EXODUS 40

LALPA Puanin Dirhnâk leh Apnâk

1LALPA nih Mosi sinah, 2“A thla khatnâk a ni khat ni ah LALPA umnâk Puanin chu dirh; 3LALPA Thudântuk Bâwm Thupêk Parâ umnâk chu a sungah siah le, a mâilei ah puanzâr siah. 4Dawhkân chu a sungah luh le, a thuamthil tla chu a tlûnah siah. Meichêu chu a sungah luh le, a tlûnah a chêunâk toh. 5Rimthâw duahnâk ngûn mâichâm chu Thudântuk Bâwm mâika ah siah le, Puanin mâilei ah puanzâr chu thlaih. 6Duah mi thil ap rang ding ah mâichâm chu Puanin mâilei ah siah. 7Ṭâwlnâk mâihûm chu Puanin leh mâichâm karah siah le, tî tleng. 8A kulhnâk puanzâr chu kulh dak hen zâr le, a tualmâi leikâng puanzâr chu thlâi.

9“Churawhchun, Puanin leh a thuamthil zawzawng chu sariak thenhlimh buaih hen ap le, a hawng thenhlimh lai rawh. 10Chu nûnah chun mâichâm leh a thuamthil zawzawng a thenhlimh lai rawh. 11Chu hâwi ber hen ṭâwlnâk mâihûm leh a tohnâk khawm chu ap.

12“Aron leh a fapa tla chu Puanin tualmâi ah kalpi na le, dân hâwi hen tak khawlh ding hen simh na. 13Aron chu Bâwlpu thuam hen thuamh le, sariak thuh le, hi hâwi hen zarh thil ah siam, bâwlpu ah ka rian a ṭuan khonâk ding hen. 14A fapa tla hawngpi na le, kawrdawh ruktir na. 15An pa hâwi hen sariak thuh na le, ka sinah bâwlpu rian an ṭuan khonâk ding hen. Hi nûnthâi ah zeiliau khawm ah hi sariak thuhnâk nih bâwlpu ah a siam na rawh asi,” a ti.

16Mosi nih chun LALPA nih thu a pêk mi hâwitê hen a ti rawh. 17Aigupta ram an suaktâk nûnah a kum nihnâk a thla khatnâk a ni khat ni ah LALPA umnâk Puanin chu an dirh rawh. 18Mosi nih a tohnâk a toh le, kâwpmi tung tla a toh, a khuahkhang a kâwp, a tung tla a phun. 19Puanin chu a tlûn khuh a pharh le, a tlûnah mi khuhnâk hen a khuh, LALPA nih thu a pêk mi hâwitê hen. 20Lungtlêp panih chu a lâk le, Thudântuk Bâwm ah a siah. Thing tluan chu bâwm a nâ kual tla lakah a sawh le a sinh. 21Churawhchun, bâwm chu Puanin ah a siah le, a kar dangnâk puan a zâr. Chu hâwi hen LALPA nih thu a pêk mi hâwi hen Thudântuk Bâwm chu a kilkâwi.

22Dawhkân chu Puanin sungah a siah le, puanzâr lênglei marlei kângah, 23LALPA nih thu a pêk mi hâwi hen LALPA sinah ap mi sang chu dawhkân tlûnah a siah. 24LALPA nih thu a pêk mi hâwi hen dawhkân zâwnah simlei kâng sîrah meichêu chu Puanin sungah a siah le, 25LALPA nih thu a pêk hâwi hen LALPA umnâk ah meichêu a kaih. 26LALPA nih thu a pêk mi hâwi hen ngûn mâichâm chu Puanin sungah puanzâr mâika ah a siah le, 27rimthâw a duah. 28Puanin tualmâi ah puanzâr chu a thlâi le, 29chu puanzâr mâika ah chun thil ap duahnâk mâichâm a siah. LALPA nih thu a pêk hâwi hen chu tlûnah chun duahphung apnâk, eiphung apnâk hen bâwlnâk a pêk. 30Ṭâwlnâk mâihûm chu Puanin leh mâichâm karah a siah le, tî a tleng. 31Mosi, Aron leh a fapa tla nih chunah chun an kut leh an kê tla an ṭâwl. 32LALPA thupêk hâwi hen Puanin ah mawh mâichâm ah an kal tik zawng ah anna ṭâwl. 33Mosi nih Puanin leh mâichâm kulhnâk ding puanzâr a zâr le, a kulh tualmâi khawm ah puanzâr a thlaih. Churawhchun, rianṭuan zawzawng chu a lîm rawh.

LALPA Umnâk Puanin

Tlûnah Mi Sûm

(Num 9.15-23)

34LALPA Puanin chu sûm nih a hawng khuh le, mit ser rê hen chêu nih chun LALPA umnâk chu a khattir rawh. 35Churuangah chun Mosi chu Puanin ah a lût kho lo rawh. 36Puanin ah mi sûm chu â ṭhial tik cho ah Israel tla chu an riakmun ah mi chu anna ṭhial. 37Chu sûm chu a um kar zawng chu an mun chu âukhawm anna ṭhial lo. 38An kal kar zawng chu sûn ah chun LALPA umnâk Puanin tlûnah sûm muh kho hen a um, zân ah chun Puanin tlûnah meialh hâwi hen an muh.

Currently Selected:

EXODUS 40: BCLBV

Highlight

Copy