LOCCEIHTU 5
5
Ananias te Safira
1Thuasalama Ananias a ci hae paw ccungccapaw te a zu Safira nynh a hoi hae paw uccaw kha zua hae zah 2amee abang kha a zu mah a nyhbua lante a nungku, te abang kha yn ccyng zah locceihtu hae cculeihpaw khe a nung. 3Peter nynh, “Ananias, pawccemou na thinlung kha Satan na uksakuh zah laephi na zuanaw mee phua abang kha nungkute Thyaa Muisaw tuh na ling? 4Tuh-e laephi tuh na zua maw lya namaw kya-e thua khyh tou? Na zua koute mah namaw kaw khya khyh tou? Pawccemou hynhte cyi lanpaw hynh na thinlung kya na tuaku? Ccungccaw na lingpaw thua leite Pachia na lingpaw nynh thua!” a cipya. 5Ananias nynh hynh-e bya he a thae tuh khuliakuh zah a chih; hynh-e kong a thae hae paw ccungccaw balyn tuh myarya a rih hae. 6Ccangvae hae nynh thokuh hae zah a rhua kha a lung kou hae te poukhae hae zah a uu hae.
7Suimilan ccangthum loukaw aro koute a zu tuh pawte nynh acyiku cipaw ny leite yn tee. 8Peter nynh, “Nae zuvaw te laephi kha hynhzeih mawte tou na zua oh? Yn hopya tua,” a cipya. Aning nynh, “Athua, hynhzeih mawte nynh kae zua,” a ci. 9Peter nynh, “Bawipaw Muisaw kha syntawtua khylan pawtemou hynhte nae lung aloku? Dotua, na vawpaw a uh hae paw mih ccu tuh thuakawzung nynh a um ung, nang kha mah ae puihbua cih hae,” a cipya. 10Safira tuh Peter cculeihpaw khe vaekheihmawte khuliakuh zah a chih; te ccangvae hae nynh oun tee hae zah a chipaw kha he a muih hae tuh cciakhae hae zah a vawpaw pe khe a uubua hae. 11Khriccaawbuu balyn te hynh-e kong a thae hae paw balyn tuh myarya a rih hae.
Patae A Dansah hae
12Locceihtu hae nynh ccungccaw hae kya muihsahnaw te ngaeangnaw patae kha a langsaku hae. Minmin balyn tuh Solomon Maepaw kya a sueluakuh hae. 13Tuhlaepaw hum ccungccaw sanmah minmin kalan pykuh bua ngan khyh hae; thuasalama ccungccaw hae nynh minmin kha myarya saw a tua hae. 14Tuhzemah Bawipaw a zynpaw nopi, pise hae tuh patae oun lungchih hae. 15Peter nynh po yn ccia vae ze a mynlyh nynh ngeccih hae abang sankaw kha a khaw ccaw hae cite ngeccih hae kha laanpi lang oun cciakhae hae zah ikhung te iphae vawlan a nung hae. 16Jerusalem pepan e khua hae kyate ccungccaw zapi mah oun sueluakuh hae zah ngeccih hae te athyaa leipaw muisaw hae nynh vawsaw pya hae paw kha oun thuakhae hae zah, mih balynte marya a dan hae.
Locceihtu hae A Tuaa A Sah hae
17Ranpibawi lupi te amaw ryte a umkheih hae paw Sadusi hae balyn tuh myarya mih eiung keiccuze thokuh hae zah, 18locceihtu hae kha kyng hae zah ranzae thonginn kya a saw hae. 19Thuasalama khuazi khe Bawipaw vaawpaw nynh thonginn thuakaw hae kha hung zah minmin kha poukhae hae zah, 20“Cceih oh, beikinn kya thadyn oh lah hynh-e hiinnaw bya balyn hynh ccungccaw hae kya la hopah oh,” a cipya hae. 21Minmin nynh tuh-e bya he a thae hae te, awkhua takaw khe beikinn lungkhu lang tee hae zah a ccangpya hae. Ranpibawi lupi te amaw ryte a umkheih hae paw nynh oun thua hae zah kungsi hae te Israel piccan hae balyn kha a ko hae; te locceihtu hae kha mih kalan cciakhae khylan ccungccaw hae kha thonginn lang a saw hae.
