ESTHER 2
2
Esther ly samrangnu lawm nai
1Naibaly samrang ly kado theu nai rym bo na baly, Vasati i sa nai saichi py, mymy i ahei hai nai leu ai py adawn nai ne. 2Hunaibaly mymy hawi amrawi nai tau pei nai miteaungkehchi my samrang teng y, “Ati mana nai y samrang nang ly mo hawi nai anglochi ai hau hai y lawh mo? 3Empara pri theung i khu ka-peang neangneang theung y miteaungkehchi khai takhra iy, mo hawi nai anglo bawibawichi ai Susa mary pui, samrang nangmy i anglo i-savangra y pangym achu hai. Nichi ai nang i tli chum nai Hekai teng y au iy anglo aso hai ba. 4Naibaly samrang nangmy khreikeh nai anglo ai vawi takhra iy Vasati i jeng y samrangnu palyn ba,” nanai tau pei u nai ne.
Samrang ly huna nai tau pei nai ngai i, hunai kamta sa bo.
5Naibaly Susa mary pui theung y Ja-ira i chapo Modekai napi nai Juda cheng leaungrei awm. Ni ly Benjamin nupai theung i ne i, Kisha hawi Shimei nini i kangpreang ne. 6Babulon samrang Nebukhadnezar ly Juda samrang Jehojakhin ai patiu iy, Jerusalem mary i dengdairei hawi vui nai khala y, Modekai py langheng hawi nai theung y abawi nai ne.#2 Ar 24.10–16; 2 Neng 36.10 7Ni teng y Esther napi nai tuicho lengsang awm. Esther i Juda cheng amyn ly Hadasa ne. Ni i amhm ampo dei vui nai khala y Modekai ly ni ai pacho i, my i chaniu kypkyp kamta kry. Naibaly Esther ly mo cha hawi i, tlum tlang apheung hawi nai neampachy leaungrei ne.
8Naibaly samrang my patheu nai satang kangtha kamta, anglo neangneangchi ai Susa mary y hawi u nai khala y, Esther py abawi nai ne. Ni ai py samrang yhm y kha i, tli chum nai Hekai teng y au u bo. 9Hekai ly Esther i tlang tleaung y paleung abi nai deaungkho y meimai nga. Tlang panem pi nai hawi teicha teinei pacho patyp nai amteaung kaliki bo. Anglo savangra y hawikeh nai meingtym pei iy, samrang yhm i neampachy leaung saryhreichi ai vawi patyp i, Esther ai kry hai nai ne.
10Esther ly Modekai my tau pei nai kamta, mymy i Juda cheng ai ly apha typ vui bo. 11Modekai ly kani tleirei Esther i awm nai sai py, ni i tlang tleaung y ati mana so u na mo, nanai py pany pajau ai nai anglo savang yhm mo y avawrei aleaung ali nai ne.
12Anglochi i vui y reita kamta anglo asa hai nai ly sanengrei awm na bo. Nichi i tlang tleaung y Mura asitui hawi lo tariurei, thengmui keung asitui hawi lo tariurei tlang panem pi nai ne. Naibaly neampachychi ly ka-thui ka-thui samrang Ahasuru teng y kun u. 13Samrang teng y kun ai tla nai neampachy ly anglo savang dengdairei samrang yhm mang y chei nai khala y, amy i ngai nai ateaungchi amthyp pajau. 14Neampachy ly dym mang samrang yhm y kun ai nai nga iy khawn mang baly samrang i tli chum nai Shasakaz my kry nai i-savang mang y vawi hai teang ai nai tla. Samrang my khrei nai amyn palau y lawh baly, samrang teng y kun bi ai nai ngo y.
15Abihaila i chaniu, Modekai i tuicho lengsang, pacho nai chaniu, niu nai ngiereichi my lyh riri nai Esther ly samrang teng y kun ai nai neng tym nai khala y, anglo i-savang kry nai keung tli chum nai Hekai my pateaung pi nai ateaungchi amthyp iy chei bo. 16Hunaibaly Esther ly Ahasuru i samrang lyn nai saryh saneng, Tabeth napi nai lo horei khala y samrang yhm Ahasuru i mo y tym nai ne. 17Samrang ly takhra neampachychi tleaung y ni ai khreikeh nai deaungkho y, ni ly samrang teng y meimai nga i, samrang my khrei nai ne. Naibaly samrang my ni ai samrang i areng lukhym amym hai chum baly, Vasati i meingtym samrangnu ra y palyn bo. 18Naibaly mymy i bangtangchi hawi miteaungkeh bawibawichi ai palau iy, Esther ai tahm pasang nai cha nei pawi pui sa nai ne. Ni ly empara pri verei y huni kani ai ly kalop amdaw nai kani, nanai khai takhra iy thai hai i, samrang i tahm hawi amlau nai langseaungchi py pei pi bo.
Samrang ai Modekai my atleu nai
19Huna nai neng thym khala y samrang ly Modekai ai samrang i yhm y kry nai miteaungkeh meingtym hareira y khai bo. 20Esther ly Modekai my taviu yb nai kamta, mymy i Juda cheng ai vai khrairei ami ai py pany hai y bo. Ni ly deaungdi khala y Modekai i leu tangai nai kamta, hini molam y py leu tangai nai ne.
21Modekai ly samrang i yhm y kry nai kalop sa nai thym khala y, samrang i yhm katheu pa-kho typ nai samrang i tli chum nai leaung nyhrei Bithana hawi Teresh nini ly samrang Ahasuru i tlang tleaung y kado theu nai deaungkho y, padei vui ai nai kangviu y dawn hawi nai ne. 22Modekai ly huni satang thai nai deaungkho y samrangnu Esther teng y amti pi. Naibaly Esther ly samrang teng y Modekai i pany nai sai thui pi. 23Huni molam chih nai khala, Modekai my pei nai satang ly teng, nanai pany nai deaungkho y, huni leaung nyhrei ai akaeu naira y padei vui nai ne. Samrang ly hini molam y empara pri cha-iu theung y tajiu hai typ bo.
Khumi Common Language Bible © Bible Society of Myanmar, 2005.