Luglaa 38

Juda ni Taama wia

1A guŋ saŋa hiŋ, Juda lii u lulla hiŋ be di la ga so baal bɛl banna yir Hira be, bol bɛl banna yir Adulam. 2Denii u huuzi Keenan hina biihaaŋ n faa ɛɛ Sua biihaaŋ, di kpau. 3Sua kpogli hia di lul biibaal, Juda dau u sɔŋ Ɛr. 4U haaŋ hiŋ kaa kpogli hia di lul biibaal, u dau u ge sɔŋ Ɔnan. 5U kaa lul horohiŋ, u dau u ge sɔŋ Sɛla. A Sɛla lulaa saŋa, di ba jaa du bol la banna yir Kɛzib.

6Denii u nyiŋŋi haaŋ bɛl banna yir Taama, di tɛɛ u biinabɔma Ɛr, u kpa. 7Ka Ɛr faa ɛɛ biinikpola hiŋ werge maa Kɔraawiizi be. U kuu guŋ wia di kpuu.

8Denii Juda faa ŋɔ Ɛr niwee Ɔnan be, “Gil i ni i kpɛɛma haaŋ Taama chɔɔ, í ɛɛ gunla u jaari n dɛkkɛ u ɛɛ tɛu.” 9Ka Ɔnan faa zum lugɔ a biizi wàá ɛɛ u hora. Awia, di u ni Taama faa haŋ wa chɔɔ maa, waa ɔɔ sɛɛ u banni zuu u ni, dikuubɛɛwiai, waa nyiŋŋi Taama wa kpogli hia di lul biizi, bá ɛɛ u kpɛɛma hiŋ hora.

10Kɔraawiizi faa na lugɔ Ɔnan ɛɛ biinikpola hinnɛ werge maa. U kaa kpu u ge. 11Ɔnan n wa siuwɛ, Juda ŋɔ u naahaaŋ Taama be, “Filaŋkeŋ, kpogli i luhanni di ga du i mɛɛ dia guŋŋ n biibaal Sɛla wa hel haaŋ kpai.” U faa ŋɔ gunnɛ, dikuubɛɛwiai, u faa ra ɔmuu lugɔ Sɛla ge gba daŋ siu alugɔ u kpɛɛnna la. Denii Taama bir la u mɛɛ dia di ga du de.

12Aŋ wa birgee tama, Juda haaŋ Sua la siu. Uŋ wa wii u lee tuŋ, Juda ni u dammu Adulam hinuu Hira la Timna, bɔr la banna fuŋ u peeza huna la. 13Denii nɛbɛl ga ŋɔ tɛɛ Taama lugɔ u jaari mɛɛ ra la Timnaa, ú ga fuŋ u peeza huna. 14Taama na lugɔ Sɛla helloo tuŋ, ka Juda waa u wia ra ŋɔ lugɔ ú kpau. Denii u wir u luhanni laala, ka kpa saata bɛl tɔ lugɔ bá gilɛɛ zumuu, ka jaa lii di ga so Ɛnam n du Timna ŋmɛnɛɛ dominua.

15Denii Juda wa nau, ka fɛ lugɔ sensɛnni bɛllɛ, dikuu uŋ kpa saata di tɔ u siwee la wia. 16U la u be a ŋmɛnikɛrii di ga ŋɔ ú nuu chɔɔ. Haali a guŋ saŋa maa di u haa waa zummɛ lugɔ u biibaal haannɛ.

Taama pɛɛzuu, “Aŋmɛnɛɛ í turginnei?”

17Juda ŋɔ, “N daŋ lau buuŋ di wa turgii.”

U kaa ŋɔ, “Beedee kunnɛ i kpa tɛŋ mɔɔ ń zum lugɔ i daŋ wa tɛŋ a buunnɛi?”

18Juda bir ŋɔ, “Too, beedee waarɛ i ra nyiŋŋei?”

Taama kaa ŋɔ, “N na nyiŋŋi kuŋ la hiŋ ɔɔ kpa di ra jag hɔna, ni u ŋmɛŋ ani i daŋkpala naa hiŋ kpoglee naa.” Denii Juda kpa kuna la maa uŋ baglɛɛ la di tɛu. U jaa sɛɛ u nuu chɔɔ. Ban chɔɔwɛ la u kpogli hia. 19Uŋ wa kaalɛɛ la, u ga lau u saata la wir, ka kpa u luhanni laala la di laali.

20Juda ge bir la ka ga gil u dammu Adulam hinuu la lau a buuŋ di la ú ga tɛu, ka lɛɛ u kuna la uŋ ŋɔ nua di kpa tɛɛ a haaŋ la wa tɛu. Ka wɔɔ ga nawɛɛ. 21Denii u pɛɛzi baala baŋhina n du de, “Lee sɛnsɛnni la n faa du a bol naa ŋmɛnikɛrii la duɛi?”

Ba bir ŋɔ u be, “Yaa waa sɛnsɛnni maa dɔɔwɛ bɔnnaa.”

22Hira jaa bir la ga ŋɔ Juda be lugɔ wɔɔ nawɛɛ. Haali de hina gba ŋɔ lugɔ ba waa sɛnsɛnni maa dɔɔwɛ de.

23Denii Juda ŋɔ, “Gil u kpogli a kuna. Yaa ɛɛ aniaa di lau a buuŋ ya vii ga tɛu, ka yaa wɔɔ nawɛɛ. Di yaa bittɔ la de, ba daŋ gaa mam yaa.”

24Aŋ wa ɛɛ baaguzi ahoro, ba tili Juda be lugɔ u biibaal haaŋ Taama sɛmmɔɔ di kpogli hia.

Denii Juda ŋɔ, “Aa! Ií lawuu ba di wa fuuuh.”

25Ka baŋ wa lawuu di ra la ba ga kpu la, u tili di ŋɔ Juda be, “Baal la maa kuŋ n ɛɛ hɔna jagrikuŋ ni u ŋmɛŋ ani daŋkpala naabuu duŋ a hia. I zum a hiŋaa?”

26Juda sɛɛ lugɔ u kunaa, ka ŋɔ, “U hor summɔɔ, dikuubɛɛwiai, maa n nua la miŋ ŋɔwɛɛ lugɔ u daŋ yuu Sɛla la hiŋŋɛ.” Ama, waa kaa sɛɛ u nuu chɔɔ maa.

27Taama lulaa n wa helle, biinɛɛrii du u hia, ba maa ɛɛ baala. 28Unna lul la, bɛl nonii feli lii, haaŋ la n lawuu la kpa gessiaahmu di u nonii hiŋ, ka ŋɔ, “Unniibuu felee lii.” 29Ka uŋ wa bittɛ di lau u nonii du, unla hiŋ bir feli di wa lii. 30Denii a haaŋ ŋɔ, “I fittɔɔ lii.” Ba faa dau u sɔŋ Pɛrɛz.#38:30 Pɛrɛz zɛɛrɛ Fir lii. Ba kaa dau unla ge gessi n vɔɔ u nonii la sɔŋ, Zɛra.#38:30 Zɛra ge zɛɛrɛ Kuŋaahmu.

Currently Selected:

Luglaa 38: vag

Highlight

Copy

Compare