MATTHAI 11
11
Johan nynh Jesu A Khiasah hae
(Luk 7.18-35)
1Jesu nynh a zuitu hae lu haw lae ning kha phe thang lan a hopah kou hae te, tuin pepan e khua hae kya ccangpya khylan te phungho khylan tuin kyate a cceih.
2Johan nynh thonginn kyate Khri a ryalawnaw kong kha he a thae te, a zuitu hae kha saw hae zah, 3Jesu kha, “Nang hynh yn thua cih paw tuh na thua tou? Tuhkhyhze mingccangpaw tou kae ngaw ung cih?” cite bya a khiasah hae. 4Jesu nynh minmin kha, “La cceih oh lah na muih oh paw te na thae oh paw kha Johan la hopah oh. 5Mitmoh hae nynh ngawmuih hae zah ccukhou hae nynh a cceih kho vae hae, vaethyakae hae paw a dan hae, nawpan hae nynh nawthae hae zah michi hae tuh thoosah athua hae, ryachi hae kalan thehoypaw tuh hopya athua.#Isa 35.5-6, 61.1 6Kae ka keiccuze a lungroh leipaw ccungccaw tuh lungtuapaw nynh thua,” a cipya hae.
7Te minmin he a cceih hae te, Jesu nynh Johan konglang kha ccungccaw zapi kya a hopya hae paw tuh: “Nanning nynh paw do khylan mou ramkaw lang na ccia oh? Khisan nynh a hepaw phaeku do khylan tou? 8Tuhkhyhze paw do khylan mou na ccia oh? Boeining hoypaw a lawkuh hae paw kha do khylan tou? Dotua oh, boeining hoypaw a lawkuh hae paw tuh siapharan inn kya nynh leih a um hae. 9Tuhkhyhze paw do khylan mou na ccia oh? Profehpaw do khylan tou? Athua, kae hopya oh, profeh lu kheit lae heize alesae huapaw nynh thua. 10Pawccecize Ccathyaa kya,
‘Dotua, na malang khe
na laanpi a paccyn cih paw
ka zeccuetu kha
na malang ka saw cih,’
cite azeikuhpaw kha hynh-e paw kong nynh thua.#Mal 3.1 11Byaccaccing kae hopya oh, nopi hae kyate a puipaw ccungccaw hae kyaze Baptisma pyatu Johan laeze alesae huapaw lu kheit san langkuh loh khyh; thuasalama vaawlang peenaw kya adih huapaw ccungccaw tuh aning laeze a lesaehua. 12Baptisma pyatu Johan ccyh kyate tho zah atu cia vaawlang peenaw tuh doukunaw teing zah a doutu hae nynh nangsete a lawkude hae.#Luk 16.16 13Pawccecize kawbya ccauh te profeh ccauh hae balyn nynh Johan ccyh kyacia profehbya a ho hae. 14Tuh-e bya tuh na zyn ry oh ze, Johan tuh yn thua cih paw Elijah nynh thua.#Mal 4.5; Mat 17.10-13; Mar 9.11-13 15Thaenaw nakaring a hoipaw tuh thae sah!
16“Atu she e ccungccaw hae hynh pawtemou ka touse cih hae? Kungkunaw hae kya haung hae zah,
17‘Kaening nynh phyly
kae tupah oh zah na law khyh oh;
michi hlaw
kae sahpah oh zahmah
na rah lae khyh oh rei,’
cite a hokuh hae paw imua hae te nynh aloku hae. 18Pawccecize Johan tuh ae lei nia leite yn thua zah minmin nynh, ‘Aning tuh raerangsaro bahkuhpaw nynh thua,’ a ci hae. 19Ccungccaw Ccapaw tuh aete niate yn thua zah minmin nynh, ‘Dotua oh, aemohpaw te misuripaw khuh! Ngunto khoi hae paw te misei hae banpaw khuh!’ a ci hae. Thuasalama hawnaw tuh ahme cipaw kha a cyisahnaw nynh a langsah,” a ci.
Zynnaw Hoi leipaw Khua hae
(Luk 10.13-15)
20Jesu nynh ngaeangnaw alunghua a raenaw khua hae nynh a ngaesiku khyh hae keiccuze hynhte a pe hae: 21“Khorazin khua, nang na hanlan ngaethya lan kou um! Bethsaida khua, nang na hanlan ngaethya lan kou um! Pawccecize nanning kya rae athuapaw ngaeangnaw hae kha Tair khua te Sidon khua kyakhe rae a la thua ze, minmin tuh buri boeining lawkute buhhaw kya a toukuh cih hae zah khawlya mawte a ngaesikuh vae cih hae.#Isa 23.1-18; Eze 26.1—28.26; Joe 3.4-8; Amo 1.9-10; Zek 9.2-4 22Tukeiccuze kae hopya oh, byapianaw nin kya nanning hanlan laeze Tair te Sidon hanlan ngaesang kho a umhua cih. 23Kapernaum khua,
nang tuh vaawlang cia
hangku na ry tou?
Hell kalan sawbung na thua cih.
Pawccecize nang na kya rae athuapaw ngaeangnaw hae kha Sodom khua kya rae a la thua ze, atunin cia atyn ung cih paw.#Isa 14.13-15; Gen 19.24-28 24Tukeiccuze nang kae hopya, byapianaw nin kya nang na hanlan laeze Sodom khua hanlan ngaesang kho a umhua cih,” a ci.#Mat 10.15; Luk 10.12
25Tuh ccyh lyakhe Jesu nynh tho zah, “Vaaw te laephi Bawipaw, pou Apang, na kalan lungtuabya ka ho; pawccecize e uccaw hae hynh a haw hae paw te a thya hae paw kyate na thuruh zah nosi hae kha na phypya hae. 26Tuhmawte nynh athua Apang, pawccecize tuh-e tuh na rynaw nynh thua. 27Ka Paaw nynh pawpaw balyn kha marya yn ap vae; Paaw laelan hum nynh sanmah Ccapaw kha nyh khyh; Ccapaw te Ccapaw nynh amaw kong phy lan a popaw ccungccaw laelan hum nynh sanmah Paaw kha nyh khyh.#Joh 3.35, 1.18, 10.15
28“Riathae hae paw te phupaw ri hae paw balyn ka kalan rang oh lah haeungnaw kae pya cih oh. 29Ka nanrui hynh lawkuh oh lah vawkuh oh; kamaw hynh yn ccangkuh oh; pawccecize kae tuh a lungnepaw te zakawsangsakunaw thinlung a hoipaw nynh ka thua; nae thinlung kya daenaw na mue cih oh.#Jer 6.16 30Pawccecize ka nanrui tuh nawre um zah ka phupaw tuh azaw,” a ci.
Zotung Bible © Bible Society of Myanmar, 2016.