Maak 1
1
Jɔɔn Kɔraawiizi Niisɔɔri wia
(Mat 3:1-12; Luuk 3:1-18; Jɔɔn 1:19-28)
1Amaniyesuma faaraarɛ keŋ. A ɛɛ Kɔraawiizi Biibaal Yeesu Kristo wiarɛ.
2Kɔraawiizi faa gillɔɔ u dɔgtɛɛ la banna yir Aizaaya la sɛbi u wia u Hɔŋ biini di ŋɔ,
“A nuu!
N daŋ hum n huŋhunni bɛl
ú tɔ i see
di gaa ɛɛ sirya
i ra ba.”#Mala 3:1
3Ba daŋ nuu nɛbɛl
n na sii hɛribɔduma biini,
di ra ŋɔ,
“Yaa Dɔɔri ra bau.
Ií ra ɛɛ sirya ú ra ba.
Ií ra ɛɛ wia á ra deŋli
ni a ŋmɛnizi.”#Aiza 40:3
4Denii baal bɛl izi ba hɛribɔduma. U sɔnnɛ faa Jɔɔn, ba kaa ra yiruu Kɔraawiizi Niisɔɔri. U ɔɔ ra sii, di ra ŋɔ, “Ií maa gil ii biine chɔgi dikuu ii wichɔgaa wia, di gil a maa ta, ka Kɔ́raawiizi gil di tɛɛ ia, ka ń ge sɔ ia Kɔraawiizi nii.” 5Juda hɛri hina ni Jɛrusalɛm hina maa lii la u be di ga sɛɛ chɔgri dikuu ba wichɔgaa wia. U sɔ baa Kɔraawiizi nii Jɔɔdan muu biini. 6Jɔɔn ɔɔ faa tɔ wɛjɛ bɛllɛ baŋ kpa nyugma huna suah, di kpa kurhɔŋ kirsi, di ra di huuhni ni huuhnuu. 7U ɔɔ ra sii, di ra ŋɔ, “Nɛbɛl du har di ra ba. Waabuu ɛɛ nabɔma n ni werge maa. Maa dɛg min niŋ lizi u gawa gba tɛu. 8Miŋwaa n kpa nii ra sɔ ia naa, ka unla n tɔ har di ra ba la, Kɔraawiizi Dumnanii ni ninne waabuu wa kpa du ii ni.”
Yeesu niisɔi ni u zɛɛ dai na wia
(Mat 3:1—4:11; Luuk 3:21-22; 4:1-13)
9A saŋa, Yeesu lii Nazarɛf n du Galilii hɛri, di ba Jɔɔn be Jɔɔdan muu la, u sɔ u ge Kɔraawiizi nii. 10Yeesu n wa lii nii la biini, u binni chiŋ di na baama n yaawɛ. Kɔraawiizi Dumnanii ga de tuu wa togni u nyuu lugɔ komma.#Aiza 11:2-3 11U nuu loobii bɛl n lii chiŋ di ŋɔ, “Hinuu n biinɔŋŋii. I wia parimbuu werge.”
12Denii Kɔraawiizi Dumnanii gil Yeesu zuu hɛribɔduma. 13Un zuu de la, u la bɔr la sela ni kunchɔgaa n ɔɔ du la, di ga du de hɔpizaa tokkoanɛɛ. Sitaani ba u be de di wa ɛɛu na, ú vii ɛɛ wichɔgaa. Mɛlikazi ge gba ba u be di wa hiinuu.
Yeesu lugli hiŋra yiraa wia
(Mat 4:12-22; Luuk 4:14-15; 5:1-11)
14A hɔl bɛl, ba lau Jɔɔn tɔ dia. Ban lawuu la, Yeesu ge izi ba a Galilii hɛri di ge waa sii amaniyesuma la di ra tɛɛ nɛra, 15di ra ŋɔ, “A saŋa helloo. Kɔraawiizi Kora dii jaa dugluu. Awia, ií gil ii biine chɔgi dikuu ii wichɔgaa wia, ka yardi amaniyesuma naa.”
16Denii u ga Galilii muuzeŋ la kɛrii di ra kaali di ga na nyinlaura banɛɛ n na ta asauzi muuzeŋ la biini. Bɛl sɔnnɛ faa Saimɔn. Bɛl ge sɔnnɛ Andru, u faa ɛɛ Saimɔn niweere. 17Yeesu ŋɔ ba be, “Ií izi di ra hiŋiŋ. Ii faa ra kuuh nyinni kuuhnii. N daŋ jaa gil ii ra kuuh newea kuuhni.” 18Ba gil ba asauzi ka izi manaŋ di ra hiŋuu.
19U kaa kpa ra lii see tama, di nɛra baŋhina sogo muugbera biini di ra lonzi ba asauzi. Zɛbɛdi biibaala Jems ni u niwee Jɔɔn faa du ba biinii. 20Yeesu yir baa dí ba ba. Ba gil ba mɛɛ ni u balaa muugbera la biini, ka izi di ra hiŋuu.
