LEVITIKAS 7
7
1E hynh cyiseinaw silawnaw phungzae nynh thua. Tuh-e tuh athyaa huaccepaw nynh thua; 2maee-ute silawnawpaw chianaw hmin kyakhe cyiseinaw silawnawpaw kha a theih cih hae, te a chii kha silawhang po voilu lan a hei cih hae. 3A tho balyn kha pya athua cih: aleihmae asae thyhte, aring abongpaw atho, 4akia lungkhu lang te umpaw akin ccangning te tuh-e hae vawlan abahkuhpaw atho, akin hae ryte lawde a thuapaw athin kya abahkuhpaw arui-arae hae kha a pya cih. 5Ranpibawi nynh tuh-e hae tuh silawhang vawlan khe Bawipaw kalan maee te silawnaw hawkhate a u cih; tuh-e tuh cyiseinaw silawnaw nynh thua. 6Ranpibawi pise miakaw nynh tuh-e tuh a ae cih hae; hmin thyaapaw kyakhe ae athua cih; tuh-e tuh athyaa huaccepaw nynh thua.
7Cyiseinaw silawnaw tuh seithyaanaw silawnaw hawte thua zah hynh-e hae hanlan phungzae phe lokuh; seingaethyanaw a raepaw ranpibawi nynh saw kha a lawkuh cih. 8Lukhakheit kya-e maee-ute silawnaw kha a raepahpaw ranpibawi nynh maee-ute silawnaw a raenawpaw saphua kha a lawkuh cih. 9Te talyng-ang kya thoupaw ccathae silawnaw miakaw, thounawpaw talyng-ang khyhze ohkan te thoupaw balyn kha a pyatu ranpibawi nynh a lawkuh cih. 10Thuasalama ccangpaw ccathae silawnaw miakaw, chitui te pydepaw thuasah, aroupaw thuasah Aaron ccapaw hae balyn nynh phe ngankuh lante a lawkuh cih hae.
Tuhlaepaw Phunglang
11E tuh lukhakheit nynh Bawipaw kalan a pya lanpaw ccawkunaw silawnaw kha pyanaw phungzae nynh thua. 12Lungtuanaw hanlan pya athua vae ze, lungtuanaw silawnawpaw ryte ransi phing leipaw sanlou chitui te pydepaw, ransi phing leipaw sanlou apahpaw chitui thuhpaw te chitui kya hoyte ciasahpaw vaekhui ahoypaw kha a pya cih. 13Ccawkunaw silawnaw te asekuhpaw lungtuanaw hanlan pyapaw ryte ransi phingpaw sanlou kha a pyabia cih. 14Silawnaw phuin kheit cci kya-e sanlou phe kheit cci kha Bawipaw kalan lasung lante a pya cih; tuh-e sanlou tuh ccawkunaw silawnawpaw a chii kha a heitupaw ranpibawi nynh a lawkuh cih. 15Te lungtuanaw hanlan ccawkunaw silawnawpaw saw kha pya nin khe ae athua cih; awkhualan cia ccapyh san nung thua lan khyh. 16Thuasalama a pyapaw silawnaw lanpaw tuh byakinkute a pyapaw athua ze thuasah, lungthote silawnaw athua ze thuasah silawnaw a rae nin khe ae athua cih, te alaepaw kha awkhualan khe ae athua cih; 17thuasalama silawnawpaw kya-e alaepaw saw kha nin thumnaw nin khe maee te u athua cih. 18Ccawkunaw silawnaw saw kha nin thumnaw nin khe ae athua lanze, ccoupya thua lan khyh, a pyatupaw kha a pya cite riapya thua lan khyh; tuh-e tuh anungsikuhpaw athua cih zah a aetupaw tuh a tungvaw seinaw accah cih.
