Maak 2
2
Yeesu n chaa gbɛrii wia
(Mat 9:1-8; Luuk 5:17-26)
1Yeesu di hɔpizaa anɛɛ de, ka bir la Kapɛniɔm. A bol hina nuu lugɔ u du dia. 2Nɛkpila chaali ba wa su de werge, di tɔ dominua maa gba. Yeesu ŋɔ Kɔraawiizi wia ra tɛɛ baa.
3Unna ŋɔ Kɔraawiizi wia la, di nɛra baŋhina ge ballɔ di chi ba wiila hiŋ. U nonee ni u naazi maa siuzɔɔrɛ. Baala banaazuu chigɛu, di ra nyiŋŋi ba zuu Yeesu be. 4Ka nɛkpila su de werge. Ba zuu de huhzi, ka tinni sal di lau u yembɛl wil, bɔr chaani ha Yeesu ni. Denii ba kpa baal la ni u kunchɔɔrikuna ga de di choŋŋi dia la biini.
5Yeesu n wa na guŋ, u zum lugɔ ba yarduubuu. Awiarɛ ba ɛɛ guŋ. U ŋɔ wiila hiŋ la be, “N biibaal, Kɔraawiizi gil i wichɔgaarɛ tɛi.”#Yira 103:3
6Kɔraawiizi Hɔnzunna la baŋhina ge faa sogo denii. Baŋ wa nuu gunla Yeesu n ŋɔwɛɛ la, ba ra fɛ nfɛrɛ ba bampiree biine, 7“Baal naa, bɛɛ wiŋɔzii u ra ŋɔ kennei? Anɛɛ n niŋ wer gil nɛra wichɔgaa tɛɛ baa di Kɔraawiizi bɛŋ lɛiyɛi? Kennaa unna ŋɔ naa, Kɔraawiizii u ra gbɛlli la.”
8Banna fɛ gunla, Yeesu teŋ zum u biini gunla banna fɛ, di pɛɛzi baa, “Ɛrɛɛ ii ra aani n wiŋɔzi naa ii bampiree biine kennei? 9Baal naa naazi ni u nonee maa n siuzɛɛ naa, di n ŋɔ u be lugɔ Kɔraawiizi gil u wichɔgaa maanii tɛu, ani miŋ ŋɔ u be lugɔ ú izi kpa u kunchɔɔrikuna di ra vol, u bɛliirɛ n kpollenei? 10Ama, n na nyiŋŋuu ii zum lugɔ Mìŋ́ Newee Biibaal dɔɔ fɔŋŋaa durnya naa biini, ń wer gil nɛra wichɔgaa tɛɛ baa.” Awia, u jaa ŋɔ wiila hiŋ la be, 11“I benii n na ŋɔ la. Izi kpa i kunchɔɔrikuna ra la dia.” 12U izi di kpa u kunchɔɔrikuna lii. Ba maa ra binnuu. A tir baa werge. Ba ra tɛɛ Kɔraawiizi sɔŋ, di ra ŋɔ, “Yaa haa waa keŋ nawɛɛ maa, di zinaa lɛi!”
Yeesu n yir Levi wia
(Mat 9:9-13; Luuk 5:27-32)
13Yeesu bir izi di lii de di la muuzeŋ la nua. Nɛkpila kaa chaali di wa baruu. U ra bagli baa Kɔraawiizi wia. 14Uŋ wa bagli baa tuŋ, u kaa izi ra la, di baal bɛl sogo lampolɛɛri bɔr, di ra lɛɛ lampoo. Alfiɔs biibaal Levii. Yeesu ŋɔ u be, “Izi ra hiŋiŋ.” U gil u huma la ka izi di ra hiŋ Yeesu.
15Yeesu ni u hiŋra zuu a Levi dia, di so di ra di. Lampolɛɛra ni wichɔgɛɛra kpila maanii ɔɔ hiŋ Yeesu. Ba maa so ra di. 16Kɔraawiizi Hɔnzunna baŋhina banna yir Farisizi na baa, ba maa n kpauwɛ ra di. Ba pɛɛzi Yeesu hiŋra, “Ɛrɛɛ Yeesu, lampolɛɛra ani wichɔgɛɛra kpau ra dei?”