Yeesu n duŋŋi tinnanchɔgii wia
(Luuk 4:31-37)
21Ba maa kpa wa hel bol bɛl banna yir Kapɛniɔm. Ba Heezaa Hɔpizii n wa helle, Yeesu zuu ba jaamaa dia, di bagli Kɔraawiizi wia ra tɛɛ nɛra. 22Banla n du de ra nuu u wiŋɔzi la, a tir baa. U baglaa la biinii ba chi zum lugɔ u dɔŋ lɛi Kɔraawiizi Hɔnzunna la, dikuubɛɛwiai, ɔɔ ra baglaabuu lugɔ u himmaa n dɔɔ a fɔŋŋa.
23Baal bɛl faa du ba jaamaa dia la biini. Tinnanchɔgii hinnɛ faa. U izi di ra pogzi, 24di ra ŋɔ, “Nazarɛf hinuu Yeesu! Bɛɛ i ra nyiŋŋi yaa benei? I ballɔɔ í wa chɔgi yaa gɛɛ? N zumiibuu. Hinuu Kɔraawiizi Biinaniinanii la!”
25Yeesu ŋɔ tinnanchɔgii la be, “Gil kɔɔi ka wa lii a baal ni!” 26Tinnanchɔgii la izi a baal, di kpau ha, di pogzi werge ka lii.
27A tir ba maa. Ba maa ra pɛɛzi dɔŋa, “Beedee widizii kennei? Wifalaarɛ! Ii waa na gunla u wiŋɔzi la n dɔɔ fɔŋŋa, u ŋɔ tinnanchɔgaa be dí a wa lii a wa liiyaa?” 28Tama, di Galilii hɛri hina la maa n dugli de nuu u wia.
Yeesu n chaa nɛkpila wia
(Mat 8:14-17; Luuk 4:38-41)
29Yeesu izi di lii a jaamaa dia di ra la, u ni Jems ni Jɔɔn, di ga zuu Saimɔn ni Andru dia, 30di Saimɔn hilahaaŋ du de di ra wii. U bɔra maa faa wenzi, u chɔɔ dia. Baŋ wa ŋɔ u wia Yeesu be, 31u zuu u be di lau u nonii di tɛruu. Uŋ haŋ wa ɛɛ guŋ, wiila la lii haaŋ la ni. U izi di ra hum baa.
32Wiizi n wa zuuwɛ a duana hiŋ, a bol hina paa ba wiila hina maa ni tinnanchɔgaa hina maa ba Yeesu be. 33Bol la hina maa chaali u dominua maa. 34U chaa wiila hina kpilakpila de, ba wiilchɔgaa maa lii ba ni, di kaa duŋŋi tinnanchɔgaa ge nɛkpila ni. Tinnanchɔgaa la maa zumuubuu. Awia, Yeesu waa sɛɛwɛ á ŋɔ wia di bagli nɛr la dee uŋ ɛɛwɛ.
Yeesu n ŋɔ Kɔraawiizi wia Galilii biini wia
(Luuk 4:42-44)
35Hɔɔŋ waa pizi, bɔr ra ɛɛ kɔlɔkɔlɔ, Yeesu feli izi nyiŋŋi bɔduma bɛl di gaa suŋŋi wiizi de, u bɛŋ. 36Denii Saimɔnwaa izi di ra nyiŋŋuu. 37Baŋ wa nau, ba ŋɔ u be, “Nɛra maanii ra pɛɛzi i wia.”
38Yeesu ŋɔ ba be, “Ya izi ɛŋ di ra la bola la n kawɛɛ la, ń ga ŋɔ Kɔraawiizi wia tɛɛ ba ge, bá nuu. Awiarɛ n ba.” 39Ba izi di ra vol Galilii hɛri la maa, u ra ŋɔ Kɔraawiizi wia ba jaamaa diini la biine, di ra duŋŋi tinnanchɔgaa nɛra ni.
Yeesu n chaa baal bɛl wia
(Mat 8:1-4; Luuk 5:12-16)
40Denii bɔchɔgaa hiŋ bɛl izi ba Yeesu be, di wa giŋŋi u see fɔrguu, di ŋɔ, “N Dɔɔri, di a parii, i daŋ wer chaa n bɔchɔgaa naa.”
41U wia dɔɔ sinyɛna Yeesu be. U tɛr u nonii gbɔgzuu, ka ŋɔ, “A parimbuu. N chaaibuu la!” 42Uŋ haŋ wa ŋɔ guŋ tuŋ, di a bɔchɔgaa tuŋ u ni kakpaŋ, u nyaagi.
43Denii Yeesu ŋɔ dí u ra la dia, ka karfuu werge maa, di ŋɔ, 44“A dazi í waa ŋɔ wiimaa ra tɛɛ nɛr maa, ka la Kɔraawiizi kizeehiŋ be ú ga nai. Di u wa nai, gil u lizi mbusu tɛi gunla Moosis n faa bagli ia ŋɔ ií ra ɛɛ la, nɛ́ra zum lugɔ i jaa nyaaguu.”#Levi 14:2-32
45A bɔchɔgaa hiŋ lii, ka waa gunla Yeesu n ŋɔwɛɛ la hiŋŋɛ, ka kpa ra ŋɔ nɛr maa be gunla Yeesu n ɛɛwɛ tɛu. Uŋ ɛɛ gunla wia, Yeesu waa wette u kaa zuu bol maa di waa suahzɛɛ lɛi. U jaa du bol nuuzi, ka nɛra lii yemmaa di ra ba u be.
Currently Selected:
Maak 1: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.