Matiu 6
6
Nyaara hiinaa wia
1Yeesu kaa ŋɔ, “Ií ra dazi winanaa ɛɛi nɛra baaŋ, dikuu iinna nyiŋŋi ba na ii winanaa hiŋ wia. Di ii ra ɛɛ guŋ, ii wàá na a kinturgaa ii Mɛɛ Kɔraawiizi be.
2Awia, di ii ra nyiŋŋi ii hiini nyaara, ií gilɛɛ nyiŋŋi nɛr ú tɔ ii see di lɔ daworo. Nɛfugze la ra ɛɛ gunnɛ jaamaa diini biine ni ŋmɛnikɛraa, nɛra na di chɔli baa. Ií gil n ŋɔ ii be, ‘Ba na ba kinturgaa maanii nɛra la be.’ 3Ka iawaa, di ii ŋɔ ií hiini nyaara, ií suahzi di hiini baa lugɔ ii nodige n niŋ ɛɛ wii ka ii nomɛɛla waa zum gunla ii nodige n ɛɛwɛ la. 4Ií gilɛɛ ra ɛɛ ii winanaa bɔchaaŋ, ka ií ɔɔ suahzi ra ɛɛa. Denii ii Mɛɛ Kɔraawiizi la n ɔɔ ra na wia la nɛra n suahzɛɛ ra ɛɛ la wa turgi ia a kim.
Wiisuŋŋaa wia
(Luuk 11:2-4)
5Di ii ŋɔ ii suŋŋi wiizi, ií gilɛɛ ra ɛɛ alugɔ nɛfugze la n na ɛɛ la. Baabuu ɔɔ ra nyiŋŋuu ba chi ba jaamaa diini biine ni ŋmɛnikɛraa di ra jaami Kɔraawiizi, nɛ́ra wer na baa banna jaami. Ií gil n ŋɔ wibii maa tɛɛ ia, ba na ba kinturgaa maanii nɛra la be.#Mat 23:2-5 6Ka iawaa, di ii ŋɔ ií suŋŋi ii Mɛɛ Kɔraawiizi, ií ga zuu ii diisezi di lawaa tɔɔgi, ka jaa ra jaamuu. U du bɔsuahlii maanii di ra na wia la maa nɛra n suahzɛɛ ra ɛɛ la. Waabuu niŋ wa turgi ia a kim. 7Di ii waa suŋŋi wiizi, ií gilɛɛ kpogli wikpaŋ di ra dammi. Banla n waa Kɔraawiizi zummɛ labuu ɔɔ ra ɛɛ guŋ, di ra binni lugɔ banna ŋɔ wia werge la wia, ba dɔɔra daŋ nuu tɛɛ baa. 8Ií gilɛɛ ra hiŋ ba hor la, dikuubɛɛwiai, ii mɛɛ teŋ zum kunla maa iiŋ waa dɔɔwɛɛ mɔɔ ka ii haa wa suŋŋuu la.
9Awia, kenne ií ɔɔ suŋŋi wiizi,
‘Yaa Mɛɛ Kɔraawiizi,
yaa ra nyiŋŋi i sɔŋ dɔɔ girme,
10di ra nyiŋŋi i Kora ba ɛŋ,
nɛ́ra ra ɛɛ i kipar durnya biini
gunla banna ɛɛu i be la.#Luuk 22:42
11Tɛɛ yaa diwee ya di zinaa#Sɛɛ 30:8
12di gil yaa wichɔgaa tɛɛ yaa, gunla
yaa ge n ɔɔ ra gil yaa dɔŋahina wichɔgaa
ra tɛɛ baa la.
13Hiini yaa wifittii gilɛɛ ɛɛ yaa ya chol.
Lɛɛ yaa Sitaani be.’
14Di ii wetto gil nɛra wichɔgaa tɛɛ baa, ii Mɛɛ Kɔraawiizi daŋ gil ii ge hora tɛɛ ia.#Kɔlɔ 3:13 15Ka di ii waa nɛra wichɔgaa gillɛ tɛɛ baa, ii mɛɛ gba wàá gil ii hora tɛɛ ia.
Nuuvɔɔi wia
16Di ii wa vɔɔ nuuzi, ií gilɛɛ nyɛm alugɔ nɛfugze la n ɔɔ ra nyɛm la. Baabuu ɔɔ nyɛmuu, nɛra wer zum lugɔ ba ra vɔɔ nuuzii. Ií gil n ŋɔ wibii maa tɛɛ ia. Ba na ba kinturgaa maanii tuŋ nɛra la be.
17Ka iawaa, di ii wa vɔɔ nuuzi, ii sanzi ii siwee di kuari ii nyuuni, 18nɛ́r maa gilɛɛ wa na ia di zum lugɔ ii vɔɔ nuuzii, ka ii Mɛɛ Kɔraawiizi la n du bɔsuahlii maa la bɛŋ zum a wia. U ra na wia la baŋ suahzɛɛ ra ɛɛ labuu. Waabuu niŋ turgi ia a kim.
