ROM 10
10
1Amjo amnauchi awi, kai i paleung i kangai hawi mymychi i vui y Tameuh teng y chiu kasa pi nai ly, nichi ly hengra nga u thai ai nai ne. 2Nichi ly Tameuh mang y dawn u patyp, nanai kapany hai nai ne, ne mang ly pany angym nai kamta ny y leang. 3Nichi ly Tameuh i hawi naira pany y naimy, mymychi i hawi naira khaw hai ai nai tau iy, Tameuh i hawi naira y apei u y lawh. 4Krista my ym nai ngiereichi ai hawi naira nga hai thai ai nai reita ai anawn hai nai keung ne.
Khumi cheng cheaungkhangchi i vui atleu naira
5Mosi my ly, “reita i hawi naira patawm nai keung ly huni deaungkho y heng ai,” nanai tajiu bo.#Lev 18.5 6Na i py ym naira i hawi naira ly hina nai thui: Nangchi i paleung y, “kani pri mang y ami lyn ai mo?” nanai mo (huni ly Krista ai salo mang i dengdairei pahawi kathiu ai nai, nanai sai ne); ti y baly,#Leu 30.12–14 7“Angawm kalawi by y naira y ami kathiu ai mo?” nanai mo (huni ly Krista ai kadeichi theung i nai pahawi kalau bi ai nai, nanai sai ne,) ti moh, nanai thui. 8Huni ly ati thui mo? Leu my ly ang kasa, nang i labeaung y hawi nang i paleung y py awm, nanai thui; huni ly kaichi i kang thui pi reng nai ym nai leu ne: 9ati mana nai mo nabaly Isu ly Areng ne, nanai nang ly nang i labeaung y pany hai iy, Tameuh my mymy ai ly kadeichi theung i nai pathau, nanai paleung y ym baly nang ly hengra nga ai. 10Amichi my paleung y ym u iy hawi naira nga; naibaly labeaung y pany hai u iy heng naira nga. 11Tameuh i cha-iu ly, “Ami py mymy ai ym nai ngierei ly amthang leaung y ai,” napi nai ne.#Is 28.16 12Juda hawi Krik hawi ly atira y py takhra lawh y leang, leaungrei ly nichi bawibawichi i tlang tleaung y Areng ne; naibaly mymy ai palau nai ngiereichi i tlang tleaung y mymy i neaung hawi nai sai ka-teng ny y. 13Ne, “Ami py Areng i amyn palau nai ngierei ly hengra nga ai,” napi nai ne.#Joel 2.32
14Hunaibaly nichi ly mychi i ym y nai keung ai ly mana palau u ai mo? Mymy i satang thai y naichi ly mymy ai mana ym u ai mo? Naibaly leu thui pi nai keung by y naimy mana thai u ai mo? 15Naibaly pato nai ny y baly leu ly mana thui u ai mo?#Is 52.7
“Atiti Satang Kahawi kawn ai awm nai tym hai nai keungchi i kheu ly khri pa-rei apu na ly,
nanai tajiu nai kamta.
16Na i py nichi bawibawi ly Satang Kahawi ym bawi y leang.
Ati mana nai mo nabaly Isaia my ly,
“Areng awi, kaichi i leu thui nai ly ami ym mo?” napi lawh.#Is 53.1 17Hunaibaly ym naira ly thai naira deaungkho y awm, naibaly thai naira ly Krista i leu deaungkho y awm, 18Na i py kai ly napi, Nichi ly thai u y nai sai a? Thai u chy y;#Sam 19.4
“Nichi i katyn ly meingtym tleirei y amthang iy
Nichi i leu ly khuteng taki y tym pa-rei amthang bo,” napi nai ne.
19Tumbaly Israelachi ly pany u y nai sai a? Mosi my thui manme i,#Leu 32.21
“Cheng, nanai amyn pathi y naichi ai teaung iy
kaimy nangchi ai kang takho hai ai;
Pany thai naira by y nai cheng ai teaung iy
Kaimy nangchi ai kado kang patheu hai ai,” napi.
20Naibaly Isaia ly vam parai pa-rei my,#Is 65.1
“Kai ai hau y naichi my kai ai avum bo,’
Kai ai palau y naichi teng y
kamteng hai nai awm,” napi.
21Na i py mymy ly Israelachi i molam y ly, Leu tangai y nai hawi aawi naichi teng y Kani khengrei kai kiu jaha na ly,” napi.#Is 65.2
Khumi Common Language Bible © Bible Society of Myanmar, 2005.