22Thuasalama beikinn ngawtu hae nynh thonginn kya he a thua hae tuh locceihtu hae kha muih vae khyh hae; tukeiccuze ki hae zah, 23“Thonginn tuh khyndadyh lan toh khawkuh zah thonginn a ngawtu hae mah thuakaw kya a thadyn hae paw kha kae muih; thuasalama thuakaw he kae hung tuh a lungkhu kya hum sanmah kae muih khyh,” cite a hopya hae. 24Atu ranpibawi lupi, beikinn ngawtu lupi te ranpibawi lepaw hae nynh tuh-e kong he a thae hae tuh, pawvema yn cyihkuh cih cite mih ngaeangthua. 25Ccungccaw lu kheit yn thua zah, “Dotua oh, nanning nynh thonginn kya na saw oh paw ccungccaw hae tuh beikinn kya thadyn hae zah ccungccaw hae kha a ccangpya hae!” cite a hopya hae. 26Tetuh beikinn ngawtu lupi tuh beikinn ngawtu hae ryte cceih hae zah locceihtu hae kha reih-i-reih-ae nung leite a cciakhae hae; pawccecize ccungccaw hae nynh lung te oun deihsei cih hae cite a rih hae.
27Minmin kha cciakhae hae zah kungsi hae malang khe a thadynsah hae. Te ranpibawi lupi nynh, 28“Hynh-e paw min te na ccangpah lan khyh oh cite tynkaring lan kaw kae pya khyh oh tou? Thuasalama nae ccangpyanaw kha Jerusalem kya phe na biasah oh zah hynh-e ccungccapaw chii hynh kae tungvaw kya thuasah lan na paccynku oh!” a cipya hae. 29Peter te ccangpaw locceihtu hae nynh, “Ccungccaw bya laeze Pachia bya hynh kae ngaehua cih. 30Nanning nynh thing vawlan na sae oh zah na chia oh paw Jesu kha aening ah minpaaw hae Pachia nynh phe thoosah vae. 31Israel hae kha ngaesikunaw te seingaethyanaw pya khylan Pachia nynh amaw kha Cciakhaetu te Khumtu lang khang zah a ranglang khe phe a hangthung vae. 32Kaening tuh hynh-e uccaw hae konglang a ccaekia hae nynh kae thua; Pachia nynh amaw kaw a ngaepaw ccungccaw hae kalan a pya hae paw Thyaa Muisaw mah ccaekia nynh athuabua,” a cipya hae.
33Tuh-e bya a thae hae tuh, mih bungpaw zah minmin kha chia lan a ry hae. 34Ccungccaw hae balyn nynh sawtua hae paw, kawbya sazae, Gamaliel a ci hae paw Farasipaw nynh kungsi kya thadyn zah locceihtu hae kha atolang sosoh pousah lan kaw a pya hae. 35Ccungccaw hae kha, “Israel hae, hynh-e ccungccaw hae tungvaw cyi lan na paccyn oh paw hynh hoyte tuakuh oh. 36Pawccecize anulang lya Theudas a ci hae paw nynh yn langkuh zah amaw te amaw kha ccungccaw huataw ka thua khyh cite hokuh zah ccungccaw za pali loukaw nynh a zui hae. Amaw kha theih hae zah a zuitu hae balyn tuh pong phiakuh hae zah phe zo hae. 37Tuh-e paw koute milu ccazing law ccyh lyakhe Judas a ci hae paw Galilee paw tuh yn langkuh zah ccungccaw patae kha a nulang a zuisahku hae, aning mah phe chih zah amaw a zui hae paw balyn mah pong phiakuh hae. 38Tukeiccuze atu nanning kha kae hopya oh, hynh-e ccungccaw hae hynh sibia oh lah, mimaw um lan um hae sah; pawccecize hynh-e khuakhannaw te hynh-e ryalawnaw hynh ccungccaw hae kya-e athua ze azo cih. 39Thuasalama Pachia kya-e athua zetuh na roh kho lan khyh oh; naemaw kha Pachia a rawsetu hae lang poh nae tangsei oh zya!” a cipya hae. Minmin nynh Gamaliel bya tuh mih nawccah.
40Minmin nynh locceihtu hae kha ko hae zah a bua kou hae te, Jesu min te phung na ho vae lan khyh oh cite kawpya hae zah a cciasah hae. 41Locceihtu hae tuh Jesu min hanlan maethyanaw teing lan angaekuh hae cite oun tua hae cikuh hae zah kungsi hae kyate lungtuate a pou hae. 42Beikinn kya te inn hae kyakhe nin takyh apaekuh lei lan ccangpah hae zah Jesu tuh Messiah nynh thua cite a ho hae.
Zotung Bible © Bible Society of Myanmar, 2016.