MATHAI 2
2
Khawsak Lei Mifing Tla
1Chun, lalchem Herod a lal liauah Judai ram ah Bethlehem ah Jisu a hawng suak liauah, ngâinik, khawsak lei thawk hen mifing tla Jerusalem khua ah an hawng kal le, “Kha zeiah Juda tla lalchem a hawng suak mi chu? 2Khawsak leiah a ârfi kan muh le, amah mâimûk ding hen kan hawng kal asi,” an ti.
3Chun, lalchem Herod nih chun chu chu a theih kâ hen a lawksawng rawh. Jerusalem mi zawzawng khawm an lawksawng bâk. 4Chun, bâwlpu lal tla leh Dân sîntirtu tla zawzawng chu a pumh na le, Mesia suaknâk ding chu a deih na.
5Chun, annih nih chun a sinah, “Judai ram ah, Bethlehem ah, hi hâwi hen khuavâng nih a rîn mi kha,
6‘Nang, Bethlehem, Juda ram ah mi,
Juda khuapi lakah na mê chem rîlmâl lo!
Na sung thawk hen lâirêltu a hawng suak awt ruangah,
ka mi Israel tla vêngtu ding chu, ti hi,’ ” an ti.
7Chu nûnah chun Herod nih a thup hen mifing tla chu a kawh na le, fiang tak hen ârfi langh liau chu a deih na. 8Chun, annih chu Bethlehem ah a kaltir na le, “Kal ule, nâutê thu chu fiang tak hen deih u; chun kei khawm nih amah chu mâi ka hawng mûk khonâk ding hen nan muh kâ hen hawng ka simh u,” a ti.
9-10Chun, lalchem thu chu an theih le, an kal rawh; chun, ngâinik, khawsak leiah ârfi an muh mi kha nâutê umnâk tlûn zâwn ah tlung hen a dîr lânlo chu an mâi leiah a kal vima. Chun, ârfi chu an muh rawh chun thungâi anna lâwm. 11Chun, in sungah an va lût le, a nu Mari sinah nâutê chu an muh le, an bawk le, mâi an mûk; chun, an robâwm tla an awng le, a sinah chun lâwmman ngûn tla, bawrâw tla leh murrah tla an pêk.
12Chun, Herod sinah kîr nawlh lo ding hen an mang ah Pathian simh hen an um ruangah anmah khua leiah lam dang hen an tlung rawh.
Aigupta Leiah Teknâk
13Chun, an tlung nûnah, ngâinik, Lalpa vânmifial chu Josef sinah a mang leiah â langh le, “Thawk le, nâutê leh a nu put na le, Aigupta ram ah tek rawh, ka nan simh nawlh lânlo chu chunah chun um kumza; Herod nih nâutê veih ding hen a hâwl awt asi,” a ti.
14Chun, Josef chu a thawk le, mûi leh zân ah nâutê leh a nu chu a put na le, Aigupta ram ah a kal; 15chun, Herod thih lânlo chu chunah chun a um kumza; Lalpa khuavâng kâ ah, “Ka fapa chu Aigupta ram ah mi ka kawh,” ti hen a sim mi kha a hawng tlung khonâk ding hen.
Herod Nih Mipa Ngâksia
Tla A Thahnâk
16Chu liau chun Herod nih mifing tla nih an perpet asi ti a theih kâ hen a thinthawk, mi a fial le, a tik fiang tak hen mifing tla a deih na hâwi khan, Bethlehem leh a kiangkam zawzawng ah mipa ngâksia kum nih rî hen a tanglei mi chu an ektê hen a thah hep na.
17Chun, khuavâng Jeremia nih,
18“Ram khua ah hâu an theih,
ṭap tla, mithi ngâi hen rûm leh âi tla,
Rakel nih chun a fa tla a ṭapnawh na le,
an umlo rawh ruangah lungngamh kho asi lo,”
ti hen a sim mi kha a dik asi.
Aigupta Thawk Hen Kîrnâk
19Sikhawmsele, Herod chu a thi nûnah, ngâinik, Lalpa vânmifial Aigupta ram ah chun Josef sinah a mang ah â langh le, 20“Thawk le, nâutê leh a nu put na le, Israel ram ah kal rawh; nâutê thah tumtu tla kha an thi rawh,” a ti. 21Chun, a thawk le, nâutê leh a nu chu a put na le, Israel ram ah a lût rawh.
22Sikhawmsele, Arkelaus a pa Herod ruangrûl ah Judai ram ah a lal ti a theih rawh chun chunah va kal a ṭih; chun a mang leiah simh hen a um ruangah Galili leiah a kal ving le, khua pakhat Nazaret an ti mi ah chun a va um rawh. 23“Anih chu ‘Nazaret mi’ an ti lai,” ti hen khuavâng tla kâ ah a sim mi kha a hawng tlung khonâk ding hen.
Currently Selected:
MATHAI 2: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.