LEVITIKAS 9
9
Aaron Ranpibawi Thuanaw
1Nin taryanaw nin khe Moses nynh Aaron te a ccapaw hae te Israel piccan hae kha a pum hae. 2Moses nynh Aaron kha, “Seithyaanaw silawnaw hanlan douccahpaw tangnua anopaw sa kheit, maee-ute silawnaw hanlan douccahpaw tuutepaw sa kheit kha cciakhae lah Bawipaw malang khe pyatua. 3Te Israel ccungccaw hae kha, ‘Seithyaanaw silawnaw hanlan miaatepaw sa kheit, maee-ute silawnaw hanlan douccahpaw, kum kheit accing vae paw vaetuataw sa kheit te tuutaw sa kheit; 4Bawipaw malang silawnaw lanpaw, ccawkunaw silawnaw hanlan tangnuapaw sa kheit te tuutepaw sa kheit, te chitui te pydepaw ccathae silawnaw kha oun thuakhae oh. Pawccecize Bawipaw tuh nae kalan atunin yn langkuh cih,’ cite hopah hae,” a cipya. 5Moses nynh kaw a pya hae paw kha minmin nynh tungkunaw bu malang a thuakhae hae; te ccungccaw zapi balyn tuh naekuh hae zah Bawipaw malang a thadyn hae. 6Te Moses nynh, “Bawipaw phu-enaw kha nanning kya alangku nawlan, e hynh Bawipaw nynh cyi lan kaw ae pya oh paw nynh thua,” a ci. 7Oute Moses nynh Aaron kha, “Beikhang kalan naekuh lah seithyaanaw silawnaw te maee-ute silawnaw khate silawtua, namaw te ccungccaw hae hanlan seingaethyanaw kha raetua; te ccungccaw hae nynh oun ccyng hae paw ahlu khate silaw lah minmin hanlan seingaethyanaw kha raetua; Bawipaw nynh kawpya thyhte cyitua,” a cipya.#Heb 7.27
8Aaron nynh silawhang kalan naekuh zah seishawnaw silawnawpaw vaetuataw kha a chia, tuh-e tuh amaw hanlan nynh thua. 9Aaron ccapaw hae nynh achii kha amaw kalan a pya hae, te a kuihdung kha chii lungkhu dung zah silawhang a ki hae kyakhe a thuh; te achii alaepaw kha silawhang accusy kyakhe a lae. 10Thuasalama seithyaanaw silawnaw kya-e atho, akin hae te athin kya abahkuhpaw arui-arae kha silawhang vawlan maee te a u, Bawipaw nynh Moses kya kaw a pya thyhte a cyi; 11asaw te aphua kha ryahmin atolang khe maee te a u.
12Oute maee-ute silawnawpaw kha a chia. Aaron ccapaw hae nynh achii kha amaw kalan cciakhae hae zah silawhang po voilu lan a hei. 13Te minmin nynh maee-ute silawnawpaw saw kha angengete alu ryte amaw kalan oun cciakhae hae zah aning nynh silawhang vawlan khe maee te a u. 14Alungkhu e hae te accu hae kha sing zah maee-ute silawnawpaw ryte silawhang vawlan khe maee te a u.
15Tukoute Aaron nynh ccungccaw hae kya-e ahlu kha a pya. Ccungccaw hae hanlan seishawnaw silawnawpaw miaa kha lah zah a chia, tuh-e tuh masaty e hawte seithyaanaw silawnaw lante a pya. 16Maee-ute silawnaw kha rae zah aphung thyhte si a law. 17Awkhua ccyh kya maee-ute silawnaw kyalya thua leite ccathae silawnaw kha mah kuih te hu khin khate lah zah silawhang vawlan khe maee te a u.
18Ccungccaw hae hanlan ccawkunaw silawnawpaw lante tangnuapaw te tuutepaw kha a chia. Aaron ccapaw hae nynh a chii kha amaw kalan pya hae zah Aaron nynh silawhang po voilu lan a hei,#Lev 3.1-11 19te tangnuapaw tho te tuutepaw tho, aleihmae asae thathyhte, aring kya abahkuhpaw atho, akin ccangning te tuh-e hae vawlan umpaw atho, te athin kya abahkuhpaw arui-arae hae kha a pya hae. 20Minmin nynh aby hae vawlan khe atho hae kha masaty khang hae zah Aaron nynh silawhang vawlan khe maee te a u; 21te Moses nynh kaw a pya thyhte, aby hae te a ranglang phae kha Aaron nynh Bawipaw malang khe hangthung-hebiate silawnaw lante a hangthung.
22Aaron nynh a kuih kha ccungccaw hae kalan khe hang zah hythua a pya hae; te seithyaanaw silawnaw, maee-ute pyanaw te ccawkunaw silawnaw kha silawnaw a rae koute a rungbung.#Nam 6.22-26 23Moses te Aaron tuh tungkunaw bu lungkhu lang a tee hae, tukoute oun pou hae zah ccungccaw hae kha hythua a pya hae; te Bawipaw phu-enaw tuh ccungccaw balyn kya a langkuh. 24Bawipaw kyate maee yn pou zah maee-ute silawnawpaw te silawhang vawlan umpaw atho kha phe thang lan a u, ccungccaw balyn nynh tuh-e tuh he a muih hae tuh, sia hae zah mih lu a bakhung hae.
Currently Selected:
LEVITIKAS 9: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
