NUMBER 2
2
Riaknâk Mun Ah Phun Tla Siamremnâk
1LALPA nih Mosi leh Aron sinah hi sîntirnâk tla hi a pêk na. 2Israel tla nih mun an khuar tikah mah murui chiau puanzâr tangah um hen mah chi singsiahnâk puanthlâi um chiau ding asi. Um mun chu Puanin hêl bung hen an siam ding asi.
3-9Suahlei kângah Juda tla chu mah murui puanzâr tang chiauah an murui hotu tang chiauah hi hâwi hen an um ding asi.
| Phun | Ruitu | Minung zat |
|---|---|---|
| Juda | Aminadab fapa Nason | 74,600 |
| Isakar | Zuar fapa Nethanel | 54,400 |
| Zebulun | Helon fapa Eliab | 57,400 |
| A ektê fawnh hen: | 186,400 |
A masa chem ah Juda murui kal ding.
10-16Simlei kâng Reuben murui tla chu mah murui puanzâr tang chiauah an murui hotu tangah hi hâwi hen an um ding asi.
| Phun | Ruitu | Minung zat |
|---|---|---|
| Reuben | Sedeur fapa Elizur | 46,500 |
| Simeon | Zurisadai fapa Selumiel | 59,300 |
| Gad | Deuel fapa Eliasap | 45,650 |
| A ektê fawnh hen: | 151,450 |
Reuben murui chu a masa chem zûltu murui nihnâk an si lai.
17A masa chem mi murui nih leh a madung mi murui nih karah Levi tla Puanin zawnhtu an kal ding asi. Murui kip chu riakmun a mi hâwi hen a sang vima hen kal ding asi, mah puanzâr mi mun chiauah.
18-24Tlâklei kângah Efraim murui tla chu mah puanzâr tang chiauah an murui hotu tangah hi hâwi hen an um ding asi.
| Phun | Ruitu | Minung zat |
|---|---|---|
| Efraim | Amihud fapa Elisama | 40,500 |
| Manaseh | Pedazur fapa Gamaliel | 32,200 |
| Benjamin | Gideoni fapa Abidan | 35,400 |
| A ektê fawnh hen: | 108,100 |
Efraim murui chu a murui thumnâk ah an kal lai.
25-31Marlei kângah Dan murui tla chu mah puanzâr tang chiauah mah murui hotu tangah hi hâwi hen an um ding asi.
| Phun | Ruitu | Minung zat |
|---|---|---|
| Dan | Amisadai fapa Ahiezer | 62,700 |
| Aser | Okran fapa Pagiel | 41,500 |
| Naphtali | Enan fapa Ahira | 53,400 |
| A ektê fawnh hen: | 157,600 |
Dan murui chu a madung chem ah an kal lai.
32Israel mi tla a murui a murui hen rîn mi zat chu 603,550 asi. 33LALPA nih Mosi sinah thu a pêk na hâwi hen Israel midang vial leh Levi phun chu rîn sih an si lo.
34Israel mi tla nih chun LALPA nih Mosi sinah thu a pêk mi zawng chu an ti, mah puanzâr tang chiauah an um le, anmah chi chiau hen an kal.
Bawm Common Language Bible © Bangladesh Bible Society, 2004. All rights reserved.