ROM 7
7
Apom nai hawi pata nai
1Amjo amnauchi awi, khumi heng nai sala ryrei ly Reita ly mymy i tlang tleaung y peang, nanai nangchi pany u y nai sai a? (Kai ly Reita pany nai khumi teng y kathui nai he.) 2Juvo awm nai neampachy ly juvo heng nai sala ryrei ly reita deaungkho y juvo hawi kawm tabom bo; na i py juvo dei baly mymy ly juvo i molam y reita i dengdairei patlaw bo. 3Hunaibaly mymy i juvo heng nai sala ryrei ly mymy ly neampacho takhra hawi apom baly, Pajang sa nai neampachy, nanai amyn pathi ai; na i py mymy i juvo dei baly mymy ly reita i dengdairei patlaw bo; hunaibaly mymy ly khumi takhra hawi apom iy py, pajang sa nai neampachy ny y leang bo.
4Hunai kamta teang amjo amnauchi awi, achi ly Tameuh mang y athai nga thai ai nai, nangchi ly khumi takhra, kadeichi theung i nai pathau chum veng nai keung hawi amtawm thai ai nai, Krista i tlang deaungkho y nangchi ai ly Reita molam y ang dei hai bo. 5Achi ly tlang mang y awm nai thym khala y Reita deaungkho y kamngo sa hai nai ngai phi teng y nairachi my achi i tlang kangpreichi theung y dei ai ataing pa-rei athai ai nai sa reng. 6Na i py cha tajiu nai kangngym kamta ny y naimy, phailo kangtha y atiti sa thai ai nai, achi ly vai ly ang patawn naira i nai dei chum iy, achi ai Reita i dengdairei ang patlaw bo.
Reita hawi kamngo
7Tumbaly achi ly ati thui ai mo? Reita ly kamngo lawh a? Ny y leang. Na i py Reita ny y nai khyly kai ly kamngo apany y leang bo; Reita my ly, “Paleung no moh,” tapi moh khyly kai ly paleung no ai nai kapany y leang bo:#Theu 20.17; Leu 5.21 8na i py leu pei nai deaungkho y kamngo my ly avo nai neng nga iy, paleung no naira cheaungkhang kai i paleung theung y ang tym hai bo; Reita ny y baly kamngo ly dei nai ne. 9Naibaly kai ly jangni y ly Reita ny y naimy kaheng; na i py leu pei nai awm bo nabaly kamngo ly amcheng teang iy, kai ly kadei bo. 10Naibaly heng ai nai leu pei nai kypkyp ly kaimy i vui dei naira lawn bo, nanai kapany bo; 11leu pei nai deaungkho y kamngo my ly avo nai neng nga iy ang tapawp i, huni ai ly teaung iy ang padei bo.#AA 3.13 12Hunaibaly Reita ly kachai ne, leu pei nai py chai py chai, hawi py hawi, meitang py ne.
13Hunaibaly atiti meitang ly kai i vui dei naira lawn a? Ny y leang. Na i py kamngo ly leu pei nai deaungkho y khri pa-rei kamngo lawn thai ai nai hawi, kamngo ly kamngo ne, nanai amteng thai ai nai py, huni ly atiti meitang teaung iy kai i tlang tleaung y dei naira tym hai nai teu.
Khumi i paleung theung y atiu nai
14Reita ly phailo mang y asa nai ne, nanai achi pany; kai naini tlang mang y asa nai, kamngo i miseaung y ka-jo chum nai khumi ne. 15Kai i sa nai sai ly dawn kapany y; kai i atiti sa reng nai ly kai i kangai sa nai ny y leang; huni ny y naimy kai i atiti kaniu ngai y nai kasa nai ne.#Kal 5.17 16Na i py kai i kangai ny y nai kasa makho baly, Reita ly hawi, nanai kanapi teang. 17Hunaibaly kai i atiti kasa nai ly kaimy i kasa nai ny y leang bo, kai theung y awm nai kamngo my ly sa nai teu. 18Kai theung y (huni ly kai i tlang y ly, nanai sai ne), atiti kahawi ha py by y, nanai kapany; ngai naira ly kai theung y awm teu i py, atiti kahawi sa nai ly by y leang. 19Ati mana nai mo nabaly, atiti kahawi sa ai kangai nai ly kaso y; na i py kamngo sa ai kangai y nai ly kasa reng. 20Hunaibaly kai ai ngai y nai kasa makho baly, sa nai keung ly kai ny y leang, kai theung y awm nai kamngo my ly sa nai teu.
21Hunaibaly hini reita ly kapany bo; atiti kahawi sa ai kangai nai thym khala y kamngo ly kai teng y awm lawh nai ne. 22Kai i paleung tatang y Tameuh i Reita tleaung y kakawn lawh veng; 23na i py kai i tlang kangpreichi theung y ly reita takhra awm, nanai kapany; huni ly kai i paleung i reita ai tiu i, kai i tlang kangpreichi theung y kamngo awm nai reita teng y miseaung y ang hawi. 24Kai ly khri pa-rei patang nai khumi ne na ly! Hini dei nai tlang i nai ami my ang law hai ai mo? 25Isu Krista achi i Areng i saho y Tameuh teng y kawn nai leu tym sy! Hunaibaly kaimy tatang ly kaimy i paleung y ly Tameuh i Reita i miseaung y kalawn, na i py kai i tlang y ly kamngo reita i miseaung y kalawn bo.
Khumi Common Language Bible © Bible Society of Myanmar, 2005.