MATTHAI 15
15
Anungsikuhpaw Uccaw hae
(Mar 7.1-23)
1Te Jerusalem khua e kawbya sazae hae te Farasi hae tuh Jesu kalan oun thua hae zah, 2“Pawccemou na zuitu hae nynh langmaw e piccan hae phung kha a lawe hae? Pawccecize minmin nynh looh a ae maw hae mih kuih singkuh khyh hae,” a cipya hae. 3Jesu nynh minmin kha, “Pawccemou nanning so nae phung keiccuze Pachia kawbya kha na lawe oh? 4Pawccecize Pachia nynh, ‘Na paaw te na nung kha sawtua hae; humhung zemah a nung thuasah, a paaw thuasah thya a lawpaw tuh chia thua sah,’ a ci.#Exo 20.12, 21.17; Deu 5.16; Lev 20.9 5Thuasalama nanning nynh, humhung zemah a paaw thuasah, a nung thuasah, ‘Pawpaw zemah kamaw liate na mue lanpaw bawmnaw tuh Pachia uccaw nynh thua,’ a ci ze, 6a paaw thuasah, a nung thuasah sawtua ho vae khyh, na ci oh. Tuhcite naemaw phung keiccuze Pachia bya kha pawlang na ria khyh oh. 7Thyaphe hae! Nanning konglang hynh Isaiah nynh hmerarih lan a la hoty vae. A hopaw tuh:
8‘E ccungccaw hae nynh
mih munglae te saw oun tua hae;
thuasalama mih thinlung tuh
ka kyate asawkuh.#Isa 29.13 (LXX)
9Ccungccaw phung kha
Pachia phung lang
a ccangpya hae keiccuze
kae yn beik hae paw tuh
accakaepaw nynh thua,’ a ci,” cite a hopya hae.
10Te Jesu nynh ccungccaw zapi kha ko hae zah, “Ngae oh lah thaethya oh: 11Khalang lungkhu lang a teepaw nynh ccungccaw kha thusah khyh; thuasalama khalang kyate yn poupaw nynh ccungccaw kha a thusah,” a cipya hae. 12Te a zuitu hae nynh a kalan oun naekuh hae zah, “Na hopaw bya he a thae hae te, Farasi hae tuh mih thinria cipaw na nyh tou?” a cipya hae. 13Thuasalama Jesu nynh, “Vaawlang umpaw ka Paaw nynh a lin leipaw aku miakaw tuh marya khaee athua cih. 14Minmin tuh khamawte um hae sah; minmin tuh mitmoh hae a cciakhaetu hae mitmoh hae nynh thua hae. Te mitmohpaw nynh mitmohpaw kha a cciakhae ze parouhte hunghua lungkhu lang a ccah cih hae,” a ci.#Luk 6.39 15Peter nynh, “E tousenaw phungpaw hynh kaening oun ccaesahpya tua,” a cipya. 16Jesu nynh, “Nanning so thaethya leite tou na um ung oh? 17Khalang lungkhu lang a teepaw miakaw tuh vue lungkhu lang cceih zah atolang po a toikuh cipaw na nyh khyh oh tou? 18Thuasalama khalang lungkhu te yn poupaw uccaw tuh thinlung kyate yn poupaw thua zah, tuh-e nynh ccungccaw kha a thusah.#Mat 12.34 19Pawccecize ahoy leipaw tuanaw hae, ccungccaw chianaw, milae zu milae vawpaw seikhaenaw, ohhuakunaw, ahme leipaw ccaekiakhannaw, runaw te milae thethya honaw tuh thinlung kyate nynh yn pou. 20E uccaw hae hynh nynh ccungccaw kha a thusah; thuasalama kuih singku leite aepaw nynh tuh ccungccaw kha thusah khyh,” a ci.
