MATTHAI 13
13
Ccacii Vuatu Tousenaw
(Mar 4.1-9; Luk 8.4-8)
1Tuin nin kyakhe Jesu tuh inn kyate pou zah rili kin khe a haung. 2Myarya lungpaw ccungccaw zapi nynh amaw kalan oun sueluakuh hae keiccuze Jesu tuh kohlung lungkhu lang tee zah a haung; te ccungccaw zapi balyn tuh varang langkhe a thadyn hae.#Luk 5.1-3 3Te Jesu nynh minmin kha tousenaw phungpaw hae te bya patae a hopya hae. A hopaw tuh: “Ngaetua oh! Ccacii vuatu lu kheit tuh ccacii vua lan a cceih. 4Ccacii kha vua zah, ccacii abang tuh laanpi pe khe ccah zah pavaw hae nynh oun thuanua hae zah karyh a tuh hae. 5Abang tuh laephi zya zah lungpyng alungnaw kya accah; laephi thaawkalae a ci khyh keiccuze taloi a po hae. 6Thuasalama khuanin he yn thua tuh, tharui a saw khyh keiccuze karae arou hae. 7Abang ccacii tuh hinpaw laku ccah zah hinpaw nynh lethin zah phang a lungde. 8Thuasalama ccangpaw ccacii hae tuh lae hoy kya ccah hae zah abang tuh leit za kheit, abang tuh leit sung taruh, abang tuh leit sung thum avoi. 9Thaenaw nakaring a hoipaw tuh thae sah!” a ci.
Tousenaw hae Eenaw
(Mar 4.10-12; Luk 8.9-10)
10Te zuitu hae nynh amaw kalan oun cceih hae zah, “Pawccemou tousenaw phungpaw hae te minmin kha na hopya hae?” cite a khia hae. 11Jesu nynh khung hae zah, “Pawccecize nanning tuh vaawlang peenaw kya-e byakhupaw nynaw kha pya na thua oh, thuasalama minmin tuh pya thua khyh hae. 12Pawccecize a hoipaw ccungccaw kha pyachih athua cih zah patae a hoi cih; thuasalama a hoi leipaw ccungccaw tuh a hoi thypaw maw kha lawpya athua cih.#Mat 25.29; Mar 4.25; Luk 8.18, 19.26 13Tukeiccu nynh minmin kha tousenaw phungpaw hae te ka hopya hae; pawccecize minmin tuh a do hae zemah muih khyh hae, a ngae hae zemah thae khyh hae, thae mah thaethya khyh hae. 14Te Isaiah nynh a la hopaw bya tuh minmin kya accing vae; a la hopaw tuh:
‘Ngae tuh na ngae cih oh zah
kharouh na thaethya lan khyh oh;
do tuh na do cih oh zah
kharouh na muih lan khyh oh.#Isa 6.9-10 (LXX)
15Pawccecize hynh-e ccungccaw hae
thinlung tuh marae aping,
mih nakaring tuh phe apan,
kae mit te kae muih khyh ccaw cite
phang masi hae.
Tuhkhyhze tuh mih nakaring nynh a thae cih zah,
mih lung nynh a nyhthya cih,
te ka kalan oun maekuh cih hae zah
minmin kha phe ka dansah cih hae paw,’ a ci.
16Thuasalama nanning tuh nae mit nynh ngawmuih zah nae nakaring nynh naw a thae keiccuze lungtua hae paw nynh na thua oh.#Luk 10.23-24 17Byaccaccing kae hopya oh, profeh hae patae te adingpaw ccungccaw hae nynh na muih oh paw uccaw hae hynh muih a ry hae zemah muihbua khyh hae; na thae oh paw hynh thae a ry hae zemah thaebua khyh hae.
