ROM 3
3
1Hunaibaly Juda ly chawn naira katlen nai ati awm mo? 2Lengkhym takip naira py ati kamran awm mo? Lam cheaungkhangra y chawn parai; angchei y ly nichi teng y Tameuh i leu sai ly kry hai nai deaungkho y chawn naira ne. 3Naibaly phyreichi ly ym naira by y teu i py ati sa lawh i bo? Nichi i ym y naira my ly Tameuh i ka-ym awm nai sai ai ati sai py ny y nai palawn lawh nai sai a? 4Ny y leang; Tameuh ly meitang khyp ne sy ly, khumi bawibawi ly ka-chawi ne lawh sy;#Sam 51.4
“Nang ly nang i leu thui naira y eaung thai iy,
Nang ly tara chih naira y awm iy py, nang ly pajau
thai ai nai,” nanai tajiu nai kamta.
5Na i py achi i hawi y naira ly Tameuh i hawi naira ai amteng hai ra baly, achi ly ati thui ai mo? Tameuh my khumi ai pajeng nai ly hawi y nai ne a? (Kai ly khumi i thui reng nai kamta kathui nai ne.) 6Ny y leang; huna nai ne baly Tameuh ly khaileaung pri y mana nai tara chih ai mo? 7Na i py kai ly ka-chawi leu kathui nai deaungkho y Tameuh i leu meitang nai sai mymy ai tahm pasang ai nai ka-lawn pa-rei amteng hai ra baly, ati mana nai kai py khumi kamngo nai kamta sum hai naira y kaawm lawh mo? 8(Naibaly phyreichi ly kaichi ai thui tamawn iy, kaichi ly thui y pui naimy thui, na be nai kamta) “Atiti kahawi tym thai ai nai, atiti hawi y nai so u sina,” nanai kaichi ly ati mana nai thui lawh y a? Hunai kamta khumichi i sum naira nga nai ly kateng ne.
Khumi meitang leaungrei py by y
9Tumbaly mana ai mo? Achi ly nichi tleaung y hawi keh lawh a? Ny y leang; Judachi hawi Krikchi ly kamngo i miseaung y awm bebe, nanai ly angchei kha y py kaichi kang thui pi chum veng bo.
10“Ami py khumi kahawi by y, ne, leaung py by y;#Sam 14.1–3, 53.1–3
11Pany thai nai khumi leaung py by y,
Tameuh ai hau nai khumi leaung py by y;
12Nichi bawibawi ly amhi vui i,
Ati sai py kamran by y nai bebe awm veng;
Ami py atiti kahawi sa nai by y, ne, leaung chy py by y;
13Mymychi i tao ly am-eaung nai angawm ne;#Sam 5.9, 140.3
Mymychi i palai ly tapawp naira y teaung u,
Mymychi i labeaung theung y ly pavui thailai awm;
14Mymychi i labeaung ly amsawi hawi leu kho nai kawi i,#Sam 10.7
15Mymychi i kheu ly thi patheu ai nai takan nai rang;#Is 59.7–8
16Mymychi i lam y ly tama ai naira hawi patang ai naira awm;
17Mymychi ly awmnem nai lam py pany y;
18Nichi i mei ka-niu y ly Tameuh ai tahm khai naira ha py by y leang,”
nanai tajiu nai kamta.#Sam 36.1
19Hunaibaly labeaung cheaungkhang ai amkym hai me thai ai nai hawi, Tameuh my khaileaung pri bawibawi tara chih thai ai nai py, Reita my ati py thui nai ngierei ly Reita i anui y awm naichi teng y thui nai ne, na nai achi pany; 20hunaibaly Reita i atiti sa nai deaungkho y khumi ami py mymy i mei ka-niu y eaung naira nga ai nai by y leang; ati mana nai mo nabaly Reita deaungkho y kamngo pany angym ai naira awm nai ne lawh veng.#Sam 143.2; Kal 2.16
Tameuh ly khumichi ai mymy hawi amkawm hai nai
21Na i py vai ly Reita hawi amochi my pany hai nai kamta, Reita ny y naimy Tameuh i hawi naira ly amteng hai bo; 22huni ly mana mo nabaly Isu Krista ai ym nai deaungkho y Tameuh i hawi naira ly ym nai ngiereichi teng y amteng hai nai ne:#Kal 2.16 23patle takhra naira ha py by y leang; ati mana nai mo nabaly khumi bawibawi kamngo sa bebe i, Tameuh i nang parai naira py ngo y bo; 24na i py Krista Isu y atleu naira awm nai deaungkho y, mymy i pahenra my nichi ai eaung naira jawm my nga hai bo; 25Tameuh i amnym pajau naira y jangni i kamngo nairachi ai ly dawn pi y nai awm nai deaungkho y, Tameuh my mymy i hawi naira patei ai nai Krista Isu ai ly mymy i thi deaungkho y kamngo ahui nai langseaung syn naira y amteng hai; huni ly ym nai deaungkho y nga nai ne; 26mymy kypkyp ly kahawi ne, nanai hawi, Isu ai ym nai ngierei ai eaung hai nai keung ne, nanai py mymy i vai dymkhawn i hawi naira patei nai ne.
27Hunaibaly amlyh naira ly ma mang y awm mo? Huni ai ly angam mang y kho hai tawp veng bo. Mani reita my sa nai mo? Atiti sa nai reita my a? Ny y leang, ym naira reita y teu. 28Hunaibaly Reita i atiti sa nai ny y naimy, khumi my ym naira y eaung naira nga, nanai achi palawn.
29Tameuh ly Judachi i Tameuh harei khyh a? Mymy ly Cheng Takhrachi i Tameuh py ny y a? 30Ne teang chy; lengkhym takip naichi ly ym y nai deaungkho y eaung hai ai nai keung hawi lengkhym takip y naichi ly ym u nai saho y eaung hai nai keung ly Tameuh harei khyh baly, mymy ly Cheng Takhrachi i Tameuh py ne teang chy. 31Hunaibaly achi my Reita ly ati sai py ny y nai palawn lawh a? Ny y leang, achi ly Reita ai khaw hai nai teu.
Khumi Common Language Bible © Bible Society of Myanmar, 2005.