ROM 14
14
Milae kha Byapia Nan
1Zynnaw kya a thawzyapaw kha lehkhan oh, thuasalama zynsei lan umpaw eikunaw kha raekhae nan oh.#Kol 2.16 2Pawccecize ccungccaw abang nynh aepaw miakaw tuh ae lan accan cite a zyn hae, thuasalama a thawzyapaw nynh tuh enaw-rohnaw rou kha nynh a ae. 3Pawpaw balyn a aepaw nynh a ae leipaw kha dothatheih nan sah, te a ae leipaw nynh a aepaw kha byapia nan sah, pawccecize Pachia nynh tuh-e paw tuh lehkhan vae paw nynh thua. 4Ming hae rya a lahtupaw kha bya a piapaw nang tuh hummou na thua? Aning tuh a thadyn zemah, a khuliaku zemah amaw a bawipaw te nynh aseku. Aning tuh thadynsah athua cih, pawccecize Bawipaw nynh aning kha a thadynsah kho.
5Ccungccaw abang nynh nin kheit tuh ccangpaw nin laeze asunghua cite a tua, mingccangpaw nynh nin miakaw tuh phe lokuh lante a tua. Ccungccaw balyn nynh mih thinlung kya tynkaring lan zynkuh hae sah. 6Ninsaw kha a sungpaw ccungccaw tuh Bawipaw sawtuanaw te nynh a sung, ninsaw kha a sung leipaw ccungccaw mah Bawipaw sawtuanaw te nynh a sung khyh; a aepaw ccungccaw mah Bawipaw sawtuanaw te nynh a ae, pawccecize Pachia kalan lungtuabya a ho; te a ae leipaw ccungccaw mah Bawipaw sawtuanaw te ae khyh zah Pachia kalan lungtuabya a ho.
7Aening tuh hum sanmah ahmaw hanlan ah hiin khyh oh, hum sanmah ahmaw hanlan ah chih khyh oh. 8Pawccecize aening tuh ah hiin oh zemah Bawipaw hanlan nynh ah hiin oh; ah chi oh zemah Bawipaw hanlan nynh ah chi oh; tukeiccuze ah hiin oh zemah, ah chi oh zemah Bawipaw kya-e nynh ah thua oh. 9Pawccecize Khri tuh a chihpaw te a hiinpaw parouh kya-e Bawipaw lang tang khylan chih zah a thoothui.
10Pawccemou nang nynh na uno kha bya na pia? Pawccemou na uno kha pawlangria leite na um? Pawccecize aening balyn tuh Pachia a byapianaw tungkhung malang khe ah thadyn cih oh paw nynh thua.#2Ko 5.10 11Pawccecize Ccathyaa kyaze,
“Bawipaw nynh,
‘Kae tuh ka hiin thyhawte,
ccungccaw miakaw nynh
ka malang ccukharu a tung cih hae,
mih munglae raveihte
Pachia kha the a hoysah cih hae,’
a ci,” cite azeikuh.#Isa 45.23 (LXX)
12Tukeiccuze aening lu raveih nynh ahmaw konglang ccazing kha Pachia kalan ah pya cih oh.
Milae kha Khuliasakuh Nan
13Tukeiccuze aening lu kheit te lu kheit byapiakuh nan vae oh sih; uno lu kheit nynh a ccianaw kya thykunawpaw tuhkhyhze khuliakunawpaw kha papin nungkhaw lei lante byapae ccavae oh sih. 14Pawpaw looh sanmah amaw thu lang thu khyh cipaw Bawipaw Jesu liate ccaerarih lan ka ny; thuasalama hankhakheit kha thyaa khyh cite a tuapaw ccungccaw elang tuh tuh-e tuh a hanlan thyaa khyh. 15Na aepaw keiccuze na uno tuh a thinlungcci lanze nang tuh sungsakunaw kya na hiin khyh. Khri nynh a hanlan a chipyapaw ccungccaw kha na aepaw te la roh nan. 16Nae kya-e ahoypaw kha athahpaw hawte thethya la hosah nan oh. 17Pawccecize Pachia peenaw tuh aepaw te niapaw hynh thua leite, Thyaa Muisaw kya dingnaw, daenaw te lungpawnaw nynh thua. 18Pawccecize hynhcite Khri rya a lahpaw tuh Pachia malang nawccaw lan umpaw thua zah ccungccaw hae nynh mah the a hoysah hae. 19Tukeiccuze daenaw a thuakhaepaw uccaw hae te lu kheit te lu kheit laku thawzung lang a tangsahpaw uccaw hae kha deehui oh sih. 20Pachia ryalaw kha looh keiccuze roh nan. Looh miakaw tuh athyaa ccaccing; thuasalama nang nynh na aepaw keiccuze ming hae khuliasaku nawlan a tang lanze nang tuh na sei vae. 21Na uno a khuliasakuhpaw saw aepaw te misutui niapaw kha ae lei, nia leite, pawpaw san cyi leipaw tuh ahmepaw nynh thua. 22Na hoipaw zynnaw tuh Pachia malang namaw hanlan hoi; amaw nynh a nawccawpaw hanlan amaw te amaw seibekuh leipaw ccungccaw tuh lungtuapaw nynh thua. 23Thuasalama lunghiinnaw a hoipaw ccungccaw tuh a ae ze, zynnaw leite a ae keiccu seibe athua; pawccecize zynnaw leite cyipaw miakaw tuh seinaw nynh thua.
Zotung Bible © Bible Society of Myanmar, 2016.