Ccacii Vuatu Ccaesahnaw
(Mar 4.13-20; Luk 8.11-15)
18“Tukeiccuze ccacii vuatupaw tousenaw phungpaw kong hynh ngaetua oh. 19Lukhakheit nynh peenaw kong hopaw bya kha he a thae tuh thaethya khyh, te mihoy leipaw nynh yn thua zah a thinlung kya vuapaw ccacii kha dae a lawpya. Tuh-e tuh laanpi pe vuapaw ccacii kha nynh thua. 20Lung alungnaw kya vuapaw ccacii tuh thehoypaw bya kha thae zah vaekheihmawte lungtuate a lawkuhpaw kha nynh thua. 21Tuhzemah aning tuh tharui hoi khyh zah sosoh rou nynh atyn; thehoypaw bya keiccuze vawsawnaw te tuaasahkunaw he yn um tuh a lung palou thang. 22Hinpaw hae laku vuapaw ccacii tuh thehoypaw bya kha thae salamah laephi vawlan thinphangnaw te hoirum rynaw nynh tuh-e bya tuh phang lungde zah athae thae kho vae khyh. 23Thuasalama lae hoypaw kya vuapaw ccacii tuh thehoypaw bya kha thae zah a thaethyapaw ccungccaw nynh thua; athae kha thae zah abang tuh leit za kheit, abang tuh leit sung taruh, abang tuh leit sung thum a pousahpaw ccungccaw kha nynh thua,” a ci.
Looh te Lonua Tousenaw
24Jesu nynh ccangpaw tousenaw phungpaw a hopya hae paw tuh: “Vaawlang peenaw tuh a loo kya ccacii hoypaw a vuapaw ccungccaw te nynh aloku. 25Ccungccaw hae a i lya hae khe a rhawpaw nynh yn cceih zah looh hae kyakhe lonua mung hae kha vua zah a cciataw. 26Thuasalama looh tuh yn po zah avui he yn pou tuh lonua hae mah oun langkuh bua hae. 27Tukeiccuze inn hoitu a see hae nynh a kalan oun cceih hae zah, ‘Bawipaw, na loo kya ccacii hoypaw khaw na vua? Paw kyate mou lonua hae hynh oun pou hae?’ cite a khia hae. 28Tuh-e paw nynh, ‘Rhaw lu kheit nynh e hynh a cyih,’ a cipya hae. See hae nynh, ‘Tuhteze kaening nynh kae la ccianua sah lah, lonua hae kha kae la khaee ze na ry tou?’ a ci hae. 29Thuasalama aning nynh, ‘Tuhte thua khyh, lonua hae na khaee lya oh khe, looh kha na khaeebia sei cih oh. 30Loohrue ccyh azaw makhia pynkheihlan lekheih hin hae sah; loohrue ccyh kya loohruetu hae kha, Nanning nynh lonua hae kha khaee ty oh lah maee te soi khylan tung oh, te looh kha ka byng lungkhu lang ruin oh,’ ka cipah cih hae,” a cipya hae.
Mungngia Cii Tousenaw
(Mar 4.30-32; Luk 13.18-19)
31Jesu nynh ccangpaw tousenaw phungpaw a hopya hae paw tuh: “Vaawlang peenaw tuh ccungccapaw lu kheit nynh mungngia cii kha lah zah a loo kya a vuapaw te nynh aloku. 32Mungngia cii tuh ccacii hae balyn kyaze adih huapaw nynh thua; thuasalama tuh-e nynh he yn le vae tetuh enaw-eho hae lakuze ale huapaw lang te thingku lang phe a tang; te vaawlang e pavaw hae nynh oun zou hae zah tuh-e aran hae kyakhe bu a luaku hae,” a ci.
Ransi Tousenaw
(Luk 13.20-21)
33Ccangpaw tousenaw phungpaw a hopya hae paw tuh: “Vaawlang peenaw tuh ransi te nynh aloku; nopi lu kheit nynh ransi kha lah zah vaepoi ke kethum kya phing zah, tuh-e vaepoi phe a thosahpaw ransi te nynh aloku,” a ci.
