MATTHAI 19
19
Zu Myanaw
(Mar 10.1-12; Luk 16.18)
1Jesu nynh tuh-e bya he a ho koute Galilee kyate pou zah Jordan vaw khuraw lang umpaw Judea ram kya a thua. 2Ccungccaw zapi nynh amaw kha zui hae zah tuin kya minmin kha a dansah hae.
3Farasi hae abang nynh amaw kalan oun thua hae zah amaw kha syntawtua khylan, “Pisepaw nynh a zu kha pawpaw kong zemah mya lan kawbya nynh a ua tou?” cite a khia hae. 4Te Jesu nynh, “Atakaw lyaze raetu nynh ‘pise te nopi kha a rae hae,#Gen 1.27, 5.2 5hynh-e keiccuze pise nynh a paaw te a nung kha a cciataw cih zah a zu te a umkheih cih hae, minmin lu ning tuh pyn pynkheit lang a tang cih hae,’ acikuhpaw kha na ria boi khyh oh tou?#Gen 2.24 6Tukeiccuze minmin tuh lu ning thua vae khyh hae, pyn pynkheit nynh athua vae hae. Tukeiccuze Pachia nynh a suelua vae paw kha humhung nynh mah phia nan sah,” a ci. 7Minmin nynh, “Tuhteze pawccemou Moses nynh zu te vaw myakunawpaw ccaw kha pya lan zah zu kha mya lan cite kaw oun pya?” a cipya hae.#Deu 24.1-4; Mat 5.31 8Jesu nynh, “Nae thinlung akhung keiccuze Moses nynh nae zu hae kha mya lan ae ua oh; thuasalama atakaw lya tuh tuhte thua khyh. 9Te kae hopya oh, humhung zemah ohhuakunaw keiccu thua leite a zu kha mah zah ccangpaw zu a hoipaw tuh milae zu a seikhaepaw nynh thua; te humhung zemah a mya hae paw nopi kha a zu lang a hoikuhpaw tuh milae zu a seikhaepaw nynh thua,” a cipya hae.#Mat 5.32; 1Ko 7.10-11
10A zuitu hae nynh, “Zu te vaw kong hynh tuhcite athua ze, zu hoi leite um lanze ahoyhua,” a cipya hae. 11Thuasalama Jesu nynh, “E ccangpyanaw hynh ccungccaw miakaw nynh lawkuh kho khyh hae; tuh-e tuh mih hanlan pya athua hae paw rou nynh a lawkuh kho hae. 12Pawccecize abang tuh a pui takaw hae mawte akuchihpaw a um hae; abang tuh ccungccaw hae nynh tinria hae paw a um hae; vaawlang peenaw keiccuze mimaw te mimaw tinreihkuh hae paw a um hae. E bya hynh a lawkuh khopaw nynh lawkuh sah,” cite a hopya hae.
Jesu te Imua hae
(Mar 10.13-16; Luk 18.15-17)
13Imua hae tungvaw kya Jesu nynh a kuih khangte saw a sangpya ccaw hae cite amaw kalan oun cciakhae hae zah, a zuitu hae nynh minmin kha a pe hae. 14Thuasalama Jesu nynh, “Imua hae kha ka kalan oun cceih hae sah, khee nan oh; pawccecize vaawlang peenaw tuh hynhcihawpaw ccungccaw hae elang nynh thua,” a ci. 15Imua hae tungvaw kya a kuih a khang koute tuin kyate a cceih.
Mihoi Ccangvaepaw
(Mar 10.17-31; Luk 18.18-30)
16Ccungccapaw lu kheit nynh Jesu kalan yn thua zah, “Sazae, zungzae hiinnaw ka hoi nawlan paw uccaw hoypaw mou ka cyih cih?” cite a khia. 17Jesu nynh, “Pawccemou uccaw hoypaw kong tuh nae khia? Pachia lu kheit kyalya nynh a hoypaw a um; hiinnaw lungkhu lang na tee ry zetuh kawbya hae kha la zui,” a cipya. 18Aning nynh, “Paw kawbya hae kha mou?” cite a khia. Jesu nynh, “Ccungccaw na theih lan khyh, milae zu milae vawpaw kya na sei lan khyh, na ruh lan khyh, ahme leipaw ccaekia lang na tang lan khyh,#Exo 20.13-16; Deu 5.17-20 19na paaw te na nung kha sawtua, na innpaw kha namaw na sungsaku hawte na sungsah cih, cikuhpaw kha,” a cipya.#Exo 20.12; Deu 5.16; Lev 19.18 20Ccangvaepaw nynh, “E hae balyn tuh pong ka zui vae; pawmou ka bou ung?” a cipya. 21Jesu nynh, “Accingpaw ccungccaw lang na tang ry ze, cceih lah na hoipaw kha zua lah, ryachi hae kha la pya hae; tetuh vaawlang khua kya sisua na hoi cih, te yn cceih lah kae hynh yn zui,” a cipya. 22Ccangvaepaw nynh tuh-e bya tuh he a thae te ngaethyate a cceih, pawccecize aning tuh uccaw patae a hoi keiccu nynh thua.
23Te Jesu nynh a zuitu hae kha, “Byaccaccing kae hopya oh, mihoipaw hanlan vaawlang peenaw kalan tee lanpaw tuh kou aru. 24Te bua kae hopya oh, mihoipaw nynh Pachia peenaw kalan tee lae tuh kalauh nynh phynbang khu kya tee nynh azoihua,” a cipya hae. 25A zuitu hae nynh tuh-e bya he a thae hae tuh myaryamaw mih ngaeangthua zah, “Tuhteze hummou khumnaw tuh a mue kho cih?” a ci hae. 26Thuasalama Jesu nynh minmin kha do hae zah, “Ccungccaw hanlan tuh hynh-e hynh thua kho khyh, thuasalama Pachia hanlan tuh pawpaw balyn athua kho,” a ci.
27Tetuh Peter nynh, “Dotua, kaening tuh pawpaw balyn kae cciataw zah namaw kha kae zui vae, tukeiccuze pawmou kae mue cih?” a cipya. 28Jesu nynh, “Byaccaccing kae hopya oh, atyn-are balyn bua raethuinaw ccyh kya Ccungccaw Ccapaw nynh a phu-enaw bawitungkhung kya he yn haung te kae nae zui oh paw nanning mah bawitungkhung haw lae ning kya nae haungbua cih oh zah, Israel phin haw lae ning kha bya nae pia cih oh.#Mat 25.31; Luk 22.30 29Te ka min keiccuze inn hae, uno hae, ccianung hae, paaw, nung, zu, ccaaw hae, loo hae, tuh-e hae hankhakheit kha a cciatawpaw tuh leit za kheit a mueru cih zah zungzae hiinnaw rho a ccou cih. 30Thuasalama masaty e ccungccaw patae tuh nyathyakou athua cih hae zah nyathyakou e patae tuh masaty athua cih hae.#Mat 20.16; Luk 13.30
Zotung Bible © Bible Society of Myanmar, 2016.