Kanaan Nopinung Zynnaw
(Mar 7.24-30)
21Te Jesu tuh tuin kyate pou zah Tair te Sidon ram lang a cceih. 22Tuin ram kya umpaw Kanaan nopinung lu kheit nynh yn thua zah, “Pou Bawipaw, David Ccapaw, kae hynh ngaethya yn umsah; ka ccanung tuh raerangsaro nynh vawsawnaw myarya a pya,” cite a sia. 23Thuasalama Jesu nynh bya kaw kheit san khung khyh. A zuitu hae nynh a kalan oun cceih hae zah, “E nung hynh po dee, pawccecize ah nulang te oun zui zah palei a sia,” cite a ngia hae. 24Jesu nynh, “Israel hae kyaze azopaw tuu hae kalan rou nynh kae hynh yn saw,” a ci. 25Te tuh-e nung nynh yn cceih zah a malang bakhung zah, “Bawipaw, beih yn bawm!” a cipya. 26Jesu nynh, “Ccaaw hae looh kha law lan zah ui hae kha vuapya lan ccan khyh,” a cipya. 27Te tuh-e nung nynh, “Bawipaw, na hopaw tuh ahme, tuhzemah ui hae nynh mih bawi hae ccaboi kyate accahpaw loohmoi kha a ae hae khaw,” a ci. 28Tetuh Jesu nynh, “Pou nopinung, na zynnaw tuh ale raria! Na ry hawte na kya cyihkuh sah,” a cipya. A ccanung tuh tuin ccyh kyate phe dan vae.
Ccungccaw Patae A dan hae
29Jesu tuh tuin kyate cceih zah Galilee Rili pe lang a thua; te mua langkhe kaethung zah tuin kya a haung. 30Te myarya lungpaw ccungccaw zapi nynh a mitmohpaw, a ccukhoupaw, byaho kho leipaw, a kuihccu khyn leipaw te ccangpaw ngeccih patae kha oun thuakhae hae zah Jesu cculeihpaw khe a nung hae, te Jesu nynh minmin kha a dansah hae. 31Tuhcite byaho kho leipaw nynh bya yn ho, kuihccu khyn leipaw nynh yn dan, ccukhoupaw nynh laanpi cceih zah mitmohpaw nynh ngaw a muihpaw kha ccungccaw zapi nynh he a muih hae tuh mih ngaeangthua; te minmin nynh Israel Pachia kha a phu-esah hae.
Thong Pali Looh A Dang hae
(Mar 8.1-10)
32Jesu nynh a zuitu hae kha amaw kalan ko hae zah, “Ccungccaw zapi hynh thaw ka ccih hae, pawccecize minmin tuh kamaw kya nin thum um vae hae zah ae lanpaw hoi vae khyh hae, minmin hynh ae leite ka cciasah ry khyh hae, tuhte cciasah lan hae ze laanpi kya a bawsei cih hae,” a cipya hae. 33A zuitu hae nynh, “Hynhzeih ccungccaw zapi dang lanpaw looh tuh phe zaw lan ramkaw kyahin paw kyate mou kae mue cih?” a ci hae. 34Jesu nynh minmin kha, “Sanlou hohzeihmou na hoi oh?” cite khia hae zah minmin nynh, “Phe sari te ngasaw taraw beihtaraw nynh kae hoi,” a ci hae. 35Tetuh Jesu nynh ccungccaw zapi kha laekhu kya haung lan kaw a pya hae. 36Te aning nynh sanlou phe sari te ngasaw hae kha lah zah lungtuabya a ho koute tuh-e hae tuh eih zah a zuitu hae kha a pya hae, te zuitu hae nynh ccungccaw zapi kha a nee hae. 37Mih balynte ae hae zah a byn hae; minmin nynh a eihpaw alaepaw kha khuin hae zah kee sari phe abeih. 38A aepaw tuh nopi hae te imua hae riabia leite pise hae thong pali acih hae. 39Jesu nynh ccungccaw zapi kha a cciasah kou hae te kohlung kha ccikuh zah Magadan ram lang a cceih.
Zotung Bible © Bible Society of Myanmar, 2016.