ROM 12
12
Tameuh i kalop sa ai nai molam heng ai nai sai
1Hunaibaly amjo amnauchi awi, Tameuh i pahen naira deaungkho y, apthyp naira kangheng hawi kachai. Tameuh my kawn ai ataing nai lawn ai nai nangchi i tlang ai ly aau ai nai kang takeng; huni ly nangchi i sa ai avo angchi yb nai ne. 2Hini khaileaung pri i reita kamta awm u moh ly huna ny y naimy nangchi ly Tameuh i kangai meitang nai hawi, kawn ai ataing nai hawi, hawi angym nai py dawn u cham thai ai nai paleung kangtha awm iy, takhra u veng jau.
3Nangchi theung y ami py tahm apasang nai kawi palai nai ly tahm apasang y naimy, Tameuh my khumi leaung leaungrei teng y ym naira hawi khyp ang pei nai kamta adawn naira y amkym lawh ai nai, kai ly mymy i ang pei nai pahenra deaungkho y leaung leaungrei teng y kang napi bawibawi. 4Achi ly tlang bomrei y kangprei neangneang awm iy, kangprei bawibawi i atiti sa nai ly atawm bawi y leang:#1 Kor 12.12 5hunai kamta teang achi ly nawi parai iy py Krista y ly tlang bomrei awm khyh; achi leaung leaungrei ly vanrei angprei ahawi nai ne. 6Naibaly achi ai pahenra ang pei nai kamta achi ly sa thai naira takhra takhra awm bawibawi; leu thui ai nai tla baly achi i ym nai kamta hawi khyp nai ryrei thui u sina;#1 Kor 12.4–11 7kry ai nai tla baly hawihai kry u sina; patiu nai keung py hawihai patiu sy; 8pachei nai keung py hawihai pachei sy; atiti pei nai keung py paawh y naimy pei sy; peang nai keung py angjeng parai naimy peang sy; pahen nai keung py kawn parai naimy pahen sy.
9Tamen naira ly tapawp naira abawi y nai ne sy. Kamngo mang y ly niu ngai u moh ly; kahawi mang y ly hawihai apatawm u. 10Amjo amnauchi ai tamen naira y ly neaung hawi parai naimy paleung abi u leungtang; leaungrei ly leaungrei ai amy tleaung y tahm pasang sy; 11angjeng naira y ly atho si u moh ly; phailo mang y ly hawihai palai dawn u pathyp ly; 12Areng i kalop so u ly; athang khai naira y kawn u ly; patang naira y kham pajau u ly; chiu sa ai nai patlaw u moh; 13khumi kachaichi i avaw naira y ly sabawm u ly; angvynchi ai ly kawn u jojo.
14Nangchi ai ana naichi ai ly amtheaung hai u ly; amtheaung hai u ly, amsawi ly pasawi u moh.#Mt 5.44; Lk 6.28 15Amotheu naichi ai ly amo theu hai u ly; vo naichi ai ly vo hai u ly. 16Dawn nai vanrei awm u leungtang; paleung apalen y naimy tahm anem naichi hawi amkawm u; tahm apasang u moh.#Lkch 3.7 17Ami i kamngo py kamngo nai vawitheung tha u moh. Khumi bawibawichi i mei ka-niu y atiti apu ai naira dawn u rym. 18Pajau baly nangmychi i kamjau ryrei khumi bawibawichi hawi aly u. 19Ngai parai naichi awi, vawitheung atha u moh ly; “Areng my, ‘Vawitheung nanai ly kaimy tha ai nai tla, kaimy kaheung ai,’ napi,” nanai tajiu nai ne.#Leu 32.35 20Hunai deaungkho y nang i paleung ka-e ly biu alam baly pacho, tui ahai baly nei hai:nang ly hunai kamta sa baly mymy i lu tleaung y mai-ai khai achu nai ne.#Lkch 25.21–22 21Kamngo my ly nang ai pajau ai nai pei moh, hawi sa naimy naini kamngo ai pajau.
Khumi Common Language Bible © Bible Society of Myanmar, 2005.