LEU KACHENG 2
2
Cheng naira i langseaungchi
1Deang awi, kai i patiu pi nai tangai ba; nang ai kaimy kang thui pi nai kamta, sa ai nai mana khala py tami moh. 2Cheng nai leu ai ly tangai iy, huni ai pany thai ai nai atho so. 3Cheng naira nga ai nai ahihawi naimy hnei; pany thai praw nai cheng naira nga ai nai ahui kajeaung kaji ba. 4Nang ly tangka ai py, heu vui nai yhmtheaung katui ai py hau nai kamta, pany thai praw nai cheng naira ai atho sa iy hau ba. 5Hina nai kamta sa baly nang ly Areng ai jei kaji ai nai sai pany ai i, Tameuh i satang pany pajau ai. 6Cheng naira pei nai keung ly Areng ne. Cheng naira hawi pany thai naira ly mymy teng i dengdairei ang tym nai ne. 7Mymy ly khumi meitang, leu meitang teaung nai khumichi ai sabawm iy ama hai bo. 8Mymy ly khumi takhrachi ai ka-dyh ka-dawi sa pi reng nai khumichi ai ama hai iy, mymy ai tahm khai nai khumichi ai kry nai ne.
9Nang ly kai i leu tangai baly kateng lam, meitang nai hawi adyh adawi nai i awm nai sai pany ai. Amy i sa ai avo nai sai py pany ai. 10Nang ly khumi kacheng lawm ai i, nangmy i pany nai molam y, paleung amo theu naira nga ai. 11Nang i pany praw thai nai cheng naira hawi, pany thai naira my ly nang ai ama hai ai. 12Teng y nai kalop so hai y ai nai py paka ai; huni bo y ka-jeira tym hai ai nai labeaung mang kachyh reng nai khumi, 13heng kahawi heng nai ai khai su iy, kamngo kaveng theung y anum nai khumi, 14hawi y sa ai nai ngai iy kamngo naira y amo theu nai khumi, 15ka-ymra by y nai khumichi hawi py, nang ai amkawm hai y ai.
16Nang ly kaja hawi y nai neampachy, amy i juvo tlang tleaung y ka-ym by y iy, 17Tameuh i mo y vaineng adeu nai py patawm y nai neampachy i parawi hyp nai paka pajau ai. 18Nang ly huni neampachy i yhm y chei baly, dei areng teng y chei nai lam y tako nai khumi ne. Huni yhm y chei nai ly tavau saleaung y ahihawi nai py ne. 19Huni neampachy i yhm y chei nai khumi ly mana khala py vawi ali teang thai y. Ni ly heng nai lam mang y mana khala py ali teang thai y leang bo. 20Hunai deaungkho y nang ly khumi kahawichi i awm nai sai amtiu iy, hawi nai leaungsai hawi heng ai nai tla. 21Khumi kahawichi, leu meitang teaung nai khumichi ly hini achi i pri y awm ai nai nga u ai. 22Na i py Tameuh my ly khumi hawi y naichi ai, hini pri i dengdairei patheu pawn ai. Khaileaung y prau nai acha keung ai akyn vui nai kamta, khumi hawi y naichi ai akyn vui ai.
Khumi Common Language Bible © Bible Society of Myanmar, 2005.