MATTHAI 17
17
Jesu Muinsan Rulaekunaw
(Mar 9.2-13; Luk 9.28-36)
1Nin taruh acih koute Jesu nynh Peter, James te a neitaw Johan kha hoeibua hae zah mih makhaete ahangpaw mua lang a kae hae.#2Pe 1.17-18 2Mih malang khe Jesu tuh a muinsan yn rulaekuh; a mae tuh khuanin hawte phaephae ak zah a boeining tuh lahlah ak lan araw. 3Moses te Elijah tuh vaekheihmawte mih kya oun langkuh hae zah Jesu ryte bya a hokuh hae. 4Tetuh Peter nynh Jesu kha, “Bawipaw, hein kya um tuh ah hanlan ahoy, na ry ze hein kya kae nynh bu buthum kae sak sah, nang na hanlan bu kheit, Moses hanlan bu kheit, Elijah hanlan bu kheit,” a cipya. 5Tuhte a ho cciamang lyakhe a awpaw maeking nynh minmin kha pong zithin hae zah maeking kyate roi nynh, “E paw tuh ka lungry kou yn tungpaw, ka sungsahpaw ka Ccapaw nynh thua, amaw bya kha la ngae oh!” a ci.#Gen 22.2; Deu 18.15; Sam 2.7; Isa 42.1; Mat 3.17, 12.18; Mar 1.11; Luk 3.22 6Zuitu hae nynh tuh-e roi tuh he a thae hae te, myarya rih hae zah a bakhung hae. 7Jesu nynh yn cceih zah minmin kha hae hae zah, “Thokuh oh, rih nan oh,” a cipya hae. 8Minmin nynh he a dothung hae tuh Jesu kyalya muih hae zah tuhlaepaw hum sanmah muih vae khyh hae.
9Minmin nynh mua kyate oun rungbung lya hae khe Jesu nynh, “Ccungccaw Ccapaw tuh a chih hae paw kyate a thoothui mawlaezung na muih oh paw vizin hynh hum kya sanmah la ho nan oh,” cite zuitu hae kha kaw a pya hae. 10Zuitu hae nynh Jesu kha, “Pawccemou kawbya sazae hae nynh Elijah tuh yn thuaty cih a ci hae?” cite a khia hae.#Mal 4.5 11Jesu nynh, “Elijah tuh yn thuaty ccaccing cih zah pawpaw balyn kha a paccyn ty cih. 12Thuasalama kae hopya oh, Elijah tuh phe thua vae, tuhzemah ccungccaw hae nynh amaw kha nyh khyh hae zah, a tungvaw mih rythyte a cyi hae. Tuhawte Ccungccaw Ccapaw mah minmin kuih kya yn teingbua cih,” a cipya hae.#Mat 11.14 13Tetuh zuitu hae nynh Baptisma pyatu Johan kong nynh a ho cipaw a thaethya vae hae.
Imuapaw A Dansah
(Mar 9.14-29; Luk 9.37-43)
14Ccungccaw zapi kya he a thua hae te, ccungccapaw lu kheit tuh Jesu kalan yn thua zah a malang khe a ccukharutung zah, 15“Bawipaw, ka ccapaw hynh ngaethya beih umsah, pawccecize aning tuh dungpaw ccinaw hoi zah myarya a teing; accyhccyh vae ze maee lungkhu lang phungkuh zah accyhccyh vae ze tui lungkhu lang a phungkuh. 16Na zuitu hae kalan ka cciakhae zahmah dansah kho khyh hae,” a cipya. 17Jesu nynh, “Pou zynnaw hoi lei hae paw te a ccouseikuh hae paw ciihan hae, hohseciamou nae kya ka um ung cih? Hohseciamou kae ngaesangpah ung cih oh? Imuapaw kha ka kalan oun cciakhae oh,” a cipya hae. 18Jesu nynh raerangsaro kha kawpya zah imuapaw lungkhu te a pou; te imuapaw tuh tuin ccyh kyate palou a dan vae. 19Tetuh zuitu hae nynh mih makhaete Jesu kalan oun cceih hae zah, “Pawccemou raerangsaro kha kae dee kho khyh?” cite a khia hae. 20Te Jesu nynh, “Nae zynnaw azya keiccu nynh thua. Pawccecize byaccaccing kae hopya oh, mungngia mung cia zynnaw na hoi oh zetuh e mua hynh, ‘E kyate khuhlang khuin nuekuh,’ na ci oh ze a nuekuh cih; na cyi kho lei oh paw pawpaw mah um lan khyh.#Mat 21.21; Mar 11.23; 1Ko 13.2 21Tuhzemah e tahawpaw raerangsaro tuh looh-ae sungnaw te sawsangnaw kyalya nynh a dee kho,” a cipya hae.
A Chi lanpaw Bua A Hoty
(Mar 9.30-32; Luk 9.44-45)
22Galilee kya zuitu hae ryte a umkheih lya hae khe Jesu nynh, “Ccungccaw Ccapaw tuh ccungccaw hae kuih kalan apnaw ccyh anae vae, 23minmin nynh oun theih cih hae zah nin thumnaw kya yn thoothui cih,” a cipya hae. Minmin tuh myaryamaw mih ngaethah.
Beikinn Ngunto Khoinaw
24Minmin Kapernaum khua he a thua hae tuh beikinn ngunto a khoi hae paw nynh Peter kalan oun thua hae zah, “Nae sazaepaw hynh beikinn ngunto pya khyh tou?” cite a khia hae.#Exo 30.13, 38.26 25Peter nynh, “A pya,” a ci. Peter nynh innthung lang he yn tee tuh Jesu nynh cciadue zah, “Simon, pawtemou na tua? Laephi siapharan hae nynh hum hae kya-e mou ngunto kha a lawku hae? Mimaw mih ccaaw hae kya-e tou? Tuhkhyhze milae hae kya-e tou?” cite a khia. 26Peter nynh, “Milae hae kya-e nynh a lawku hae,” a ci. Jesu nynh, “Tuhteze ccaaw hae tuh a lue hae. 27Tuhzemah minmin tuh aening keiccuze a cyisei khyh ccaw hae, rili kalan la cceih lah ngasaw la baw, te na baw typaw ngasaw kha a khalang la kei lah phua shekel ccangkheit na la muih cih, tuh-e phua tuh la lah lah, namaw te kamaw hanlan la pya hae,” a cipya.
Zotung Bible © Bible Society of Myanmar, 2016.