EXODUS 5
5
1Tukoute Moses te Aaron nynh Faro kalan cceih hae zah, “Israel hae Pachia Bawipaw nynh hynhte a ho, ‘Laesia ram kya kamaw hanlan poi yn tuapya ccaw hae, ka ccungccaw hae tuh cceih hae sah,’ a ci,” cite a hopya hae. 2Faro nynh, “A bya kha ngaepyate Israel hae kha ka cciasah lan hae paw tuh, Bawipaw tuh hummou athua? Bawipaw tuh ka nyh khyh, Israel hae kha ka cciasah lan khyh hae,” a ci. 3Te minmin nynh, “Hebru hae Pachia tuh kaening kya phe yn langkuh vae; Bawipaw kae Pachia kalan silawku khylan nin thum laanccia asawnaw laesia ram lang beih oun cciasah, tuhkhyhze tuh kaening kha shethya ccinaw te khyhze thaloi te de oun tah cih,” a cipya hae. 4Izip siapharan Faro nynh, “Moses te Aaron, pawcce ccungccaw hae kha mih ryalaw na sawsakuh oh? Nae ryalaw kalan cceih oh!” a cipya hae. 5Faro nynh bua hopah hae zah, “Minmin tuh ram kya-e ccungccaw hae laeze lunghua vae hae zah mih ryalaw kha na lawsah ry vae khyh oh,” a cipya hae. 6Tuh-e nin khe Faro nynh ryalaw uktu bawi hae te ryalaw dopahtu hae kha, 7“Ohkhe rae nawlan ccatanphue kha ccungccaw hae kalan langmaw hawte pya nan vae oh; mimaw ccaccei nynh cceih hae sah lah ccatanphue kha ccungkuh hae sah. 8Thuasalama a rae hae paw ohkhe accanlu tuh langmaw zeih maminte na raesah cih oh; na zyasahpah hua lan khyh oh, pawccecize minmin nynh mih thawnaw keiccuze, ‘Kae Pachia kalan silawku khylan oun cciasah,’ cite a sia hae. 9Minmin nynh ryalaw kha houh ru lante lah hae sah; khah-e ryalaw kha thawmawte a law hae zetuh lingpaw bya kha peki mang vae lan khyh hae,” a ci.
10Tukeiccuze ryalaw uktu bawi hae te ryalaw dopahtu hae nynh cceih hae zah ccungccaw hae kha, “Faro nynh, ‘Ccatanphue ka pya vae lan khyh hae. 11Minmin nynh a muih khonaw hae hmin kalan cceih hae sah lah ccungkuh hae sah; thuasalama mih ryalaw tuh ccapyh sanmah zyahua lan khyh,’ ae ci oh,” cite a hopya hae. 12Tukeiccuze ccungccaw hae tuh ccatanphue hanpaw athupaw kha ccung khylan Izip ram balyn kya a pazaekuh hae. 13Ryalaw uktu bawi hae nynh, “Ccatanphue ae pya lya oh ze, nin takyh na law oh hawkhate nae ryalaw kha phe lyn oh,” cite a nangse hae. 14Faro a ryalaw uktu bawi hae nynh Israel hae hanlan a khangpya hae paw Israel ryalaw dopahtu hae kha bua hae zah, “Langmaw na rae oh paw ohkhe accanlu zeih kha inkhawnin te atunin kya pawcce na thangsah khyh oh?” cite a khia hae.
15Oute Israel ryalaw dopahtu hae nynh Faro kalan cceih hae zah, “Na see hae tungvaw pawcce hynhte nae cyi? 16Ccatanphue mah nae pya khyh, thuasalama ryalaw uktu bawi hae nynh, ‘Ohkhe rae oh!’ oun cipya hae. Na see hae hynh pawcih ciate mou oun bua hae cipaw hynh oun dotua. Na ccungccaw hae tungvaw na ding khyh,” a cipya hae. 17Faro nynh, “Nae thaw a naw, nae thaw a naw; tukeiccuze, ‘Bawipaw kalan silawku khylan kaening hynh oun cciasah,’ na ci oh. 18Atu cceih oh lah ryalah oh; ccatanphue kae pya lan khyh oh, thuasalama ohkhe accanlu tuh langmaw te phe lokuh lante nae pya cih oh,” a cipya hae. 19“Nin takyh na rae oh paw ohkhe accanlu zeih laeze na zyasah hua lan khyh oh,” cite Faro nynh a hopah hae tuh, vawsawnaw kae tung vae cipaw kha Israel ryalaw dopahtu hae nynh a ny hae. 20Minmin nynh Faro kyate he a pou hae tuh, minmin te tungku khylan a la ngaw hae paw Moses te Aaron kalan a cceih hae. 21Minmin nynh Moses te Aaron kyakhe, “Bawipaw nynh nanning kha ae do oh sah lah, bya ae pia vae oh sah! Faro te a ryalahtu bawi hae kha kaening tungvaw nae huasah oh zah, kaening chianaw lanpaw thaloi kha mih kuih kya na pya vae oh,” a cipya hae.
Moses Sawsangnaw
22Oute Moses nynh Bawipaw kalan bua cceih zah, “Pou Bawipaw , e ccungccaw hae tungvaw pawcce riathaenaw na pya hae? Pawcce kae hynh nae saw? 23Faro kalan na min te byaho lan he ka thua ccyh kyate tho zah Faro nynh e ccungccaw hae tungvaw vawsawnaw a pya vae hae, te na ccungccaw hae kha luesah khylan pawpaw mah na cyih khyh,” a ci.
Currently Selected:
EXODUS 5: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
