EXODUS 21
21
Sal Tla Mang Dân
(Deut 15.12-18)
1“Israel mi tla rangah hi dân tla hi pêk na: 2Hebrai lakah mi sal nan châwk chun kum ruk nan rian a ṭuan lai. A kum sarihnâk ah chun tlanh lo hen a suak ding asi. 3Sal asi liauah nupi nei lo mi asi chun, a suak tikah a nupi put lo hen a mah lâwng hen a suak lai; nan sal chu nupi nei chia asi chun a nupi a suakpi kho lai. 4A nupi chu a pu nih a ṭhît piak mi asi chun, fanu fapa tla ring khawmsele a nu leh a fa tla chu a pu tâ asi, amah lâwng a suak ding asi. 5Chu sal nih chun a pu, a nupi leh a fa tla a siang lo hen suak ding a duh lo chun, 6a pu nih Pathian sawnhnâk mun ah a kalpi ding asi. Chunah kawtkâ mawh kawtkâ tung kiangah dîrtir sele, a nâ vih seh. Churawhchun, san tlum hen a sal asi lai rawh.
7“Mi nih a fanu sal ah a zuar chun, mipa sal si mi tla hâwi hen a suak ding si loh. 8Nunau chu nupi rangah mang ding hen duhtu sinah zuar asi hen, a mipa nih a duh nawlh lo chun, a pa sin lîlâ ah zuar nawlh ding asi; a pu nih ramdang mi sinah a zuar kho lai lo, dawh lo tak hen a mang ruangah. 9Mi nih a fapa rangah sal nunau a châwk chun, fanu hâwi hen a zauh ding asi. 10Mi nih nupisûn nei khawmsele, a lânah mi hâwitê hen ei leh bar leikâng leh ni leh puan leikâng khawm a nupi masa hen thuneihnâk bang cho a pêk na ding asi. 11Hi hâwi hen a lakah thil ti ding hâwi a ti lo chun, a man zeikhawm tawng lo hen a suah ding asi.
Siat Leh Râwknâk Thu Ah Dân Tla
12“Mi a vuak hen thahtu chu, amah khawm thah bâk ding asi. 13Sikhawmsele, palh sual mi asi hen thah a tum mi asi lo chun, ruangsuahnâk ding hen ka ruat mi mun ah a him kho lai. 14Sikhawmsele, mi nih thinthawk hen midang a thah êu chun, amah khawm thah bâk ding asi, him ding hen ka mâichâm ah kal khawmsele a âwl lai loh.
15“Âuzawng a nu leh pa vuaktu chu thah ding asi.
16“Âuzawng nih sal ah zuar ding hen mawh siah ding hen mawh minung a fîr asi chun a fîrtu chu thah ding asi.
17“A nu mawh a pa mawh siatbarhtu chu thah ding asi.
18“Mi anna sual hen mi pakhat nih kut tum hen mawh lung hen mawh a vuak hen a thah lo chun chu minung chu rêp ding asi lo, a vuak mi chu rîl thlo hen, 19a nehnûn ah a thawk kho hen lênglei ah kal kho asi chun, a vuaktu pa nih a ngawr kar zawzawng a zauhkhenh hen a ni lawh a rulh ver ding asi.
20“Mi nih vuakfung hen a sal a vuak chun, nunau mawh mipa mawh khawm si sele, a thi chun chu minung chu rêp asi lai. 21Sikhawmsele sal chu ni khat mawh ni nih mawh a dam rih chun, a vuaktu chu rêp ding asi lo, a neih a vei mi chu amah rêpnâk asi ko.
22“Mi anna sual hen nunau a râi mi rangah ngânfâk an pêk hen a fa a siat chun, chu nunau chu a dêngkhuai lah khawmsele, ngânfâk pêktu nih chun chu nunau pasal nih a hauh zat zawng a châwi ding asi, lâirêltu tla remtinâk hen. 23Sikhawmsele, chu nunau chu liamh asi chun thih ruangrûl ah thih, 24mit ruangrûl ah mit, ha ruangrûl ah ha, kut ruangrûl ah kut, kezaphah ruangrûl ah kezaphah, 25duahtu chu duah bâk ding, liamhtu chu liamh bâk ding, thisen suahtu chu thisen suah bâk ding.
