EXODUS 17
17
Lungpi kyate Tui Pou
(Nam 20.1-13)
1Israel zapi balyn tuh Bawipaw nynh kawpya hae thyhte Sin laesia ram kyate pou hae zah san kheit koute san kheit a cceih hae. Refidim kyakhe a rya hae, thuasalama ccungccaw hae hanlan nia lanpaw tui um khyh. 2Tukeiccuze ccungccaw hae nynh Moses kha pe hae zah, “Nia lanpaw tui oun pya,” a ci hae. Moses nynh, “Pawcce kae kha nae pe oh? Pawcce Bawipaw kha na syntaw oh?” a cipya hae. 3Thuasalama ccungccaw hae tuh mih tui eih haw zah Moses kha rawsete ccohku hae zah, “Kaemaw, kae ccaaw hae te sahiin hae kha tui kanmawte chia khylan Izip ram kyate pawcce nae poukhae?” a ci hae. 4Tukeiccuze Moses nynh Bawipaw kalan, “E ccungccaw hae hynh pawtemou ka cyih cih hae? Kamaw kha lung te vyavya yn deih vae hae,” cite a sia. 5Bawipaw nynh Moses kha, “Ccungccaw hae malang cceih lah Israel piccan hae abang kha ko hae; Nal vaw na buanawpaw hoitang kha na kuih kya ccyngkuh lah la cceih. 6Horeb mua kya umpaw lungpi vawlan, na malang khe ka thadyn cih. Lungpi kha buatua. Tuh-e lungpi kyate ccungccaw hae nynh a nia lan hae paw tui kha a pou cih,” a ci. Moses nynh Israel piccan hae malang khe tuhcite a cyi. 7Israel hae nynh, “Bawipaw hynh aening laku a um tou, um khyh tou?” cite Bawipaw kha syntawtua hae zah a pe hae keiccuze tuh-e hmin kha Massah te Meribah cite min a phu hae.
Amalek hae te Rhawtukkunaw
8Oute Amalek hae nynh oun cceih hae zah Israel hae kha Refidim kyakhe rhaw a tuk hae. 9Moses nynh Joshua kha, “Pise abang kha aening elang po lah Amalek hae kha tuk khylan pou oh. Awkhualan khe Pachia hoitang kha ka kuih kya ccyngkute mua dung khe ka thadyn cih,” a cipya. 10Moses nynh a hopya hawte Joshua nynh cyih zah Amalek hae kha a tuk hae, tuh lyatuin Moses, Aaron te Hur nynh mua dung lang a kaethung hae. 11Moses nynh a kuih a hang ccyh balyn tuh Israel hae nynh tae hae zah a kuih a sawbung ccyh balyn tuh Amalek hae nynh a tae hae. 12Moses kuih tuh a bang keiccuze minmin nynh lung ccangkheit kha lah hae zah Moses zakaw nungpah hae zah, Moses tuh tuin kya a haung. Aaron te Hur nynh Moses kuih kha lu kheit ze voikheit ccite a hang hae; tukeiccuze a kuih tuh khuanin phe ccah cia tynkaring lan a um. 13Joshua nynh Amalek te a ccungccaw hae kha thaloi te phe a tae hae. 14Oute Bawipaw nynh Moses kha, “E kong hynh ning khyh nawlan ccauh kya zei lah Joshua kha riapah. Amalek te asekuhpaw syntawnaw kha vaawlui zakaw kyate phe ka maemih cih,” a cipya.#Deu 25.17-19; 1Sa 15.2-9 15Te Moses nynh silawhang ccangkheit kha rae zah Bawipaw tuh ka taenaw alan nynh thua a ci. 16Moses nynh, “Bawipaw kya-e taenaw alan kha na kuih te hangthung! Bawipaw nynh Amalek hae kha she takyh kya a tuk cih hae,” a ci.
Currently Selected:
EXODUS 17: ZB16
Highlight
Copy
Compare
Share
Want to have your highlights saved across all your devices? Sign up or sign in
Zotung Bible © Bible Society of Myanmar, 2016.