17Yeesu nuu gunla bam pɛɛzɛɛ la, di ŋɔ ba be, “Nɛra la n dɔɔ alaanfia, baa lɛi ra nyiŋŋi nɛchaari bɔr. Ka banla n na wii la, baabuu ɔɔ ra nyiŋŋi u bɔr. Nɛnanaa lɛi n ba ń wa nyiŋŋi. Wichɔgɛɛraa n ba ń wa nyiŋŋi.”#1Tim 1:15
Baŋ pɛɛzi Yeesu nuuvɔɔi wia
(Mat 9:14-17; Luuk 5:33-39)
18Jɔɔn Kɔraawiizi Niisɔɔri hiŋra ni Farisizi hiŋra ɔɔ ra vɔɔ nuarɛ. Denii nɛra ba wa pɛɛzi Yeesu, “Ɛrɛɛ Jɔɔn hiŋra ni Farisizi hiŋra naa ra vɔɔ nua, ka hiŋwaa hiŋra waa nua ra vɔɔi?”
19Yeesu bir pɛɛzi baa, “Di baal kpa haŋfalii, u dammuzi daŋ sɛɛ vɔɔ nuaa? Akai! Di u haŋ du ba be, ba wàá sɛɛ vɔɔ nua. 20Ka a hɔl la ban niŋ lau haŋfalii jaari la kaali ka ka baa la, a hɔllɛ bá vɔɔ nua.”
21U kaa ŋɔ, “Ba wàá wer kpa yakɔzfalii la baŋ haa waa chakkɛ u zugzi, di nyɛr tɔ wɛjɛbinii bɔɔ ú wer birgi. Di ba ɛɛ guŋ, a yakɔzfalii daŋ zugzi di lau wɛjɛbinii la kaa piili jaa, u nyaŋŋi. 22Ba wàá wer kpa siŋfalii du simbinii hur biini ú wer birgi. Di ba ɛɛ guŋ ka siŋ la waa bii, hur la daŋ pozi, a siŋ maa ta, a hur ge chɔgi. Siŋfaliirɛ dɔɔ hurfalii.”
Baŋ pɛɛzi Yeesu Heezaa Hɔpizii wia
(Mat 12:1-8; Luuk 6:1-5)
23Ba Heezaa Hɔpizii bɛl Yeesu ni u hiŋra ga mia biini di ra la. Banna la la, u hiŋra jaa ra kuugi mia la aŋhina nyuuni ra hee.#Gbɔg 23:25 24Farisizi baŋhina ŋɔ Yeesu be, “Na! Ɛrɛɛ i hiŋra ra chɔgi yaa Heezaa Hɔpizii gbɔg gunnɛi?”
25Yeesu bir pɛɛzi baa, “Amɔ, ii haa waa Deevid wia karmɛɛ Kɔraawiizi Hɔŋ biiniaa? Lɔzi faa ra kpu u hiŋraa.#1Sam 21:6 26U faa zuu Kɔraawiizi Dia kpa paanuuzi la baŋ ɔɔ chiŋŋi Kɔraawiizi nɛr maa ra kiia, di Kɔraawiizi kizeehina bɛŋ lɛi la di hee, ka kpa aŋhina tɛɛ banla n du u be la ge, ba gba hee. Abiata genii faa ɛɛ Kɔraawiizi Kizeehina Maa Nabɔma a saŋa.” 27Uŋ wa ŋɔ guŋ, u kaa ŋɔ ba be, “Kɔraawiizi waa felee lizi Heezaa Hɔpizii la mɔɔ, ka haa ma newea, di ŋɔ ba heezaa hɔpiziirɛ keŋ bá ra heezi. Newea hiinaa wiarɛ u dau a Heezaa Hɔpizii, Heezaa Hɔpizii wia lɛi u ta newea.#Lii 23:12 28Awia, Mìŋ́ Newee Biibaallɛ dɔɔ a Heezaa Hɔpizii gba.”
Currently Selected:
Maak 2: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.