26“Mi nih a to-awnu mawh a to-awpa mawh a mit ah a vuak hen, a râwk chun, a mit man ruangrûl ah sal a sinâk ah mi a suak ding asi. 27A hâ tlawng rel a chumh chun, a hâ man ruangrûl ah sal a sinâk lakah mi a suak ding asi.
Dâwngpu Tla Mawhphurhnâk
28“Chawchal nih âumawh thi thlo hen suk sele, chu chaw chu thi thlo hen seh ding asi, a sâ khawm ei ding asi lo; a dâwngpu lam chu rêp ding asi lo. 29Sikhawmsele, chu chaw chu a râng hen minung suk mang asi chun, a dâwngpu chu simh lemang hen kilkâwi hen a rêng duh lo hen midang rangah thi thlo a suk chun chu chaw chu lung hen thi thlo seh ding asi, a dâwngpu khawm thah bâk ding asi. 30Sikhawmsele, amah nungnâk hum ding a châwi asi chun, a châwi ding zat chu a pêk ding asi. 31Chawchal nih mipa ngâksia mawh nunau ngâksia mawh a thah chun, chu dân hâwitê hen rêl ding asi. 32Chawchal nih sal nunau mawh sal mipa mawh a thah chun, chaw dâwngpu nih sal dâwngpu rangah tangka sâwmthum a chawih ding asi, chawchal chu thi thlo seh ding asi.
33“Mi nih khur sinh a awng hen mawh, khur a chawh le, a khâr lo hen chawchal mawh sanatung mawh a tlâ chun, 34Chu ran man chu a châwi ding asi. Ran dâwngpu rangah a man a pêk lai le, ran a thi mi â ting kho lai. 35Âu chawchal nih mawh midang chawchal a thah chun a nung mi chu zuar na sele, a tangka chu a ṭhen na seh, ran a thi mi meh khawm a ṭhen na seh. 36Chu chaw chu suk mang asi ti theih ko hen a dâwngpu nih a kilkâwi hen a rêng lo chun a thi mi ruangrûl ah a suktu chawchal a nung mi a châwi lai le, a thi mi ruak chu â ting lai.
Currently Selected:
EXODUS 21: BCLBV
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.
EXODUS 21
21
Sal Tla Mang Dân
(Deut 15.12-18)
1“Israel mi tla rangah hi dân tla hi pêk na: 2Hebrai lakah mi sal nan châwk chun kum ruk nan rian a ṭuan lai. A kum sarihnâk ah chun tlanh lo hen a suak ding asi. 3Sal asi liauah nupi nei lo mi asi chun, a suak tikah a nupi put lo hen a mah lâwng hen a suak lai; nan sal chu nupi nei chia asi chun a nupi a suakpi kho lai. 4A nupi chu a pu nih a ṭhît piak mi asi chun, fanu fapa tla ring khawmsele a nu leh a fa tla chu a pu tâ asi, amah lâwng a suak ding asi. 5Chu sal nih chun a pu, a nupi leh a fa tla a siang lo hen suak ding a duh lo chun, 6a pu nih Pathian sawnhnâk mun ah a kalpi ding asi. Chunah kawtkâ mawh kawtkâ tung kiangah dîrtir sele, a nâ vih seh. Churawhchun, san tlum hen a sal asi lai rawh.
7“Mi nih a fanu sal ah a zuar chun, mipa sal si mi tla hâwi hen a suak ding si loh. 8Nunau chu nupi rangah mang ding hen duhtu sinah zuar asi hen, a mipa nih a duh nawlh lo chun, a pa sin lîlâ ah zuar nawlh ding asi; a pu nih ramdang mi sinah a zuar kho lai lo, dawh lo tak hen a mang ruangah. 9Mi nih a fapa rangah sal nunau a châwk chun, fanu hâwi hen a zauh ding asi. 10Mi nih nupisûn nei khawmsele, a lânah mi hâwitê hen ei leh bar leikâng leh ni leh puan leikâng khawm a nupi masa hen thuneihnâk bang cho a pêk na ding asi. 11Hi hâwi hen a lakah thil ti ding hâwi a ti lo chun, a man zeikhawm tawng lo hen a suah ding asi.
