ESTHER 2
2
Esther Lalnu Asinâk
1A nehnûnah chun lal thinrun chu a dâi dauh le, Vasti thilti leh amah thuruat tla chu a thinlung ah a dawn. 2Churawhchun, a kiangah krai pêktu zeimaw mi tla nih, “Zei rangah nungâk thenhlimh mêlṭha na hâwl dahlo rih? 3Ram pumpi ah ram ṭhen kip ah rianṭuantu tla chu nungâk mêlṭha zawzawng nunau siahnâk Harem ah Susa khuapi ah hin hawng ver ding hen thu pêk na. Mi tilkhei Hegai nunau zauhkhenhtu sinah siah hen ṭhadek zauhkhenh na ding hen. 4Churawhchun, nungâk na duh chem mi chu na lâk lai le, lalnu Vasti mun ah siah ding hen,” an ti. Lal nih krai ṭhatak si hen a ruat le, â awi rawh.
5Susa ah chun Juda mi pakhat Jair fapa a min Mordekai a um le, Kis leh Shimei thlâk Benjamin phun ah mi asi. 6Babulon lalchem Nebukadnezar nih Juda lalchem Jehoiakin leh sal dang tla Jerusalem ah mi a put na liauah Mordekai khawm an sinah â tel bâk. 7Taksa tlâi Esther a nei le, Hebrai leikâng hen chun Hadasah asi; nungâk mêlṭha tak asi le, dawhnâk tak nei mi asi. A nu leh pa nih an thih tâk liauah Mordekai nih a fanu hâwitê hen a châwm.
8Lal nih nungâk tam tak Susa ah hawng put na ding hen thu thar a suah le, chu nungâk lakah Esther khawm â tel bâk. Anih khawm chu lal in ah nunau siahnâk Harem bulsântu Hegai, vêngnâk ah siah asi bâk. 9Esther chu Hegai thinlung a tawng le, dâwtlawh hen a um, a lâk tîr thawk hen tlawlhlo tê hen a bulsân le, a dangtê hen buh-an a pêk. Harem ah mun ṭha chem nunau siahnâk mun a pêk le, a bîk hen lal in thawk hen nunau pasarih amah zauhkhenh ding hen a ruat na. 10Mordekai nih Esther rangah Juda phun asi ti sim lo ding hen a simh. 11Nisiar hen Mordekai chu zei hâwi hen thil a um ti leh Esther tlûnah zei hâwi hen thil a hawng tlung ti theih ding duh hen nunau siahnâk kulh ah chun â vel lemang.
12Chu hâwi a nunau dawh tak hen bulsân ding hen kum khat a duh. Murrah sariak chulh ding hen thla ruk, a dang thla ruk balsam sariak chulh ding a duh rih. Chu nûn chun nungâk chu pakhat vima hen lalchem Zerzes sinah kalpi ding asi rawh. 13Nunau siahnâk mun ah mi a kal tikah chun amah duhzia hâwi chiau hen a thuam ding asi. 14Zânleibâi ah a va kal lai le, a thâituan ah nunau siahnâk Harem mun dangah, lal nupisûn vêngtu mi tilkhei Saasgaz zauhkhenhnâk ah siah ding asi. Lal nih a duh na hen an min bîk hen a kawh na mi asi lo chun a sinah an va kal ding asi lo rawh. 15Esther chu lal sinah kal ding a hun rawh. Abihail fanu Esther, Mordekai taksa tlâi, amah fanu hâwi hen a châwm mi chu âuzawng nih an muh chun an lungnâ a tlâ. Amah kal cham asi rawh chun, nunau siahnâk vêngtu mi tilkhei Hegai nih thuamh dân ding a simh zia zia hen â thuam rawh. 16Lalchem Zerzes a lalnâk hen kum sarihnâk, a thla rânâk Tebeth thla ah lal in ah Zerzes sinah an kalpi rawh. 17Lal nih chun nungâk dang zawzawng ngâk hen a duh dauh le, midang tla ngâk hen a sunhsak hen a thinlung a tawng. Lalchem Zerzes nih lallukhuh a lû ah a khuh le, lalnu Vasti mun a luahtir rawh. 18Churawhchun, lal nih Esther lawmhnâk ding hen a rianṭuantu tla leh ram zauhkhenhtu tla chu a sâwm na le, puai rokual tak a tuah. Lawmhnâk ni ram pumpi ah a phuang le, lal amah ruam hen thilthawt a ṭhen.
Mordekai Nih Lal Nungnâk A Hum
19Chu liau chun Mordekai chu zauhkhenhtu sinâk dîrmun a pêk. 20Esther khawm Juda mi a sinâk theih asi lo rih. Nunau ngâksiatê asi liauah amah zauhkhenhnâk tangah thu a ngâi mi hâwi hen Mordekai nih âu sin khawm simh lah na a ti mi chu a chîng thlir.
21Mordekai nih lal in ah rian a ṭuan liauah lal in ah mi mitilkhei lakah mi mi panih lal inkardang kawtkâ vêngtu, Bikthana leh Teres chu lal dotu an si le, thah an tum. 22Mordekai nih chu thu chu lalnu Esther rangah a simh; chu Mordekai nih a theih mi thu chu lalnu Esther nih lal rangah a simh rawh. 23Churawhchun, deihfiangnâk a um le, a dik ti a lang rawh chun an panih hen an thlâi na. Ram pumpi rianṭuan singsiahnâk bu ah chu thu chu rîn ding hen thu a pêk.
Bawm Common Language Bible © Bangladesh Bible Society, 2004. All rights reserved.