MATTHAI 28
28
Jesu Thoothuinaw
(Mar 16.1-10; Luk 24.1-12; Joh 20.1-10)
1Sabbath nin koute lonaw naw kheit kyaze masaty nin awkhua khuadaetakaw khe Magdala khuanung Mary te ccangpaw Mary tuh shaw do lan a cceih hae. 2Vaekheihmawte myarya rupaw innry yn suekuh; pawccecize Bawipaw vaawpaw nynh vaawlang te yn rung zah shaw athuhfu kha a nue koute a vawlan khe a haung. 3A muinsan tuh khozaw te lokuh zah a boeining tuh vuiraw hawte araw. 4Shaw a rintu hae tuh tuh-e paw raw a ri hae keiccuze thyngkuh hae zah, kharouh chihpaw hawte nynh athua hae. 5Vaawpaw nynh nopi hae kha, “Rih nan oh, nanning nynh a khiade hae paw Jesu kha nynh na ccung oh cipaw ka ny. 6Aning tuh hein kya um vae khyh, a ho hawte a thoothui vae. Rang oh lah a ccynaw hae hmin hynh oun dotua oh. 7Arangte la cceih oh lah a zuitu hae kyakhe, ‘Aning tuh chinaw kyate a thoothui vae; Galilee ram lang nae malang phe cceih vae cih, tuin kya amaw kha na la muih cih oh,’ cite la hopah oh. Nanning kha kae hopya vae oh,” a cipya hae. 8Tukeiccuze nopi hae tuh ri biate, lungtuanaw alepi te shaw kyate rangsakute cceih hae zah a zuitu hae kha hopya khylan a ccue hae. 9Tualeipite Jesu nynh minmin kha yn tungkuh hae zah, “Nae kya daenaw um sah!” a cipya hae. Minmin nynh amaw kalan cceih hae zah a ccu kha pom hae zah a beik hae. 10Jesu nynh minmin kha, “Rih nan oh; cceih oh lah ka uno hae kha Galilee lang ccia lan la hopah oh, tuin kya minmin nynh kae kha yn muih cih hae,” cite a hopya hae.
Shaw Rintu hae kyate Thaesahnaw
11Tuh-e nopi hae a ccia lya hae khe, shaw rintu hae abang nynh khuapi lungkhu lang cceih hae zah acyihkuhpaw balyn kha ranpibawi lepaw hae kya a hopya hae. 12Ranpibawi lepaw hae tuh piccan hae ryte tungkuh hae zah khua a khan kou hae te, rhawkaw hae kha phua patae pya hae zah, 13“Nanning nynh, ‘Khuazi marya kae itheih lyakhe a zuitu hae nynh oun cceih hae zah a rhua kha phe ru hae,’ nae ci cih oh. 14E kong hynh ram uktu nynh yn thae ze kaemaw nynh kae soihbia cih zah vawsaw kae tungsah lan khyh oh,” cite a hopya hae. 15Tukeiccuze minmin nynh phua kha lawkuh hae zah a hopya hae thyhte a cyi hae; e kong hynh Judah hae nynh atunin cia a ho ung hae.
Zuitu hae Ryalaw Nawnaw
(Mar 16.15-18)
16Zuitu hae lu haw lae kheit tuh Jesu nynh a hopya sya hae paw Galilee ram e mua langkhe a cceih hae.#Mat 26.32; Mar 14.28 17Amaw kha he a muih hae te a beik hae; thuasalama abang tuh lunghiinnaw a hoi hae. 18Jesu nynh yn thua zah, “Vaawlang te laephi vawlan e kawhoinaw balyn tuh kamaw kalan pya athua vae. 19Tukeiccuze la cceih oh lah minphuin hae balyn kha zuitu lang la rae oh, Paaw, Ccapaw te Thyaa Muisaw min te baptisma la pya oh.#Loc 1.8 20Kaw kae pya oh paw balyn kha a zui nawlan hae la ccangpah oh; laephi she athang cia nae kya tyty ka um,” cite a zuitu hae kha a hopya hae. Amen.
Zotung Bible © Bible Society of Myanmar, 2016.