MATTHAI 17
17
Awm nai sai takhra nai
(Mk 9.2–13; Lk 9.28–36)
1Naibaly Isu ly kani tariurei nai khala y ly Petera ai py, Jakob nini amjo amnau Johan ai py hawi takhra iy, mawi asang parai naira ychei hai kalau;#2 Pet 1.17–18 2naibaly nichi i mo y mymy i meimai awm nai sai ly takhra bo; my i meimai ly kanito kamta angvang iy, mymy i ateaung ly kangvang kamta kaleung bo. 3Naibaly khen cham, Mosi nini Elija ly mymy hawi arum nai nichi teng y, amteng bo. 4Naibaly Petera ly pathang i Isu teng y, “Areng awi, kaichi i vui hi y awm ai nai hawi parai; nang ngai baly hi y taichy thomrei kasa pi ai; nang i vui harei, Mosi i vui harei Elija i vui harei,” napi. 5Ni ly thui dudu nai thym khala y khen cham, tamai kaleung parai nai ly mymychi ai deng; naibaly khen cham, tamai theung i dengdairei raawi ly, “Hini ly kai i Chapo ngai parai nai ne: kai ly mymy i tlang tleaung y khrikhri pa-rei kakawn parai: mymy i leu tangai u,” napi.#AA 22.2; Leu 18.15; Sam 2.7; Is 42.1; Mt 3.17, 12.18; Mk 1.11; Lk 3.22 6Naibaly abangnaichi ly huni thai kha y khri pa-rei jei i, tabiu meu ryp bo. 7Naibaly Isu ly nichi teng y chei iy nam i, “Angthau u, jei u moh,” napi. 8Naibaly nichi ly dengtheang i Isu ai leaungrei ny y baly ami ai py niu y.
9Naibaly nichi ly mawi i dengdairei kathiu u nai thym khala y Isu ly nichi teng y, “Khumi i Chapo ly kadeichi theung i dengdairei angthau bi y ryrei ly nangchi i atiti niu naichi ly ami teng y py thui u moh,’ nanai leu pei kheng.
10Naibaly abangnaichi my ly mymy teng y, “Tumbaly Reita patiu nai keungchi ly, ‘Elija jeu manme ai nai tla,’ nanai ly ati mana nai sai mo? nanai deng.#Mal 4.5
11Naibaly mymy ly, “Elija ly jeu ai nai angchi yb nai ne, ati cheaungkhang py ang sa palai bi ai. 12Na i py kang thui pi, Elija ly tym veng bo, naibaly nichi ly mymy ai ma y i, mymy i tlang tleaung y nichi ngaingai sa lawh. Hunai kamta khyp ly Khumi i Chapo py nichi teng y patang teang ai,” nanai pathang.#Mt 11.14 13Hunaibaly mymy ly Baptis sa nai Johan i satang nichi teng y thui pi nai ne, nanai abangnaichi ly pany u bo.
Isu my deaungdi teng i vawinam patheu nai
(Mk 9.14–29; Lk 9.17–43a)
14Naibaly nichi ly khumi mipuichi teng y tym nai kha y khumi leaungrei ly mymy teng y chei i, mymy i mo y kheukhu di iy, 15“Areng awi, kai i chapo ai pahen kyh, mymy ly pathu i khrikhri pa-rei patang na; mymy ly tui y py mai y py neangneang atlym nai bo. 16Naibaly nang khi y abangnaichi teng y kahawi i, nichi ly hawi so pi thai y pasi lawh,” napi. 17Naibaly Isu my ly, “Aw, vai deung kangthau ym naira by y nai hawi, kateng so y naichi awi, kai ly nangchi teng y mana tanrei kang awm hai ai mo? Mana tanrei kang kham hai thai ai mo? Ni ai ly hi y kai teng y hawi u,” nanai pathang. 18Naibaly Isu my ni ai jo i, vawinam ly ni i taku theung i nai theu iy, deaungdi ly huni neng khypkhyp y hawi ryp bo. 19Huni bo y ly abangnaichi ly Isu teng y chei u takhra iy, “Ati mana nai kaichi ly patheu thai y lawh be?” napi. 20Naibaly mymy ly nichi teng y, “Nangchi ly ym naira di nai deaungkho y teu. Meitang khyp kang thui pi, nangchi ly anmawi hm amairei kamta ym naira awm baly, hini mawi ka-sang teng y, ‘Hi i nai huni meingtym y asyh,’ napi ai i asyh ryp ai; nangchi i vui so thai y nai sai py awm ai ny y ai. #Mt 21.21; Mk 11.23; 1 Kor 13.2 21[Ne mang ly hini amjy ly chiu sa naira hawi biu hai naira ny y baly patheu thai y leang,”] napi.
Isu ly mymy i dei ai nai satang thui pi bi nai
(Mk 9.30–32; Lk 9.43b–45)
22Naibaly nichi ly Kalili pri y awm nai khala y Isu my nichi teng y, “Khumi i Chapo ai ly khumichi i kiu y patiu hai ai i, ni ai padei u ai; 23naibaly kani thomrei kani y ly ni ai pathau teang ai,’ napi. Hunaibaly nichi ly khri pa-rei paleung mawn u bo.
Achura yhm kahm pei nai
24Naibaly nichi ly Kapernaum avang y tym iy Tameuh i achura yhm kalen pui i tangka cheaung nai keungchi ly Petera teng y chei u i, “Nangchi i Sara ly achura yhm kalen pui i tangka cheaung nai ly pei y a?” napi. Ni my ly, “Pei chy,” napi.#Theu 30.13, 38.26 25Naibaly ni ly yhm y kun iy Isu my ni teng y, “Simon, nang ly mana dawn mo? Khaileaung pri i samrangchi ly akeu hawi takeang kahm ly amichi teng y la mo? Nichi i chanauchi teng y a? khumi takhrachi teng y a? napi nai thui pi kalym vui bo. 26Naibaly ni my ly, “Khumi takhrachi teng y,” napi iy Isu my ly ni teng y, “Hunai nabaly chanauchi ly lawi ai jau chy. 27Na i py ani my nichi ai atlym hai lawh baly ang y chei ly, naibaly sakawi va i, man angchei nai ngo la iy huni i labeaung taai i tangka tlaurei nga ai; huni ly lo ly, kai i vui hawi nang i vui py nichi teng y pei,” napi.
Khumi Common Language Bible © Bible Society of Myanmar, 2005.