19Athyaa leipaw uccaw te a tungkuh hae paw saw kha ae thua lan khyh; maee te u athua cih. Athyaa hae paw balyn nynh silawnawpaw saw kha a ae cih hae. 20Thuasalama mih tungvaw kya thyaa leinaw phang a um lyakhe Bawipaw kya-e ccawkunaw silawnawpaw saw kha a ae hae paw tuh mih puizia kyate vua athua cih hae. 21Lukhakheit nynh athyaa leipaw ccangkhakheit, athyaa leipaw ccungccaw kha thuasah, athyaa leipaw sarangpaw kha thuasah, athyaa leipaw ahysuepaw kha thuasah ty zah Bawipaw kya-e ccawkunaw silawnaw saw kha a ae lanze, a puizia kyate vua athua cih.
22 Bawipaw nynh Moses kha hynhte a hopya: 23Israel hae kyakhe hynhte hopah hae: Nanning nynh tangnuapaw tho, tuu tho te miaa tho kha na ae lan khyh oh. 24Amaw chi lan achihpaw sarangpaw atho kha thuasah, sarepaw nynh a teipaw atho kha thuasah ccangkhakheit kya na mang kho oh, thuasalama tuh-e atho kha na ae lan khyh oh. 25Lukhakheit nynh Bawipaw kalan maee te silawnawpaw kya-e sarangpaw atho kha a ae lanze, a aetupaw tuh a puizia kyate vua athua cih. 26Pavaw chii thuasah, sarangpaw chii thuasah, pawpaw chii mah na umnaw oh miakaw kya na ae lan khyh oh. 27Pawpaw chii zemah a aepaw lukhakheit tuh a puizia kyate vua athua cih.
28 Bawipaw nynh Moses kha hynhte a hopya: 29Israel hae kyakhe hynhte hopah hae: Bawipaw kalan ccawkunaw silawnaw a raepaw lukhakheit nynh tuh-e tuh Bawipaw kalan amaw ccaccei nynh a thuakhae cih. 30Maee te pyapaw Bawipaw kya-e kha namaw na kuih te na ccyng cih; Bawipaw malang hangthung-hebiate silawnaw lante aby kha hangthung athua nawlan, atho kha aby ryte na thuakhae cih. 31Ranpibawi nynh atho kha silawhang vawlan khe maee te a u cih, thuasalama aby kha tuh Aaron te a ccapaw hae nynh a lawku cih hae. 32Te ccawkunaw silawnawpaw kya-e a ranglang phae kha silawnawpaw lante ranpibawi kalan na pya cih; 33ccawkunaw silawnaw kya-e atho te achii a pyatupaw Aaron ccapaw hae laku e lu kheit nynh a ranglang phae kha a ccou cih. 34Pawccecize Israel hae nynh a pya hae paw ccawkunaw silawnawpaw kya-e aphae, hangthung-hebiate silawnaw kya-e aby kha ka lah zah silawtu Aaron te a ccapaw hae kalan ka pya vae hae, tuh-e tuh Israel ccungccaw hae kyate zungzae a ccou lan hae paw nynh thua. 35Tuh-e tuh Aaron te a ccapaw hae nynh Bawipaw hanlan ranpibawi rya kha lawpya lan khang athua nin hae khe, Bawipaw kalan maee te raepaw silawnaw kya-e minmin nynh a ccou lan hae paw nynh thua; 36Minmin kha chitui thuh athua nin hae khe, Israel hae nynh minmin kha tuh-e tuh pya khylan Bawipaw nynh kaw a pya hae, Israel hae nynh mih she balyn kya zungzae a pya lan hae paw nynh thua.
37E hynh maee-ute silawnaw, ccathae silawnaw, seithyaanaw silawnaw, cyiseinaw silawnaw, thyaasahnaw silawnaw te ccawkunaw silawnaw phungzae nynh thua, 38hynh-e phungzae hae tuh Israel ccungccaw hae nynh Bawipaw kalan silaw lanpaw kha ramkaw kya kaw a pya lya hae ze, Bawipaw nynh Moses kha Sinai Mua vawlan kaw a pyapaw nynh thua.
Currently Selected:
LEVITIKAS 7: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
