabwerekeskani kwambula kugomezga kuti ŵawezgerengepo. Njombe yinu yiti yiŵenge yikuru, ndipo imwe muti muŵenge ŵana ŵa Chiuta Chikurukuru. Pakuti iyo ngwa lusungu ku ŵambula kuwonga na ŵaheni. Muŵenge na lusungu nga ndi umo Ŵawiskemwe ŵaliri na lusungu.” “Mungeruzganga chara, mwakuti Chiuta wareke kumweruzgani. Mungasuskanga ŵanyinu chara, mwakuti Chiuta wareke kumususkani. Gowokerani, mwakuti Chiuta wamugowokerani. Perekani, ndipo muti mupokerenge. Nadi muti mupokerenge vya kusindirika, vyakusunkhunyika na vyakufuruka. Chifukwa mweso uwo mukuperekerapo, ndiwo mweso uwo muti mupimikirengemo.” Yesu wakaŵatayiraso ntharika wakati, “Kasi wachiburumutira wangarongozga wa chiburumutira munyakhe? Asi wose ŵaŵiri wuwo ŵawenge mu buwu? Musambiri kuti wali pachanya pa musambizgi wakhe chara. Kweni para munthu yose wasambizgika mwakufikapo, wati waŵe nga ndi musambizgi wakhe.” “Chifukwa uli ukulaŵiska chiswaswa icho chili mu jiso la mubali wako, kweni khuni ilo liri mu jiso lako kuti ukulighanaghanako chara? Kasi ungaphalira uli mubali wako kuti, ‘Mubali wane, reka ndifumyemo chiswaswa icho chili mu jiso lako,’ para iwe wamwene kuti ukuwona chara khuni ilo liri mu jiso lako? Wamupusikizgi iwe, udange wafumyamo khuni ilo liri mu jiso lako sono ndipo uti uwonenge makora pakufumya chiswaswa icho chili mu jiso la mubali wako.” “Chifukwa palije khuni liweme ilo likupambika vipambi viheni, panji nesi khuni liheni ilo likupambika vipambi viweme. Pakuti khuni lose likumanyikwa na vipambi vyakhe. Pakuti ŵanthu kuti ŵakuponthora vikuyu mu minga chara, panji nesi kuponthora mpheska mu nthura. Munthu muweme wakufumya uweme kufuma mu viweme ivyo wali kusunga mu mtima wakhe. Ndipo munthu muheni nayo wakufumya uheni uwo ukufuma mu viheni ivyo wali kusunga mu mtima wakhe, pakuti kufuma ku vinandi ivyo vili mu mtima wa munthu, ndivyo mlomo wakhe ukuyowoya.” “Chifukwa uli mukundichema, ‘Fumu, Fumu,’ kweni kuti mukuchita ivyo nkhuyowoya chara? Yose uyo wakwiza kwa ine, na kupulika mazgu ghane, na kughachita, nditi ndimurongorani uyo wakulingana nayo. Iyo wakulingana na munthu uyo wakazenga nyumba yakhe, ndipo wakajima chomene na kuzenga lufura lwa nyumba yira pa jarawe. Para mronga ukatura na kufutukira muwaro ndipo maji ghakhe ghakatimba nyumba yira, kweni kuti ghakasunkhunya chara, chifukwa yikazengeka makora. Kweni uyo wakughapulika waka mazgu ghane ndipo kuti wakughachita chara, wakulingana na munthu uyo wakazenga nyumba pachanya waka kwambula lufura. Mronga ukatura na kufutukira muwaro, ndipo maji ghakhe ghakatimba nyumba yira, ntheura yikawa nyengo yeneiyo. Ndipo kubwanganduka kwakhe kukaŵa kukuru.”