Room 10
10
1Yaabalaa, n na nyiŋŋuu werge maa lugɔ Kɔraawiizi lɛɛ Jus hina la, di ɔɔ ra suŋŋuu guŋ. 2Miŋwaa zummɔɔ lugɔ ba aah siwiire werge maa ani Kɔraawiizi hiŋaa, ka ba waa zum u hiŋaa himmaa la hiŋaa. 3Ba faa waa gunla Kɔraawiizi n niŋ ɛɛ gil nɛra wia deŋli u be zummɛ, ka ra nyiŋŋi bá himmaa dau gunla ban niŋ ɛɛ bá wia wer deŋli u be. Awiarɛ ba vɛɛ Kɔraawiizi hor la. 4Kristo tuŋ Gbɔg la wiarɛ, ka gil nɛra maa wia wer deŋli Kɔraawiizi be dikuu baŋ yarduu wia.
5Moosis faa ŋɔ banla n na nyiŋŋi ba hiŋ Gbɔg bá wia wer deŋli Kɔraawiizi be wiarɛ di ŋɔ, “Nɛr la n wette hiŋ Gbɔg la maa, waabuu, niŋ na miibɔɔ a hiŋaa biini.” 6Ka kenne banla n na nyiŋŋi ba yardi Kɔraawiizi, bá wia wer deŋli u be la ŋɔ, “Ií gilɛɛ waa pɛɛzi ii biine, ‘Anɛɛ n niŋ tinni zuu Kɔraawiizi bolei?’ guŋ zɛɛrɛ lugɔ ú kpogli Kristo tuu ii be.#Gbɔg 30:11-14 7Di gilɛɛ waa pɛɛzi, ‘Anɛɛ n niŋ tuu hɛrluŋei, ú vii lizi Kristo di kpau banɛi?’ ” 8Ií nuu gunla baŋ sɛbɛɛ, di ŋɔ, “Kɔraawiizi wiŋɔɔlii la waa bɔɔnɛɛ duwɛɛ. A dugli iabuu di du ii nuuzi ni ii bampiree biine.” Yarda la wia yaa n na ŋɔ ii be labuu ɛɛ Kɔraawiizi wiŋɔɔlii hiŋ. 9Di i ŋɔwɔɔ lugɔ “Yeesu ɛɛ i Dɔɔrii,” di kaa yardi Kɔraawiizi i bampirii biini lugɔ u lalluubuu siu biini, Kɔraawiizi daŋ lɛɛi, 10dikuubɛɛwiai, gunla nɛra n ɔɔ yardi Kɔraawiizi ba bampiree biini wiarɛ u ɔɔ gil ba wia deŋli u be. Ba nuuzi n bagli ba yarda la wiarɛ u ra lɛɛ baa. 11Kɔraawiizi Hɔŋ kaa ŋɔ, “Nɛr la maa n haŋ yarduu wàá bir di hiihzi,” 12dikuubɛɛwiai, Kɔraawiizi waa baŋhina a tɔgzi kaali baŋhina. Banla n ɛɛ Jus hina ni banla n waa Jus hina ɛɛwɛ maa ɛɛ kpannɛ u be. Ba maa Dɔɔri ɔɔ nuu banla maa n na yir u sɔnnɛ, di ra hiini ba maa werge maa. 13Dikuubɛɛwiai, Kɔraawiizi Hɔŋ ŋɔwɔɔrɛ, “Nɛr la maa n niŋ yir Kɔraawiizi sɔŋ, ú lɛɛu, u daŋ lɛɛu.”
14Ka di ba wɔɔ yardɛɛ, ɛrɛɛ bá ɛɛ di wer yir u sɔŋ ú lɛɛ baai? Di ba haa waa u wia nuuwɛ ge, ɛrɛɛ bá ɛɛ di wer yarduuwɛi? Di nɛr maa waa u wia ra bagli, ɛrɛɛ bá ɛɛ di wer nuu u wiai? 15Di Kɔraawiizi waa nɛra hummɛ, ɛrɛɛ á nɛra ɛɛ di wer bagli u wiai? Ií nuu gunla baŋ faa sɛbɛɛ Kɔraawiizi Hɔŋ biini. Ba ŋɔwɔɔrɛ, “Nɛra la n ɔɔ vol ra lizi amaniyesuma la balaa ɔɔ du wer ninɛɛ werge.”#Aiza 52:7
16Ka nɛra maa lɛi sɛɛwɛ tɛɛ amaniyesuma la. Kɔraawiizi dɔgtɛɛ Aizaaya faa sɛbɔɔrɛ di pɛɛzi, “N Dɔɔri, bɛl maa sɛɛ wiŋɔzi la yaa n nuuwɛ di bagli baa labuu naá?”#Aiza 53:1 17Yarda ɔɔ lii wiŋɔzi la yaa n nuuwɛ biinii. Wiŋɔzi la ge ɛɛ Kristo wia la. 18Ka ií gil n pɛɛzi ia wii bɛl. Ba waa nuuwɛ gɛɛ? Ba nuuwɔɔ. Ba faa sɛbi chiŋ kuna wiarɛ di ŋɔ,
“Durnya maanii chiŋ kuna loobee ra hel.
Nɛr maa waa hoo
hɛri naa biini,
a kuna n wɔɔ
ra bagli wia.”#Yira 19:4
19Ií gil n kaa pɛɛzi ia. Izrɛl hina waa zummɛ gɛɛ? Ba zummɔɔ. N daŋ feli bagli gunla Kɔraawiizi dɔgtɛɛ Moosis n faa sɛbɛɛ, dí, Kɔraawiizi ŋɔwɔɔrɛ,
“N daŋ gil ii bɔra a wii, dikuu banla n ɛɛ nɛdumazi wia,
di gil ii na baaŋ
dikuu nɛra n waa
wia zummɛ wia.”
20Kɔraawiizi dɔgtɛɛ Aizaaya la faa lɔ bampiriire, di sɛbi,
“Banla n faa waa n bɔr a nyiŋŋi,
baabuu wa naŋ.
Banla n faa waa n wia ra pɛɛzi,
baabuu n bagli
n wia tɛɛ.”#Aiza 65:1-2
21Ka uŋ wa ŋɔ Izrɛl hinawaa wia, u ŋɔwɔɔrɛ,
“N yaa n noneere chɔɔzi guŋŋ bɔr wa duani,
di ŋɔ bá ba n be,
ka ba waa sɛɛwɛ.
Ba ɛɛ dignikpega hinaa
di ra vɛɛ n wiŋɔzi.”
Currently Selected:
Room 10: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.