34E akonglang hae balyn hynh Jesu nynh ccungccaw zapi kha tousenaw phungpaw hae te a hopya hae; tousenaw phungpaw leite minmin kha bya hopah khyh hae. 35Tuh-e tuh profeh nynh,
“Ka khalang ka aw cih zah
tousenaw phungpaw hae kha
ka ho cih, laephi tho takaw kyate
thuruhpaw uccaw hae kha
ka ho cih,”
cite a hopaw bya accing nawlan nynh thua.#Sam 78.2
Lonua Tousenaw Ccaesahnaw
36Jesu nynh ccungccaw zapi kha cciataw hae zah inn lungkhu lang a tee; a zuitu hae nynh amaw kalan oun thua hae zah, “Loo kya-e lonua hae tousenaw phungpaw kong kha asuilan beih oun hopya tua,” a cipya hae. 37Jesu nynh, “Ccacii hoypaw a vuatupaw tuh Ccungccaw Ccapaw nynh thua. 38Loo tuh laephi nynh thua; ccacii hoypaw tuh peenaw ccaaw hae nynh thua; lonua hae tuh mihoy leipaw ccaaw hae nynh thua. 39Tuh-e lonua mung hae a vuapaw rhaw tuh Satan nynh thua; loohrue ccyh tuh laephi she athangnaw nynh thua; te loohruetu hae tuh vaaw hae nynh thua hae. 40Tukeiccuze lonua hae tuh suelua hae zah maee kya a soi hae hawte laephi she athangnaw kya acyikuh bua cih. 41Ccungccaw Ccapaw nynh a vaawccungccaw hae kha yn saw cih hae zah ccungccaw seinaw a raesah hae paw te hoyleinaw a rae hae paw balyn kha a peenaw kyate oun suelua cih hae. 42Te minmin kha maeephupi lungkhu lang a phung cih hae, tuin kya rawkhuinaw te hawzynaw a um cih. 43Te adingpaw ccungccaw hae tuh mih Paaw peenaw kya khuanin hawte a paw vae cih hae. Thaenaw nakaring a hoipaw tuh thae sah!
Thurupaw Sisua Tousenaw
44“Te vaawlang peenaw tuh loo kya thuruhpaw sisua te nynh aloku; tuh-e tuh ccungccapaw nynh he a muih tuh zya a thuruh, te tuh-e elang lungtuanaw te cceih zah a hoipaw balyn kha zua zah tuh-e loo tuh a re.
Palee Tousenaw
45“Vaawlang peenaw tuh myarya ahoypaw palee hae a ccungkuhpaw kungkupaw te nynh aloku. 46Tuh-e paw nynh myarya aphutepaw palee kha he a muih tuh, cceih zah a hoipaw balyn kha zua zah tuh-e palee tuh a re.
Mia te Ngasaw Tousenaw
47“Te vaawlang peenaw tuh: rili lungkhu lang vua hae zah ngasaw aphuinphuin a kyngpaw mia te nynh aloku. 48Ngasaw te he abeih tuh ngasaw kyngtu hae nynh mia kha varang langkhe a sue hae, te haung hae zah ahoypaw ngasaw hae kha shua lungkhu lang sang hae zah ahoy leipaw kha a vua hae. 49Tuh-e hawte laephi she athangnaw kya athua cih; vaaw hae nynh oun rung cih hae zah ccungccaw hoylei hae paw kha miding hae laku kyate thoh a phia cih hae. 50Minmin kha maeephupi lungkhu lang a vua cih hae; tuin kya rawkhuinaw te hawzynaw a um cih,” a ci.
51Jesu nynh, “E bya hae balyn hynh na thaethya oh tou?” cite zuitu hae kha a khia hae. Minmin nynh, “Kae thaethya,” a ci hae. 52Te Jesu nynh, “Tukeiccuze vaawlang peenaw kong ccangpya athua vae paw kawbya sazae miakaw tuh amaw a sisua bawng lungkhu te athawpaw te arynpaw uccaw hae yn thuakhaepaw inn hoitupaw te nynh aloku,” a cipya hae. 53Jesu nynh tuh-e tousenaw phungpaw hae kha he a ho koute tuin kyate a pou.
Nazareth kya Jesu A Vua hae
(Mar 6.1-6; Luk 4.16-30)
54Te amaw a khua lang he a thua tuh a khuaccaaw hae kha mih sinakok kyakhe a ccangpya hae; minmin tuh myarya mih ngaeangthua zah, “E paw nynh paw kyate mou hynh-e hawnaw te e ngaeangnaw rae khonaw hynh a mue? 55E paw tuh lehccamapaw ccapaw thua khyh tou? A nung tuh Mary ci hae paw thua khyh tou? A neitaw hae tuh James, Joses, Simon te Judas thua khyh hae tou? 56Te a ccianung hae tuh mih balynte aening ryte a um hae paw kha thua khyh tou? Tuhteze paw kyate mou e paw nynh e uccaw hae balyn hynh a mue?” a ci hae. 57Tuhcite minmin nynh amaw kha a vua hae. Thuasalama Jesu nynh minmin kha, “Profeh hae tuh mimaw khua te mih innbyn kya holeite tuh sawtua leite um khyh hae,” a cipya hae.#Joh 4.44 58Minmin nynh a zyn khyh hae keiccuze Jesu nynh tuin kya ngaeangnaw patae rae khyh.
Zotung Bible © Bible Society of Myanmar, 2016.