MATHAI 18
18
Ngâksiatê Hâwi Hen A Nâutirnâk
(Mark 9.33-37; Luk 9.46-48)
1Chu liau tak chun ṭhiruai tla chu Jisu sinah an hawng kal le, “Vân Ram ah âume rokual chem lai?” an ti.
2Chun, anih nih chun ngâksiatê a kawh le an lakah a dîrtir le, 3“Thungâi tak hen ka nan ti na, nanna lêt hen ngâksiatê hâwi nan silo chun Vân Ram ah nan lût rîlmâl lai lo. 4Chun, hi ngâksiatê hâwi hen â nâutir mi zawng, chu minung chu Vân Ram ah a rokual chem lai. 5Chun, âuzawng ka min ruangah hi hâwi ngâksiatê pakhat lawmhtu zawng chu keimah an ka lawmh mi asi lai.
Tlûknâk Umtirtu Tlûnpitnâk
(Mark 9.42-48; Luk 17.1-2)
6“Sikhawmsele, âuzawng hi bang an ka zumhtu mi mê tla lakah pakhat mawh an ka zumhnâk khamtirtu zawng chu an ngâwng ah fângrialnâk lung lianpi awihtir hen tisumsumriat sungah thlâk ving sele a rangah a ṭha dauh lai. 7Mi zapi tla zumhnâk khamtirtu thil tla ruangah laikulh tlûn a pit! Tlûknâk chu um ding rêng asi. Sikhawmsele, tlûknâk umtirtu tlûn chu a pit! 8“Chun, na kut nih mawh na kê nih mawh a nan sualtir chun tan le, lawnh ving. Kut panih mawh kê panih mawh nei hen zungzâl mei ah lawnh ngâk chun suak sual hen mawh kekhêng hen mawh nungnâk ah lût na rangah a ṭha dauh. 9Chun, na mit nih a nan sualtir chun chawih zek le, lawnh ving. Mit khiang khinih nei hen Gehena mei ah lawnh ngâk chun mit khiang khat nei hen nungnâk ah lût na rangah a ṭha dauh. 10“Hi bang mi mê tla lakah pakhat khawm hi zauhnawmh lo ding hen a thiamthih u; an vânmifial tla nih vân ah ka Pa vân ah mi mêl chu an muh kumza tâwn ti ka nan simh na hi.#18.10 Zeimaw mi lehnâk ah chun chân 11 nâk hi an sap: ‘Minung Fapa chu a tlâu mi ruangsuah ding hen a hawng kal ruangah.
Dawrâ Tlâu Tahṭhimhnâk
(Luk 15.3-7)
12“Zei hâwi hen nan ngaih? Mi âunih mawh dawrâ zâ nei sele, an lakah pakhat pêu sele, sâwmkua leh pakua chu mâk hen, tlângah kal hen a tlâu mi chu a hâwl lai lo mazei? 13Thungâi tak hen ka nan simh na, a tawng nawlh vêk chun sâwmkua leh pakua a tlâu lo mi tla tlûn ngâk hen chun a tlûnah â lâwm dauh lai. 14Chu hâwi ber hen mi mê tla lakah pakhat a vei mi khawm hi nan Pa vân ah mi duhzia asi lo.
Unau Sual Tlûnah Simhfâinâk
15“Chun, na unau nih na tlûnah thilsual ti sele, kal le, amah leh nangmah cho theih hen a sualnâk chu simhfâi. A nan ngâi piak chun na unau chu na neh mi asi lai. 16A nan ngâi piak lo lam chun, midang pakhat mawh panih mawh na sinah put le, chuvachun thu zeizawng chu theihtu panih mawh pathum mawh kâ lakah birhtir hen a um khonâk ding hen. 17Chun, annih khawm chu a ngâi piak na lo chun, kawhmi tla sinah tlunh le; chun kawhmi tla khawm a ngâi piak na lo chun anih chu Phundang leh siah khawlhtu hâwi hen ruat si seh.