Kɔraawiizi bol daama wia
(Luuk 12:33-34)
19Ií gilɛɛ chaali daama di ra dau durnya naa biini, dikuubɛɛwiai, kunjigzi daŋ mugzaa, aŋhina ge nyɛɛsi, ŋmɛɛna ge purgi ii diini di zuu ŋmɛɛ aŋhina. 20Ií chaali daama di ra dau Kɔraawiizi bol, dikuubɛɛwiai, kunjigzi maa waa hoo de an niŋ chɔgaa. Kuna waa nyɛɛsaa dɔɔwɛ de, ŋmɛɛna ge waa wette zuu de di ra ŋmɛɛ. 21Bɔr la ii daama n duwɛɛ, denii ii bampiree ge du.”
Bɔchaaŋ ni bɔrahɔŋ wia
(Luuk 11:34-36)
22“Siwee ɛɛ bɔrahɔŋ fintinaa di ɔɔ gil u ra na bɔchaaŋ. Di ii siwee wesso, bɔr maa daŋ chaani ii be. 23Ka di ii siwee waa wer, ii biine maa daŋ biri. Di ii biine maa ɛɛ bɔbiri, bɔbiri himmaanii ii du.”
Kɔraawiizi ni kundɔɔlaa wia
(Luuk 16:13; 12:22-31)
24“Nɛr maa wàá wer hum dɔɔra banɛɛ. Di u ŋɔ ú ɛɛ guŋ, u daŋ hah bɛl ka nɔŋŋi bɛl, di ra tɔgzi bɛl ka ra gbɛlli bɛl. Ii wàá wer ra hum Kɔraawiizi ka kaa gil kebee ge dɔɔ ia ii ra hum a ge.”#Jems 4:4
Ií gilɛɛ ra fɔŋ
25“Awia, n na ŋɔ ii benii, ‘Ií gilɛɛ gil ii miibɔɔni wia zuu ii nyuuni, ii ra fɔŋ bɔr la iin niŋ na diwee di, di na nii nyɔɔ, di na laala laali.’ Diwee bɛŋ be lɛi miibɔɔ ra lii, laala ge bɛŋ lɛi ra kuari bɔra. Ii waa guŋ zummɛa?#Fili 4:6
26Ií binni zumbizi la n na zaah chiŋ la di na. A waa kuna a duu, a waa kaa ra kumaa ge, a waa buugazi dɔɔwɛ á chaali a diwee di ra du. Ka ii Mɛɛ Kɔraawiizii ɔɔ ra tɛɛa diwee a ra di. Mhmm. Ii waa kumpazi ɛɛwɛ u be di kaali a zumbizia? 27Di ii miibɔɔni wia aah ii siwee gunla maa, ka ii wàá ka wer gil á du jaŋ di jaa tama maa, di kaa birgi jaa.
28Ɛrɛɛ ii laala wia jaa ra tir ia gunnɛi? Ií ra binni fiiri la n du lɛla di na gunla anna ɛɛ di wer ra hel. A waa hum, a waa kaa ra ta gonni ge. 29Ka ií gil n ŋɔ ii be, haali Koori Solomɔn la n faa ra bɔg u hiŋ di dɔɔ girme werge maa la, ka u laalaa wessi faa waa annii Kɔraawiizi n kpawɛɛ bɔg kuna naa bɛl maa duglɛɛ.#1Koo 10:4-7 30Di Kɔraawiizi bɔg kooree naa n du lɛl naa, ka kɛrɛ bá ŋmɛnnaa fuuh naa, amɔ, wàá aah siwii dikuu ii wia werge di kaali guŋ, ií na kuna di laalia? Yarda nyaara! 31Awia, ií gilɛɛ ra fɔŋ di ra ŋɔ, ‘Lee ya na diwee dei?’ ‘Lee ya na nii ge nyɔɔi?’ ‘Lee ya na wɛjɛzi ge tɔi?’ 32Kuna naabuu banla n waa Kɔraawiizi zummɛ ɔɔ aah siwii di ra nyiŋŋi la. Ka iawaa Mɛɛ Kɔraawiizi teŋ zum kuna la maa iiŋ waa dɔɔwɛ wiarɛ. 33Ka iáwaa gil Kɔraawiizi Kora ni u wideŋlaa wia tɔ see, ií aah siwii dikuu a wia, ka ií jaa na kuna naa maa jaa. 34Awia, ií gilɛɛ gil kɛrɛ wia zuu ii nyuuni ii ra fɔŋ. Hɔpizii maa ni u wifɔŋlaarɛ. Awia, ií gilɛɛ kpa kɛrɛ wichɔgaa di jaa zinaa hora ni.”
Currently Selected:
Matiu 6: vag
Highlight
Share
Copy
Want to have your highlights saved across all your devices? Sign up or sign in
© 2017, Copyright Ghana Institute of Linguistics, Literacy and Bible Translation in co-operation with Wycliffe Bible Translators, Inc.