MATTHAI 2
2
Nisi pri mang i angvymchi
1Naibaly samrang Heroda peang nai thym khala y Judai pri i Bethlehem avang y Isu ai tapen i, khen cham, nisi mang i dengdairei khumi kachengchi ly Jerusalem avang y tym u i, 2“Judachi i samrang tapen nai ly ma mang y mo? Kaichi ly nisi mang y mymy i ka-si niu i, mymy ai chiu ai nai kang jeu nai he,” napi. 3Naibaly samrang Heroda hawi Jerusalem avang i khumi bawibawichi py huna nai thai baly paleung bi u bo. 4Hunaibaly pathyp pi nai keung kalenchi hawi, khumichi ai Reita patiu nai keungchi bawibawi ai py palau achu iy, Krista ai tapen ai nai meingtym deng. 5Naibaly nichi ly mymy teng y, “Judai pri i Bethlehem avang y tapen ai: 6amo my ly, #Mik 5.2
‘Judai pri i Bethlehem avang awi!
Nang ly Judai pri i avang theung y theang keh y leang!
Kai i khumi Israelachi ai typ nai keung lawn ai nai,
Nang theung i dengdairei peang nai keung leaungrei theu ai,’ nanai hina nai tajiu,” napi.
7Hunai bo y Heroda ly khumi kachengchi ai kangviu y palau i, ka-si amteng nai neng ly hawihai palai my deng; naibaly mymy ly nichi ai Bethlehem avang y chei hai i, 8“Chei u ly, deaungdicho i satang hawihai palai deng u; naibaly nangchi ly mymy ai niu baly, kai py chei iy mymy ai chiu teang thai ai nai kai ai thui pi praw,” napi. 9Naibaly nichi ly samrang i leu thai i chei u bo; naibaly khen cham, nisi mang y nichi i ka-si niu nai ly deaungdicho i awm naira kataw y tym y ryrei ly mymychi i mo y leh veangveang. 10Naibaly nichi ly ka-si ai niu i khri pa-rei amo theu u na. 11Naibaly nichi ly angtheung y kun u iy amhm Mari teng y deaungdicho ai niu, naibaly ambeu iy mymy ai chiu bo: naibaly mymychi i yhmtheaung khai naira paeaung u i, mymy teng y muku, kathan, mura talam iy pei u bo. 12Naibaly Heroda teng y ali teang y ai nai Tameuh my nichi i amang mang y thui pi nai deaungkho y, mymychi i pri y lam takhra mang y vawi u bo.
Aikupta pri y preng nai
13Naibaly nichi vawi nai bo y khen cham, Areng i kani pri i amtaw thau nai leaungrei ly Josepha teng y amang mang y amteng i, “Angthau ly, deaungdicho hawi amhm ai py hawi ly, Aikupta pri y preang la, kang thui pi ali y ryrei ly hu y awm veangveang; Heroda ly deaungdicho ai padei ai nai hau ai bo,” napi. 14Hunaibaly mymy ly angthau i vum aneng y my deaungdicho hawi amhm ai py hawi i, Aikupta pri y preang bo. 15#Hos 11.1 Naibaly Areng my amo i labeaung y, “Kai i chapo ai ly Aikupta pri i dengdairei theu ai nai kapalau bo,” nanai thui nai ly tym thai ai nai, mymy ly Heroda dei y ryrei ly hu y awm veangveang.
Deaungdichi ai tleh nai
16Hunaibaly Heroda ly khumi kechengchi my ni ai tapawp nai pany baly khrikhri pa-rei kado theu, naibaly khumi kachengchi teng y deng nai neng pany khyp nai kamta khumichi ai pato i, Bethlehem avang hawi huni tengtang bawibawi i saneng nyhrei akui neampacho deaungdi kangpen chauchau padei bo. 17Hunai thym khala y ly amo Jeremia my,
18“Ramah avang y tyn thai bo. #Jer 31.15
Vo nai, kadeichi ai paleung si hai nai aawi lyhlyh nai py,
Rakili ly chanauchi ai vo hai nai ne;
Nichi ly by y nai deaungkho y mymy ai ly awm hai nem thai y,”
nanai thui nai ly tym bo.
Aikupta pri i nai vawi ali teang nai
19Na i py Heroda dei nai bo y khen cham, Areng i kani pri i amtaw thau nai leaungrei ly Aikupta pri y Josepha teng y amang mang y amteng i, 20“Angthau ly, deaungdicho hawi amhm ai py hawi ly, Israela pri y chei jau: deaungdicho ai padei ai tau naichi ly dei bo,” napi. 21Hunaibaly mymy ly angthau i deaungdicho hawi amhm ai py hawi iy, Israela pri y kun bo. 22Na i py Arkelausa ly ampo Heroda i jeng y Judai pri y peang, nanai thai i, hu y chei ai nai jei bo, naibaly Tameuh my ni i amang mang y thui pi nai deaungkho y Kalili mang y chei vui bo; 23naibaly amochi i labeaung y thui nai ly, “Ni ai ly Nazaret khumi napi ai,” nanai tym thai ai nai, mymy ly avang harei Nazaret napi naira y chei iy awm bo. #Mk 1.24; Lk 2.39; Jh 1.45
Currently Selected:
MATTHAI 2: KCL02
Highlight
Share
Copy
Want to have your highlights saved across all your devices? Sign up or sign in
Khumi Common Language Bible © Bible Society of Myanmar, 2005.