Siat Leh Râwknâk Thu Ah Dân Tla
12“Mi a vuak hen thahtu chu, amah khawm thah bâk ding asi. 13Sikhawmsele, palh sual mi asi hen thah a tum mi asi lo chun, ruangsuahnâk ding hen ka ruat mi mun ah a him kho lai. 14Sikhawmsele, mi nih thinthawk hen midang a thah êu chun, amah khawm thah bâk ding asi, him ding hen ka mâichâm ah kal khawmsele a âwl lai loh.
15“Âuzawng a nu leh pa vuaktu chu thah ding asi.
16“Âuzawng nih sal ah zuar ding hen mawh siah ding hen mawh minung a fîr asi chun a fîrtu chu thah ding asi.
17“A nu mawh a pa mawh siatbarhtu chu thah ding asi.
18“Mi anna sual hen mi pakhat nih kut tum hen mawh lung hen mawh a vuak hen a thah lo chun chu minung chu rêp ding asi lo, a vuak mi chu rîl thlo hen, 19a nehnûn ah a thawk kho hen lênglei ah kal kho asi chun, a vuaktu pa nih a ngawr kar zawzawng a zauhkhenh hen a ni lawh a rulh ver ding asi.
20“Mi nih vuakfung hen a sal a vuak chun, nunau mawh mipa mawh khawm si sele, a thi chun chu minung chu rêp asi lai. 21Sikhawmsele sal chu ni khat mawh ni nih mawh a dam rih chun, a vuaktu chu rêp ding asi lo, a neih a vei mi chu amah rêpnâk asi ko.
22“Mi anna sual hen nunau a râi mi rangah ngânfâk an pêk hen a fa a siat chun, chu nunau chu a dêngkhuai lah khawmsele, ngânfâk pêktu nih chun chu nunau pasal nih a hauh zat zawng a châwi ding asi, lâirêltu tla remtinâk hen. 23Sikhawmsele, chu nunau chu liamh asi chun thih ruangrûl ah thih, 24mit ruangrûl ah mit, ha ruangrûl ah ha, kut ruangrûl ah kut, kezaphah ruangrûl ah kezaphah, 25duahtu chu duah bâk ding, liamhtu chu liamh bâk ding, thisen suahtu chu thisen suah bâk ding.
26“Mi nih a to-awnu mawh a to-awpa mawh a mit ah a vuak hen, a râwk chun, a mit man ruangrûl ah sal a sinâk ah mi a suak ding asi. 27A hâ tlawng rel a chumh chun, a hâ man ruangrûl ah sal a sinâk lakah mi a suak ding asi.
Dâwngpu Tla Mawhphurhnâk
28“Chawchal nih âumawh thi thlo hen suk sele, chu chaw chu thi thlo hen seh ding asi, a sâ khawm ei ding asi lo; a dâwngpu lam chu rêp ding asi lo. 29Sikhawmsele, chu chaw chu a râng hen minung suk mang asi chun, a dâwngpu chu simh lemang hen kilkâwi hen a rêng duh lo hen midang rangah thi thlo a suk chun chu chaw chu lung hen thi thlo seh ding asi, a dâwngpu khawm thah bâk ding asi. 30Sikhawmsele, amah nungnâk hum ding a châwi asi chun, a châwi ding zat chu a pêk ding asi. 31Chawchal nih mipa ngâksia mawh nunau ngâksia mawh a thah chun, chu dân hâwitê hen rêl ding asi. 32Chawchal nih sal nunau mawh sal mipa mawh a thah chun, chaw dâwngpu nih sal dâwngpu rangah tangka sâwmthum a chawih ding asi, chawchal chu thi thlo seh ding asi.
33“Mi nih khur sinh a awng hen mawh, khur a chawh le, a khâr lo hen chawchal mawh sanatung mawh a tlâ chun, 34Chu ran man chu a châwi ding asi. Ran dâwngpu rangah a man a pêk lai le, ran a thi mi â ting kho lai. 35Âu chawchal nih mawh midang chawchal a thah chun a nung mi chu zuar na sele, a tangka chu a ṭhen na seh, ran a thi mi meh khawm a ṭhen na seh. 36Chu chaw chu suk mang asi ti theih ko hen a dâwngpu nih a kilkâwi hen a rêng lo chun a thi mi ruangrûl ah a suktu chawchal a nung mi a châwi lai le, a thi mi ruak chu â ting lai.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Bawm Common Language Bible © Bangladesh Bible Society, 2004. All rights reserved.