Matiu 7
7
Dɔŋa seriya dii wia
(Luuk 6:37-38, 41-42)
1Yeesu kaa ŋɔ, “Ií gilɛɛ waa tɛɛ ii dɔŋahina chɔgri, Kɔ́raawiizi ge gilɛɛ waa tɛɛ ia chɔgri. 2Gunla sisɔna gɛɛ sikpegii iin niŋ tɛɛ ii dɔŋahina la, gunnɛ Kɔraawiizi wa tɛɛ ii ge. Gunla maga iin niŋ ɛɛ tɛɛ ii dɔŋahina, guŋ magaa bá ge bir ɛɛ tɛɛ ia.
3Daazeŋ himmaa n du i siwii biini, a guŋ wɛɛ titte, ka i ra ŋɔ daapussi la n du i dɔŋhiŋ siwii biini wiaa? 4Hiŋ ɔɔ ra tɛɛ i dɔŋhiŋ chɔgri la, a ɛɛwɔɔ lugɔ i ŋɔ u benii, ‘Gil n lizi daapussi i siwii,’ ka daazeŋ du i hor. Nau! 5Nɛfugzii hiŋ! Lizi daazeŋ la n du i hor la mɔɔ ka jaa wer na nɛnnɛ di wer lizi daapussi la n du i dɔŋhiŋ siwii la.
6Ií gilɛɛ ŋɔ Kɔraawiizi wia ra tɛɛ banla n na gbɛllaa la, dikuubɛɛwiai, di ii kpa kuna la n wesse ra tɛɛ nuuzihina ni perekuzi, a daŋ fɛrgaa pinti ka bir lauri ia jaa.
Suŋŋaa, nyiŋŋaa ani gaafura ɛɛi wia
(Luuk 11:9-13)
7Di ii suŋŋi Kɔraawiizi kuŋ, u daŋ tɛɛ ia. Ii ra nyiŋŋi kuŋ u be, ii daŋ nau. Di ii ɛɛ gaafura, u daŋ tɛɛ ia ŋmɛnɛɛ, ii zuu u be.#Jɛrɛ 29:13 8Nɛr la n suŋŋi kuŋ, a hiŋ ɔɔ naubuu. Nɛr la maa n nyiŋŋee ge ra na. Nɛr la n ɛɛ gaafura ge na bɔttɛ ra zuu.
9U bɛɛ biere niŋ ŋɔ ú tɛu paanuu, u kpa bii tɛuwɛi? 10Di u kaa suŋŋi nyiŋ ge, u daŋ sɛɛ kpa hɛrikuŋ tɛuwaa? Akai! 11Too. Iiŋ ɛɛ nɛchɔgaa ka ɔɔ wer ra tɛɛ ii biizi kunnanaa naa, amɔ, ii Mɛɛ Kɔraawiizi wàá kpa kunnanaa tɛɛ banla n suŋŋuu laa?#Yira 84:11 12Awia, gunla maa iinna nyiŋŋi nɛra ra ɛɛ ia, ií ge ra ɛɛ baa guŋ. Moosis Gbɔgni ni Kɔraawiizi dɔgtɛɛzi hɔna baglaa maanii la.#Mat 22:40
Ŋmɛnibee ni ŋmɛnizeŋ wia
(Luuk 13:24)
13Ŋmɛnizi anɛɛrɛ du de. Bɛl waa war, ka u tuna dɔɔ miibɔɔ. Ii ga waabuu nua di ra hiŋuu, dikuubɛɛwiai, nɛɛhiŋ la nua wassɔɔ, di kaa du yampalaŋ, ka u tuna dɔɔ chɔgaa. Nɛkpila ga nɛɛhiŋ la nuarɛ di ra hiŋuu, 14dikuubɛɛwiai, unla n na la miibɔɔ bɔr la waa war, u nua ge gba waa war. Nɛtama bɛnnɛ nau di ra hiŋ.
Daa ni u nɔna wia
(Luuk 6:43-44)
15Ií ra du tau dikuu nɛra baŋhina n na dar nɛra di ra ŋɔ ba ɛɛ Kɔraawiizi dɔgtɛɛzii wia. Ba daŋ ba ii be lugɔ peeza ka ba ɛɛ munuzii.#Jɛrɛ 14:14; 1Jɔɔ 4:1-3 16Ba wiɛɛlaarɛ ií kpa zum baa. Ba waa grepu nɔna ra na sɔɔhri daazi ni di ra tɔrgi. Ba waa kaa ra na pirii nɔna choŋgolli ni ra tɔrgi. 17Daananaa ra nɔŋ nɔnnanaarɛ, daachɔgaa ge ra nɔŋ nɔnchɔgaa. 18Daananaa wàá wer nɔŋ nɔnchɔgaa. Daachɔgaa ge wàá wer nɔŋ nɔnnanaa. 19Daa la maa n waa nɔnnanaa a nɔŋ, ba daŋ teeu ha di kpau ga ta niŋ biini u fuuh. 20Awia, nɛra wiɛɛlaarɛ ií wer kpa zum gunla baŋ duwɛɛ.
21Banla n na yiriŋ, ‘N Dɔɔri, n Dɔɔri,’ ba maa lɛi niŋ zuu Kɔraawiizi Kora biini, ka banla n na ɛɛ n mɛɛ kipar la, baabuu niŋ zuu Kɔraawiizi Kora biini.#Luuk 6:46 #Luuk 13:25-27 #Jems 1:22 22Seriya dii hɔpizii la nɛkpila daŋ pɛɛziŋ, ‘Yaa Dɔɔri, yaa Dɔɔri, yaa waa Kɔraawiizi wia ŋɔwɛɛ i sɔŋ biiniaa? Yaa waa tinnanchɔgaa duŋŋɛɛ i sɔŋ biiniaa? Yaa faa kpa i sɔnnɛ di ɛɛ wizenaa kpilakpila!’ 23Ka n daŋ ŋɔ ba be, ‘Maa ia zummɛ. Ií lii n be. Wichɔgɛɛraa ia!’
Maara banɛɛ wia
(Luuk 6:47-49)
24Nɛr la maa n niŋ nuu n wiŋɔzi naa, di ra hiŋaa, u ɛɛwɔɔ lugɔ baal bɛl n dɔɔ nfɛrɛ di ma u dia bii nyuu. 25Dooŋ ba di wa lɔɔzi dia la, nii su di pal ba waa yaguu. Peu ge kaa ta u ni. Ka um mau hɔŋ bii nyuu la wia, waa wette u chol. 26Nɛr la maa ge n niŋ nuu n wiŋɔzi naa ka wàá ra hiŋ, u ge ɛɛwɔɔ lugɔ baal bɛl n waa nfɛrɛ dɔɔwɛ di ma u dia hɛɛhriichaa ni. 27Denii dooŋ ba di waa lɔɔzi dia la, nii su di pal ba di waa yaguu, peu ge ra ta u ni. A dia mɔɔri chol birim!”
Yeesu fɔŋŋa dɔɔi wia
28Yeesu n wa ŋɔ annii maa wa tuŋ, a tir nɛra werge maa, gunla um bagli baa la. 29U faa waa bagli gunla Kɔraawiizi Hɔnzunna n faa ra bagli la, ka ra bagli baa lugɔ u himmaa n dɔɔ a wia fɔŋŋa.
Currently Selected:
Matiu 7: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.