Khapnâk Leh Phalnâk
18“Thungâi tak hen ka nan simh na, tual tlûnah zeizawng nan phuar mi vial vân ah phuar asi lai; tual tlûnah zeizawng nan phelh mi vial vân ah phelh asi lai. 19“Thungâi tak hen ka nan simh nawlh na, tual tlûnah hin nan lakah minung panih an thil deih leikâng ah thu anna rual chun, ka Pa vân ah mi nih ti piak hen an um lai. 20Minung panih mawh pathum mawh ka min hen anna pûmnâk zawng ah an lakah ka um tâwn,” a ti.
Thilsual Titu Tlûnah
Ngaihdamnâk Zat
21Chu liau chun Peter a hawng le, a sinah, “Lalpa, ka unau nih vei zei zat thilsual ti sele ka ngaihdam ding? Vei sarih tiang ma si lai,” a ti. 22Jisu nih a sinah, “Vei sarih tiang hen ka nan ti lo, vei sarih mun sâwmsarih tiang hen, ka nan ti dauh asi,” ti hen, a sâng.
To-aw Sual Tahṭhimhnâk
23“Churuangah chun, Vân Ram chu, lalchem âunih mawh a to-aw tla sinah sum thâwngthâng ruat fiang ding mi hen tahṭhimh asi. 24Chun, ruat fiang ding hen a hawng dawmh rawh chun minung pakhat talent#18.24 Talent khat hi ASV simhfiangnâk lakah chun dollar sâng khat tluk ding a ti le, dollar khat chu kan tangka hen chun Tk. 57.00 tluk asi. sîng khat battu a sinah an hawng put. 25Chun, pêk ding a nei lo ruangah a pu nih chun amah hen a nupi hen, a fa tla hen, a neih zawzawng zuar hen rulh ding thu a pêk. 26Chuvachun, to-aw nih chun, ‘Ka pu, hawng ka ngâk dauh rih le, a ektê hen ka nan pêk ver lai, ti hen a bawk le, mâi a mûk. 27Chun, chu to-aw pu nih chun thungâi a zângfah le, a thlah le, â bat mi chu a ngaihdam rawh.
28“Sikhawmsele, chu to-aw chu a suak le, a to-aw hâwi tla lakah pakhat denari#18.28 Denari khat hi ni khat lawh man tluk asi. Tuan san ah mi nih ni khat rian a ṭuan chun denari khat a lawh tâwn asi. zâ battu a muh le; chun a theih le, ‘Na bat mi kha hawng ka pêk rawh,’ ti hen, a rawm a dît. 29Chuvachun, a to-aw hâwi chu a bawk le, ‘Hawng ka ngâichâng rih le, ka nan pêk teh lai,’ ti hen a ngiar chiam. 30Sikhawmsele, a duh lo le, â bat mi chu a lîm lânlo chu rêngin ah a khumh. 31Chuvachun, a to-aw hâwi tla nih chun a thilti chu an muh le, thungâi an lawksawng le, a thilti zawzawng chu an pu sinah an va simh rawh. 32Chu kâ hen a pu nih chun anih chu a kawh le, a sinah, ‘To-aw sual, na ka ngiar ṭualmâl ruangah na bat mi zawzawng kha ka nan ngaihdam le, 33ka nan zângfah hâwi khan nang khawm nih na to-aw hâwi chu na zângfah ding si lo mazei?’ a ti. 34Chun, a pu chu a thinthawk le, â bat mi zawzawng a lîm lânlo chu rêptu tla sinah a pêk rawh. 35Mi kip nih thinlung tak hen nan unau tla nan ngaihdam lo chun ka Pa vân ah mi khawm nih chu hâwi ber hen nan tlûnah a ti bâk lai,” a ti.
Currently Selected:
MATHAI 18: BCLBV
Highlight
Copy
Compare
Share
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.